12 વર્ષ પહેલા ગ્લેમર વર્લ્ડ છોડીને સાધુ બની હતી બરખા: ઐશ્વર્યા રાય સુષ્મિતાને આપી હતી ટક્કર, ‘ખિલાડીઓ કા ખિલાડી’માં જોવા મળી હતી

એક સમયની પ્રખ્યાત અભિનેત્રી બરખા મદન હવે સાધુ બની ગઈ છે. એક સમયે ઐશ્વર્યા રાય અને સુષ્મિતા સેનને પોતાની સુંદરતાથી ટક્કર આપનાર બરખા હવે ગ્લેમર અને શહેરથી દૂર સાદું જીવન જીવી રહી છે. મિસ ટુરિઝમનો તાજ જીત્યા પછી, બરખાએ અક્ષય કુમાર અને રેખા જેવા સ્ટાર્સ સાથે ફિલ્મ ‘ખિલાડીઓ કે ખિલાડી’ દ્વારા બોલિવૂડમાં પ્રવેશ કરીને પોતાનું નામ બનાવ્યું. જોકે, 2012માં બરખાએ અચાનક જ ફિલ્મ ઈન્ડસ્ટ્રી છોડી દીધી અને સાધુ બની ગઈ.

2002 માં, તેમણે ધર્મશાલામાં એક કાર્યક્રમ દરમિયાન દલાઈ લામા જોપા રિપોન્ચેને સાંભળ્યા. તેમના શબ્દોથી પ્રેરાઈને બરખા બૌદ્ધ ધર્મમાં જોડાઈ. આ પછી પણ, તે ફિલ્મો અને ટીવી શોનો ભાગ હતી, પરંતુ 2012 માં એક દિવસ અચાનક બરખાએ જાહેરાત કરી કે તે ગ્લેમરની દુનિયા છોડીને બૌદ્ધ સાધુ બની રહી છે. એક સમયે ડિઝાઈનર કપડામાં જોવા મળતી બરખા હવે એક જ પ્રકારના સાદા કપડા પહેરે છે.

ઐશ્વર્યા અને સુષ્મિતાને મિસ ઈન્ડિયામાં ટક્કર આપી હતી
બરખા મદને વર્ષ 1994માં મિસ ઈન્ડિયા બ્યુટી પેજન્ટમાં ભાગ લીધો હતો. સુષ્મિતા સેને આ સ્પર્ધા જીતી હતી જ્યારે ઐશ્વર્યા રાય બીજા ક્રમે રહી હતી. બરખા આ સ્પર્ધા જીતી શકી ન હતી, પરંતુ બંનેને ટક્કર આપીને તેણે મિસ ટુરિઝમનો ખિતાબ જીત્યો હતો. બરખાએ ઈન્ટરનેશનલ મિસ ટુરિઝમ કોમ્પિટિશનમાં થર્ડ રનર અપનો ખિતાબ જીત્યો હતો.

આ સ્પર્ધા પછી બરખાને 1996માં આવેલી ફિલ્મ’ ખિલાડીઓ કા ખિલાડી’થી બોલિવૂડમાં ડેબ્યૂ કરવાની તક મળી. બાદમાં તે ‘ડ્રાઇવિંગ મિસ પામલીન’, ‘તેરા મેરા પ્યાર’, ‘ભૂત’, ‘સમય’, ‘સોચ લો’ અને ‘સુરખાબ’ જેવી ફિલ્મોનો ભાગ હતી. ફિલ્મો ઉપરાંત, બરખા ટીવી શો ઘર એક સપના, ‘સાત ફેરે’ અને ‘ન્યાય’માં પણ જોવા મળી છે.

બરખા હંમેશા સાદા વસ્ત્રોમાં મોટાભાગે ધર્મશાલામાં બૌદ્ધ ધર્મ પાળતી જોવા મળે છે. આ ઉપરાંત તે બૌદ્ધ ગયાના તારા ચિલ્ડ્રન પ્રોજેક્ટમાં જોડાઈને એચઆઈવી સંક્રમિત બાળકોની સેવા પણ કરે છે. બરખા બૌદ્ધ સાધુ બનવાને તેના જીવનનો શ્રેષ્ઠ નિર્ણય માને છે.