‘ફાઈટર’ના મેકર્સથી દીપિકા પાદુકોણ નારાજ: મેકર્સનું ફોકસ માત્ર હૃતિક રોશન પર, શાહરુખ ખાને કેમિયો કરવાની ચોખ્ખી ના પાડી દીધી

હૃતિક રોશન અને દીપિકા પાદુકોણ સ્ટારર ફિલ્મ ‘ફાઈટર’ આ મહિને 25મી જાન્યુઆરીએ રિલીઝ થઈ રહી છે. 250 કરોડમાં બનેલી આ ફિલ્મનું ટીઝર રિલીઝ થઈ ગયું છે, જોકે, ફિલ્મને લઈને કોઈ ચર્ચા નથી. આનાથી નિર્માતાઓ ચિંતિત છે. ફિલ્મના ટીઝર અને ગીતોને મળેલા હળવા પ્રતિસાદને કારણે મેકર્સે હવે પ્રમોશન ખર્ચ પર મર્યાદા મૂકી દીધી છે. હાઇપ બનાવવા માટે, મેકર્સ ઇચ્છતા હતા કે શાહરુખ ફિલ્મમાં કેમિયો કરે, પરંતુ તેણે પણ ના પાડી દીધી. દીપિકા પાદુકોણ પણ મેકર્સથી નારાજ છે.

શાહરુખે ‘ફાઈટર’માં કેમિયો કરવાની કેમ ના પાડી?
તાજેતરના રેડિટ રિપોર્ટ અનુસાર, ‘ફાઈટર’ ડિરેક્ટર સિદ્ધાર્થ આનંદે શાહરુખ ખાનને ફિલ્મમાં કેમિયો કરવા માટે વિનંતી કરી હતી, પરંતુ તેણે ના પાડી દીધી હતી. રિપોર્ટ અનુસાર, શાહરુખ ફિલ્મના ઝોનરને કારણે ફિલ્મનો ભાગ બનવા નથી માગતો.

સિદ્ધાર્થ આનંદ દ્વારા નિર્દેશિત ‘પઠાન’માં શાહરુખ લીડ રોલમાં હતો.

દીપિકા પાદુકોણ પણ મેકર્સથી નાખુશ છે
રેડિટના રિપોર્ટ અનુસાર, દીપિકા પાદુકોણ પણ ફિલ્મ ‘ફાઈટર’ના મેકર્સથી નાખુશ છે. સૂત્રો અનુસાર ફિલ્મને લાઇમલાઇટમાં લાવવા માટે મેકર્સ માત્ર હૃતિક ​​​​રોશન પર ફોકસ કરી રહ્યા છે. ટીઝર પછી પણ, હૃતિક વિશે ચર્ચા હતી અને ક્યાંય દીપિકાનો ઉલ્લેખ નહોતો.

ઘણા સેલેબ્સે પ્રમોશનમાં મદદ કરવાનો ઇનકાર કર્યો હતો
રિપોર્ટમાં એક સૂત્રને ટાંકીને કહેવામાં આવ્યું છે કે, ફિલ્મ ‘ફાઈટર’ના ‘શેર ખુલ ગયે’ ગીત પાસેથી ઘણી અપેક્ષાઓ હતી, પરંતુ આ ગીત પણ સમાચારમાં નથી. આવી સ્થિતિમાં, મેકર્સ બેંગ-બેંગ સોંગ ચેલેન્જ જેવા સેલેબ્સની મદદથી આ ગીતને પ્રમોટ કરવા માગતા હતા. નિર્માતાઓએ આ ગીતનો ઉપયોગ કરીને વિડિયો બનાવવા માટે ઘણા સેલેબ્સનો સંપર્ક કર્યો હતો, પરંતુ ઘણા સેલેબ્સે એમ કહીને પ્રમોશનનો ઇનકાર કર્યો હતો કે તેઓ પહેલા ફિલ્મનું ટ્રેલર જોવા માગે છે. હવે પ્રમોશન માટે ટ્રેલરની રાહ જોવાઈ રહી છે.

સ્ટુડિયો હેડ ફિલ્મથી નાખુશ છે
જો Reddit સૂત્રનું માનીએ તો, ટીઝર અને ગીત રિલીઝ થયા પછી સ્ટુડિયો હેડ એકદમ નાખુશ છે. નિર્માતાઓ માનતા હતા કે ટીઝર ધૂમ મચાવશે અને ગીતો ફિલ્મને ચર્ચામાં રાખશે, પરંતુ એવું કંઈ થયું નહીં. હવે સ્ટુડિયો ફિલ્મના પ્રમોશનમાં વધુ ખર્ચ કરતાં ખચકાય છે. હવે નિર્માતાઓને માત્ર ટ્રેલર અને અન્ય ગીતો પરથી જ આશા છે. ‘ફાઈટર’ ફિલ્મનું નિર્દેશન સિદ્ધાર્થ આનંદ કરી રહ્યા છે, જેમણે બે બ્લોકબસ્ટર ફિલ્મો ‘વોર’ અને ‘પઠાન’નું નિર્દેશન કર્યું છે. ફિલ્મમાં હૃતિક ​​​​રોશન અને દીપિકા પાદુકોણ મહત્ત્વની ભૂમિકામાં છે.