રણબીર કપૂરની ફિલ્મ ‘રામાયણ’નું કાસ્ટિંગ શરુ: શૂર્પણખાનું પાત્ર ભજવશે ‘સેક્રેડ ગેમ્સ’ની કુબ્રા સૈત , લારા, સની-બોબીને પણ ફિલ્મની ઓફર કરવામાં આવી

નીતિશ તિવારીના નિર્દેશનમાં બની રહેલી આગામી પૌરાણિક ફિલ્મ રામાયણ ચર્ચામાં છે. જ્યારે રણબીર કપૂરને ભગવાન શ્રી રામની મુખ્ય ભૂમિકામાં ફાઈનલ કરવામાં આવ્યો છે, ત્યારે ફિલ્મના અન્ય પાત્રોના કાસ્ટિંગમાં સતત અપડેટ્સ સામે આવી રહ્યા છે. હવે જો અહેવાલોનું માનીએ તો નવાઝુદ્દીન સિદ્દીકી સ્ટારર સિરીઝ સેક્રેડ ગેમ્સમાં કોયલનો રોલ કરનાર કુબ્રા સૈત આ ફિલ્મમાં શૂર્પણખાનું પાત્ર ભજવશે.

તાજેતરના અહેવાલોમાં, ફિલ્મની નજીકના સૂત્રોને ટાંકીને, એવું કહેવામાં આવી રહ્યું છે કે કુબ્રા સૈતને નિતેશ તિવારીની ફિલ્મ ‘રામાયણ’માં રાવણની બહેન શૂર્પણખાના રોલમાં લેવામાં આવી છે. ‘KGF’ સ્ટાર યશ આ ફિલ્મમાં રાવણની ભૂમિકામાં છે.

લારા દત્તા કૈકેયી બનશે
અહેવાલો અનુસાર, લારા દત્તા આ ફિલ્મમાં રાજા દશરથની ત્રીજી પત્ની કૈકેયીની ભૂમિકા ભજવવા જઈ રહી છે. ફિલ્મ રામાયણનું શૂટિંગ માર્ચ 2024થી શરૂ થવા જઈ રહ્યું છે. લારા માર્ચમાં જ શૂટિંગ શરૂ કરવા જઈ રહી છે. નિતેશ તિવારીનું માનવું છે કે કૈકેયીનું પાત્ર રામાયણનો એક મહત્વપૂર્ણ ભાગ છે, તેથી લારા તે ભૂમિકા ખૂબ જ સારી રીતે ભજવશે. લારા પણ આ ફિલ્મને લઈને ખૂબ જ ઉત્સાહિત છે.

સની દેઓલ-બોબીને પણ ફિલ્મની ઓફર!
ફિલ્મ ‘એનિમલ’માં બોબી દેઓલના ઉત્કૃષ્ટ અભિનયને જોયા પછી, નિર્માતાઓએ તેને રામાયણ ફિલ્મમાં કુંભકર્ણની ભૂમિકા ઓફર કરી. આ દિવસોમાં બોબી સાઉથની ફિલ્મના શૂટિંગમાં વ્યસ્ત છે, તેથી તેણે નીતિશ તિવારી પાસે 2 મહિનાનો સમય માંગ્યો છે. બોબીની ટીમે એ પણ કહ્યું છે કે હાલમાં એ નિશ્ચિત નથી કે બોબી રામાયણ ફિલ્મમાં હશે.

બીજી તરફ એવા પણ સમાચાર છે કે ફિલ્મમાં હનુમાનના રોલ માટે મેકર્સ સની દેઓલ સાથે ચર્ચા કરી રહ્યા છે. એવા પણ અહેવાલો છે કે રણબીર પોતે ઇચ્છે છે કે સની દેઓલ હનુમાનનું પાત્ર ભજવે.

નિતેશ તિવારીની રામાયણ 3 ભાગમાં બનાવવામાં આવશે
આ ફિલ્મને 3 ભાગમાં બનાવવાની તૈયારી ચાલી રહી છે, જેનો પહેલો ભાગ 2025માં રિલીઝ થશે. 500 કરોડમાં બની રહેલી ભારતની મેગા બજેટ ફિલ્મોમાં રામાયણ ફિલ્મનો સમાવેશ થવા જઈ રહ્યો છે. આ ફિલ્મમાં રણબીર કપૂર ભગવાન શ્રી રામની ભૂમિકામાં જોવા મળશે, સાઉથની અભિનેત્રી સાઈ પલ્લવી માતા સીતાની ભૂમિકામાં અને KGF ફેમ યશ રાવણની ભૂમિકા ભજવશે.