55 મિનિટ પેહલા
- કૉપી લિંક
કોવિડને કારણે હિન્દી ફિલ્મ ઉદ્યોગ 2020 થી 2022 સુધી ખરાબ તબક્કામાંથી પસાર થયો, પરંતુ તેણે 2023 માં જબરદસ્ત પુનરાગમન કર્યું. આ મોટો બદલાવ YRF ફિલ્મ ‘પઠાન’ની રિલીઝ પછી શરૂ થયો હતો, જેમાં શાહરૂખ ખાન મુખ્ય ભૂમિકામાં જોવા મળ્યો હતો. આ પછી ‘જવાન’ અને ‘ગદર 2’ જેવી ફિલ્મોએ હિન્દી સિનેમાની સ્થિતિમાં વધુ સુધારો કર્યો.YRFના માલિક આદિત્ય ચોપરાની પત્ની અને અભિનેત્રી રાની મુખર્જીએ તાજેતરના ઈન્ટરવ્યૂમાં કોવિડ પછી YRFની સ્થિતિ વિશે વાત કરી. તેણે કહ્યું કે શાહરુખ ખાન સ્ટારર ફિલ્મ ‘પઠાન’ની રિલીઝ પછી બધું બદલાઈ ગયું.
કોવિડ દરમિયાન ઓટીટી પર મોટી ફિલ્મો રીલિઝ કરવાની હતી
મુંબઈમાં FICCI ફ્રેમ્સ ઈવેન્ટમાં રાની મુખર્જીએ જણાવ્યું કે, કેવી રીતે કોવિડ દરમિયાન આખી બોલિવૂડ ઈન્ડસ્ટ્રી ખરાબ સમયમાંથી પસાર થઈ, પરંતુ આદિત્ય ચોપરા આ સમયે પણ અડગ રહ્યા. રાનીએ કહ્યું, ‘આદિ (આદિત્ય ચોપરા)ની કેટલીક ફિલ્મો કોવિડ દરમિયાન રિલીઝ થવાની હતી. પરંતુ કમનસીબે કોવિડ દરમિયાન તમામ ફિલ્મો તેમની રિલીઝ પહેલા જ બંધ કરી દેવામાં આવી હતી. આ સમયગાળા દરમિયાન બનેલી ફિલ્મોને OTT પર રિલીઝ કરવા માટે ફિલ્મ નિર્માતાઓ પર ઘણું દબાણ હતું. ઘણા લોકો આવું પણ કરતા હતા. સૌથી મોટી ફિલ્મો પણ OTT પર રિલીઝ થઈ રહી હતી પરંતુ આ સમયે મારા પતિ સંપૂર્ણપણે શાંત હતા’.
આદિત્ય ચોપરાએ OTT પર પોતાની ફિલ્મો વેચી ન હતી
રાનીએ જણાવ્યું કે, ‘આદિત્યને OTT પર ફિલ્મો રિલીઝ કરવા માટે મોટી રકમની ઓફર પણ કરવામાં આવી હતી. પરંતુ તે કોઈના દબાણમાં આવ્યા ન હતા. તેણે લોકો થિયેટરોમાં પાછા આવે તેની રાહ જોવાનું નક્કી કર્યું કારણ કે, તેની ફિલ્મો થિયેટર માટે બનાવવામાં આવી હતી.
YRF માટે ડિપ્રેશન જેવો સમય આવ્યો પરંતુ ‘પઠાન’ ફિલ્મે બધું બદલી નાખ્યું
રાનીએ વધુમાં જણાવ્યું કે, કેવી રીતે શાહરૂખ ખાન સ્ટારર ‘પઠાન’ ફિલ્મે YRF માટે બધું બદલી નાખ્યું. રાનીએ કહ્યું, ‘પઠાન’ પહેલા જે પણ ફિલ્મો રિલીઝ થઈ હતી, તે બધી ફ્લોપ થઈ ગઈ હતી, કારણ કે OTTને કારણે દર્શકોની કન્ટેન્ટ જોવાની રીત રાતોરાત બદલાઈ ગઈ હતી. દર્શકોએ સિનેમા હોલમાં જવાને બદલે ઘરે બેસીને ફિલ્મો જોવાનું વધુ સારું માન્યું. જેના કારણે બોક્સ ઓફિસ પર ફિલ્મો ફ્લોપ ગઈ અને મેકર્સને નુકસાન સહન કરવું પડ્યું. YRF માટે પણ આ સમય હતાશા જેવો હતો. અમારી કંપનીના લોકો નાખુશ હતા. તેમ છતાં, આદિ મક્કમ હતો કે તેની ફિલ્મો ફક્ત થિયેટરોમાં જ રિલીઝ થશે. પછી ‘પઠાન’ રિલીઝ થઈ અને તેણે અમારા માટે બધું જ બદલી નાખ્યું. તે સમયની સૌથી વધુ કમાણી કરનારી ફિલ્મ બની હતી’.
‘પઠાન’ પછી, YRF ની ફિલ્મ ‘ટાઇગર 3’ દિવાળી 2023 ના રોજ રિલીઝ થઈ હતી, જેણે બોક્સ ઓફિસ પર પણ સારું પ્રદર્શન કર્યું હતું. YRFની આગામી ફિલ્મની યાદીમાં ‘વોર 2’, ‘ટાઈગર VS પઠાન’ અને ‘પઠાન 2’ જેવી ફિલ્મોનો સમાવેશ થાય છે. આલિયા ભટ્ટ શરવરી વાઘ સાથે YRF સ્પાય યુનિવર્સ ફિલ્મમાં પણ કામ કરી રહી છે.
