ખેડૂતોની દિલ્હી કૂચની આજે જાહેરાત: ખનૌરી બોર્ડરથી ખેડૂત શુભકરણની અંતિમ યાત્રા નીકળી, ભટિંડામાં અંતિમ સંસ્કાર કરાશે

​​​​​​પંજાબ-હરિયાણાની શંભુ અને ખનૌરી બોર્ડર પર એમએસપી પર ખરીદીની ગેરંટીના કાયદા સહીત અન્ય માંગણી મામલે ચાલી રહેલા ખેડૂતોના આંદોલનનો આજે (29 ફેબ્રુઆરી) 17મો દિવસ છે. આજે ખેડૂતો તેમની દિલ્હી કૂચને લઈને જાહેરાત કરશે.

આ સંદર્ભે, બુધવારે સાંજે કિસાન મજદૂર મોરચા (KMM) સંયોજક સરવન પંઢેર અને સંયુક્ત કિસાન મોરચા (બિનરાજકીય)ના જગજીત ડલ્લેવાલના નેતૃત્વ હેઠળ એક સંયુક્ત બેઠક યોજાઈ હતી. આ પહેલા મંગળવારે બંનેએ પોતપોતાના સંગઠનો સાથે આ અંગે બેઠક યોજી હતી.

FIR નોંધાયા બાદ બોર્ડે મોડી રાત્રે પટિયાલાની રાજીન્દ્રા હોસ્પિટલમાં ખનૌરી બોર્ડર પર માર્યા ગયેલા ખેડૂત શુભકરણનું પોસ્ટમોર્ટમ કરાવ્યું હતું. આ પછી શુભકરણના મૃતદેહને ખનૌરી બોર્ડર પર લાવવામાં આવ્યો હતો. જ્યાં ખેડૂતોએ શ્રદ્ધાંજલિ આપી હતી. ખેડૂતો શુભકરણની અંતિમયાત્રા સાથે ભટિંડા જવા રવાના થઈ ગયા છે. અહીં બલ્લો ગામમાં અંતિમ સંસ્કાર કરવામાં આવશે.

આ પહેલા ખનૌરી બોર્ડર પર 21 ફેબ્રુઆરીએ ખેડૂત શુભકરણના મોત બાદ ખેડૂતોએ દિલ્હી તરફ કૂચ કરવાનો નિર્ણય 29 ફેબ્રુઆરી સુધી ટાળ્યો હતો. ખેડૂતોની કૂચ મુલતવી રાખ્યા બાદ હરિયાણા-દિલ્હીની ટિકરી અને સિંઘુ સરહદો ખોલવામાં આવી હતી. આ સાથે જ હરિયાણાના 7 જિલ્લામાં ઈન્ટરનેટ પ્રતિબંધ પણ હટાવી દેવામાં આવ્યો હતો.

ખેડૂત નેતા જગજીત સિંહ ડલ્લેવાલ, સરવન સિંહ પંઢેર અને ખેડૂતોએ શુભકરણને શ્રદ્ધાંજલિ આપી હતી