સની-શાહરુખની દુશ્મનીનો 19 વર્ષ બાદ અંત આવ્યો: ‘ડર’ફિલ્મના સેટ પર અણબનાવ થયો હતો, ‘ગદર 2’ની સક્સેસ પાર્ટીમાં એકબીજાને ગળે મળ્યા

બોલિવૂડ એક્ટર શાહરૂખ ખાન અને સની દેઓલ વચ્ચે છેલ્લા 19 વર્ષથી અણબનાવ ચાલી રહ્યો હતો. બંને વચ્ચેની લડાઈ ‘ડર’ ફિલ્મના સેટ પરથી શરૂ થઈ હતી, જે હવે 19 વર્ષ પછી સમાપ્ત થઈ ગઈ છે. વર્ષોની દુશ્મની બાદ સની દેઓલે શાહરૂખ ખાનને તેની ફિલ્મ ‘ગદર-2’ની સક્સેસ પાર્ટીમાં આમંત્રણ આપ્યું હતું. શાહરુખે પોતાના વ્યસ્ત શેડ્યૂલમાંથી સમય કાઢ્યો અને બંનેએ એકબીજાને ગળે લગાવીને પોતાની નારાજગી દૂર કરી.

હાલમાં જ પીટીઆઈને આપેલા ઈન્ટરવ્યુમાં સની દેઓલે શાહરૂખ સાથેના ઝઘડા અને વાતચીતના અંત વિશે ખુલીને વાત કરી હતી. સનીએ કહ્યું, હું શાહરૂખ ખાનનો આભારી છું. તે સમયે શાહરૂખ દુબઈમાં ;જવાન’ ફિલ્મના પ્રમોશનમાં વ્યસ્ત હતો ત્યારે મેં તેને ફોન કર્યો હતો. મેં તેમને ફિલ્મ ‘ગદર-2’ની સક્સેસ પાર્ટીમાં આમંત્રણ આપ્યું હતું. મને લાગ્યું કે તે આવી શકશે નહીં, પરંતુ તેણે સીધો મારી પાર્ટીમાં આવવા માટે સમય લીધો. અમે બંનેએ એકબીજાને આલિંગન આપ્યું. મને પાર્ટીમાં તેની સાથે ખુલીને વાત કરવાનો મોકો મળ્યો નથી, પરંતુ મને ખાતરી છે કે જ્યારે પણ અમે વાત કરીશું, તે સારું રહેશે.

તેણે વધુમાં કહ્યું કે, અભિનેતા તરીકે અમારી વચ્ચે ઘણી વસ્તુઓ થાય છે. અમે યુવાન હતા, અમે તે સમયે કંઈક અલગ હતા. પણ જેમ જેમ સમય પસાર થાય છે તેમ આપણે સમજદાર બનીએ છીએ. આપણે જીવનનું સત્ય સમજીએ છીએ.

શાહરૂખ-સની કેમ લડ્યા?
શાહરૂખ ખાન અને સની દેઓલ 1993માં રિલીઝ થયેલી યશરાજ ચોપરાની ફિલ્મ ‘ડર’માં સાથે જોવા મળ્યા હતા. આ ફિલ્મમાં સની હીરો હતો, જ્યારે શાહરૂખનો ફિલ્મમાં નેગેટિવ રોલ હતો. ફિલ્મમાં શાહરૂખને જે રીતે મહત્વ આપવામાં આવી રહ્યું છે તેનાથી સની નાખુશ હતો. જેના કારણે બંને વચ્ચે અણબનાવ શરૂ થયો હતો. સેટ પર બોલાચાલી પછી બંનેએ એકબીજા સાથે વાત કરવાનું બંધ કરી દીધું અને ફરી ક્યારેય સાથે કામ કર્યું નહીં.