કાઠમંડુ15 મિનિટ પેહલા
- કૉપી લિંક
નેપાળ ક્રિકેટ ટીમના પૂર્વ કેપ્ટન સંદીપ લામિછાને બળાત્કારનો દોષી સાબિત થયો છે. કાઠમંડુ ડિસ્ટ્રિક્ટ કોર્ટ દ્વારા તેને બળાત્કારનો દોષી ઠેરવવામાં આવ્યો હતો. કોર્ટે એ પણ જણાવ્યું કે પીડિતા ગુના સમયે સગીર નહોતી. તેની ઉંમર 18 વર્ષથી વધુ હતી. અગાઉ એવું માનવામાં આવતું હતું કે છોકરી 17 વર્ષની હતી.
જજ સુધીર રાજ ધકલે સિંગલ જજની બેન્ચની સુનાવણીમાં લામિછાને સામેના તમામ આરોપો સાચા ગણાવ્યા હતા. 23 વર્ષીય ક્રિકેટરને હજુ સુધી સજા સંભળાવવામાં આવી નથી, તેને આવતા વર્ષે જાન્યુઆરીના પહેલા સપ્તાહમાં સજા સંભળાવવામાં આવી શકે છે.
આ કેસ સપ્ટેમ્બર 2022માં બન્યો હતો
સપ્ટેમ્બર 2022માં સંદીપ લામિછાને સામે બળાત્કારનો કેસ નોંધવામાં આવ્યો હતો. વેસ્ટ ઈન્ડિઝમાં કેરેબિયન પ્રીમિયર લીગ દરમિયાન તેની સામે ધરપકડ વોરંટ જારી કરવામાં આવ્યું હતું. સંદીપ નેપાળ પહોંચતા જ કાઠમંડુ પોલીસે તેની ધરપકડ કરી લીધી હતી.
નીચલી અદાલતે તેને પોલીસ કસ્ટડીમાં રાખીને પૂછપરછ કરવાનું કહ્યું હતું પરંતુ સુપ્રીમ કોર્ટે તેને કસ્ટડીમાં રાખવાના નિર્ણયને પલટી નાખ્યો હતો. સુનાવણી દરમિયાન લામિછાને જામીન મળ્યા બાદ નેપાળ માટે ક્રિકેટ રમવાનું ચાલુ રાખ્યું હતું.
સ્કોટલેન્ડના ખેલાડીઓએ હાથ મિલાવ્યા ન હતા
આરોપો છતાં નેપાળ ક્રિકેટ એસોસિયેશન (CAN)એ સંદીપ લામિછાનેને આંતરરાષ્ટ્રીય ક્રિકેટ રમવાની પરવાનગી આપી. જો કે તેની પાસેથી ટીમની કેપ્ટનશીપ છીનવાઈ ગઈ હતી.
ફેબ્રુઆરી 2023માં સ્કોટલેન્ડ-નેપાળ મેચ બાદ સ્કોટલેન્ડના ખેલાડીઓએ લામિછાને સાથે હાથ મિલાવ્યા ન હતા. ખેલાડીઓએ કહ્યું હતું કે તેમની ટીમ બળાત્કારના દોષિત ખેલાડી સાથે હાથ નહીં મિલાવે.
સ્કોટલેન્ડના ખેલાડીઓએ બળાત્કારના આરોપોને કારણે ફેબ્રુઆરી 2023માં સંદીપ લામિછાને સાથે હાથ મિલાવ્યા ન હતા.
નેપાળ માટે 200થી વધુ વિકેટ લીધી
સંદીપ લામિછાને નેપાળ માટે 51 વન-ડે અને 52 T20 રમ્યો છે. જમણા હાથના લેગ સ્પિનર બોલરે આ સમયગાળા દરમિયાન ODIમાં 112 અને T-20માં 98 વિકેટ ઝડપી હતી.
IPLમાં 13 વિકેટ લીધી છે
સંદીપ ઈન્ડિયન પ્રીમિયર લીગ (IPL)માં દિલ્હી કેપિટલ્સ ટીમ તરફથી રમી ચૂક્યો છે. દિલ્હીએ તેને 2018ની IPLમાં પોતાની ટીમનો ભાગ બનાવ્યો હતો. તેણે 9 IPL મેચમાં 13 વિકેટ લીધી છે.
જમણા હાથનો બોલર લામિછાને IPLમાં 20 લાખ રૂપિયાની બેઝ પ્રાઈઝ પર વેચાયો હતો.
144 T20માં 206 વિકેટ લીધી છે
સંદીપ તેની 5 વર્ષની ક્રિકેટ કારકિર્દીમાં 23 અલગ-અલગ ટીમ માટે રમ્યો છે. તે વિશ્વની વિવિધ ફ્રેન્ચાઈઝી લીગમાં ભાગ લેનાર પ્રથમ નેપાળી ક્રિકેટર છે. સંદીપે વિશ્વભરની લીગ સહિત વિવિધ લીગ અને ટુર્નામેન્ટમાં કુલ 144 T20 રમી છે. આમાં તેણે 206 વિકેટ લીધી છે. તેણે ફર્સ્ટ ક્લાસ ક્રિકેટમાં ત્રણ વિકેટ અને લિસ્ટ-એમાં 158 વિકેટ ઝડપી છે.
