1 કલાક પેહલા
- કૉપી લિંક
સૈફ અલી ખાન પર હુમલાના કેસમાં, મુંબઈ પોલીસે બાંદ્રા કોર્ટમાં 1613 થી વધુ પાનાની ચાર્જશીટ દાખલ કરી છે. આ ચાર્જશીટમાં ઘણા ખુલાસા થયા છે. ચાર્જશીટમાં સૈફની પત્ની કરીના કપૂરનું નિવેદન પણ છે.
ચાર્જશીટમાં કરીનાનું નિવેદન પણ સામેલ છે
15 જાન્યુઆરીની રાત્રે લગભગ 2.30 વાગ્યે સૈફ અલી ખાન પર છરીથી હુમલો કરવામાં આવ્યો હતો. કરીનાએ પોતાના નિવેદનમાં આખી ઘટના જણાવી હતી. નિવેદનમાં, એક્ટ્રેસે કહ્યું કે ઘટનાના દિવસે, તે તેની મિત્ર રિયા કપૂરને મળ્યા પછી રાત્રે 1 વાગ્યે ઘરે પાછી આવી અને લગભગ 2 વાગ્યે, જહાંગીરની આયા ચીસો પાડતી તેના રૂમમાંથી બહાર આવી. આયાએ કહ્યું હતું કે બાબાના રૂમમાં એક માણસ હતો અને તેના હાથમાં છરી હતી. તે પૈસા માગે છે. જે બાદ કરીના અને સૈફ જહાંગીરના રૂમમાં પહોંચ્યા અને હુમલાખોરને જોયો. ત્યારબાદ હુમલાખોરે સૈફ પર છરી વડે હુમલો કર્યો.
સર્જરી દરમિયાન સૈફના શરીરની અંદરથી 2.5 ઇંચ લાંબો છરીનો એક ટુકડો કાઢવામાં આવ્યો હતો
આ ચાર્જશીટમાં 35 સાક્ષીઓનાં નિવેદનો તેમજ 25 સીસીટીવી ફૂટેજનો સમાવેશ થાય છે
સૈફ અલી કેસમાં પોલીસને મહત્ત્વના પુરાવા મળ્યા
- અહેવાલો અનુસાર, પોલીસે ચાર્જશીટમાં અનેક સીસીટીવી ફૂટેજનો ઉલ્લેખ કર્યો છે, જેમાં આરોપી શરીફુલ ઇસ્લામ સૈફના એપાર્ટમેન્ટ સુધી જતો જોવા મળે છે. પોલીસે જણાવ્યું હતું કે તેણે કેસની તપાસ માટે ફોરેન્સિક સાયન્સ લેબોરેટરીમાં લગભગ 300 સીસીટીવી ફૂટેજ મોકલ્યા હતા, જેમાંથી 25 ફૂટેજમાં શરીફુલ દેખાઈ રહ્યો છે.
- પોલીસે ચાર્જશીટમાં પુરાવા તરીકે આરોપી શરીફુલ ઇસ્લામના મોબાઇલ ફોનનું લોકેશ પણ નોંધ્યું છે. પોલીસે ચાર્જશીટમાં ફોન લોકેશન સાથે ઇન્ટરનેટ પ્રોટોકોલ ડિટેલ્સ રિપોર્ટનો પણ સમાવેશ કર્યો હતો. આ ઉપરાંત, પોલીસે દાવો કર્યો છે કે હુમલા પછી, આરોપીએ ડેટા કોલનો ઉપયોગ કરીને બાંગ્લાદેશમાં તેના પરિવારના સભ્યો સાથે વાત કરી હતી.
- પોલીસે જણાવ્યું હતું કે, આરોપી પાસેથી મળેલો ટુકડો, ગુનાના સ્થળેથી મળેલો ભાગ અને સૈફના કરોડરજ્જુમાંથી કાઢવામાં આવેલ ટુકડો, ત્રણેય એક જ છરીના છે.
- પોલીસે ચાર્જશીટમાં ક્રાઇમ સીન રિક્રિએશન રિપોર્ટનો પણ ઉલ્લેખ કર્યો છે, જેમાં તેમણે સમગ્ર ઘટનાનો ખુલાસો કર્યો છે.
- ચાર્જશીટમાં આરોપીના ડાબા હાથના ફિંગરપ્રિન્ટના રિપોર્ટનો પણ ઉલ્લેખ છે.
15 જાન્યુઆરીએ સૈફ પર હુમલો થયો હતો
15 જાન્યુઆરીના રોજ સૈફ અલી ખાન પર તેના ઘર, સતગુરુ શરણ એપાર્ટમેન્ટ્સમાં હુમલો થયો હતો. આ પછી સૈફ પોતે હોસ્પિટલ પહોંચ્યો હતો. તેને હાથ, કરોડરજ્જુ અને પીઠમાં ઈજા થઈ હતી. સારવાર બાદ, એક્ટરને 21 જાન્યુઆરીએ રજા આપવામાં આવી હતી. પોલીસે બે દિવસ પછી બાંગ્લાદેશી નાગરિક શરીફુલ ઇસ્લામની ધરપકડ કરી હતી.
પોલીસે આરોપી શરીફુલ પાસેથી બાંગ્લાદેશી ઓળખપત્ર અને ડ્રાઇવિંગ લાઇસન્સ જપ્ત કર્યું હતું. તે વિજય દાસના નામથી મુંબઈમાં ગેરકાયદેસર રીતે રહેતો હતો
