Gandhinagar Blast News : ગાંધીનગરથી એક ચોંકાવનારા અહેવાલ સામે આવ્યાં છે. અહીં સેક્ટર 4 વિસ્તારમાં ગેસના બાટલામાં જોરદાર બ્લાસ્ટ થતાં આગ ઓલવવા આવેલા 4 ફાયર ફાઈટર્સ ઈજાગ્રસ્ત થઇ ગયા હતા. તેમની હાલતને જોતાં તાત્કાલિક ધોરણે તેમને સારવાર અર્થે સિવિલ હોસ્પિટલ ખસેડવામાં આવ્યા હતા. આ ઘટના રાતે લગભગ 10 થી 11 વાગ્યાની વચ્ચે આ ઘટના બની હતી. જેની જાણકારી મળતાં જ સ્થાનિક રહીશોએ તાત્કાલિક ઈમરજન્સી રિસ્પોન્સ ટીમને જાણ કરી હતી.
આગ લાગી હોવાની જાણકારી મળી હતી…
આ મામલે ફાયર ફાઈટર્સ વિભાગના અધિકારીએ કહ્યું કે અમને ગાંધીનગરના સેક્ટર 4 માં જાહેર શૌચાલયની પાછળ આવેલા ઝુંપડામાં આગ લાગી હોવાની જાણકારી આપતો એક કોલ આવ્યો હતો જેના પર ત્વરિત કાર્યવાહી કરતાં ટીમને રવાના કરવામાં આવી હતી. ઘટનાસ્થળે પહોંચતા જ ટીમ દ્વારા આગ ઓલવવા માટેના પ્રયાસો શરૂ કરવામાં આવતા જ શૌચાલયની પાછળ આવેલા આગમાં લપેટાયેલા ઝુંપડામાં ગેસના બાટલામાં પ્રચંડ બ્લાસ્ટ થયો હતો. જેની લપેટમાં ફાયર ફાઈટર્સ ટીમના 4 સભ્યો આવી ગયા હતા. ચારેયની હાલત અત્યારે ગંભીર જણાવાઈ રહી છે અને તેમની સારવાર કરવામાં આવી રહી છે.
ફાયરબ્રિગેડના અધિકારીઓનું શું કહેવું છે?
ફાયરબ્રિગેડના અધિકારીઓએ આપેલી માહિતી અનુસાર ગાંધીનગર સેક્ટર 4 A ના ગાર્ડન પાસે જાહેર શૌચાલય ની પાછળ એક ઝૂંપડું હતું. ત્યાં ગેસનો બાટલો ફાટ્યો હતો. આગ અગાઉ લાગેલી હતી અને 4 ફાયર મેન બચાવ કામગીરીમાં લાગ્યા હતા. આ 4 ફાયરમેન જ્યારે બચાવ કામગીરી માટે અંદર ઝૂંપડા તરફ આગળ વધ્યા ત્યારે આગને કારણે ગેસનો બાટલો ફાટ્યો હતો. ફાયર બ્રિગેડના 4 કર્મચારીઓ આ દરમિયાન 50 ટકા જેટલા દાઝી ગયા હતા.
