ચીનમાં વિશ્વનો સૌથી મોટો સોનાનો ભંડાર મળ્યો: તેમાં 1000 મેટ્રિક ટન સોનું, જેની કિંમત 83 બિલિયન ડોલરથી વધુ

ચીનના હુનાન પ્રાંતમાં વિશ્વનો સૌથી મોટો સોનાનો ભંડાર મળી આવ્યો છે. સિન્હુઆ ન્યૂઝ અનુસાર, હુનાનની પિંગ્ઝિયાંગ કાઉન્ટીમાં 1000 મેટ્રિક ટન ઉચ્ચ ગુણવત્તાનું સોનું હોઈ શકે છે. તેની કિંમત 83 અબજ ડૉલર (રૂ. 7 લાખ કરોડ) કરતાં વધુ આંકવામાં આવી છે.

નિષ્ણાત ચેન રુલિન કહે છે કે ઘણા ડ્રિલ્ડ ખડકોના કોરોમાં સોનું સ્પષ્ટપણે દેખાઈ રહ્યું છે. મુખ્ય નમૂનાઓ દર્શાવે છે કે 1 મેટ્રિક ટન અયસ્કમાં 138 ગ્રામ (આશરે 5 ઔંસ) જેટલું સોનું હોઈ શકે છે. તેને વિશ્વમાં અત્યાર સુધીની સૌથી મોટો સોનાનો ભંડાર ગણવામાં આવે છે. આ દક્ષિણ આફ્રિકાની દક્ષિણ ડીપ ખાણમાં 900 મેટ્રિક ટન કરતાં વધુ સોનું છે.

3D મોડેલિંગ દ્વારા 1000 મેટ્રિક સોનું મળ્યું

રિપોર્ટ અનુસાર, પિંગજિયાંગ કાઉન્ટીમાં 40થી વધુ સોનાની ખાણો મળી આવી છે. ભૂસ્તરશાસ્ત્રીઓએ અગાઉ અંદાજ લગાવ્યો હતો કે અહીં 300 મેટ્રિક ટન સોનું છે. જો કે, પાછળથી 3D મોડેલિંગનો ઉપયોગ કરીને જાણવા મળ્યું કે સોનાની તિરાડોની ઊંડાઈ 3000 મીટર સુધી છે. આમાં અંદાજ કરતાં 700 મેટ્રિક ટન વધુ સોનું છે.

ચીનના અધિકારીઓ અહીં વધુ સંશોધન કરી રહ્યા છે. તેની શોધ કરનાર હુનાન ગોલ્ડ કોર્પોરેશનનું કહેવું છે કે ખૂબ ઊંડાઈને કારણે ખાણમાં કેટલું સોનું છે તે જાણી શકાયું નથી. આ કારણે કિંમત હજુ કહી શકાય તેમ નથી.

વિશ્વના સોનાનું 10% ઉત્પાદન ચીનમાં થાય છે

ચીન વિશ્વનું સૌથી મોટું સોનું ઉત્પાદક દેશ છે. વર્ષ 2023માં વૈશ્વિક ઉત્પાદનમાં તેનો હિસ્સો લગભગ 10% હતો. વર્લ્ડ ગોલ્ડ કાઉન્સિલના રિપોર્ટ અનુસાર ગયા વર્ષ સુધી ચીન પાસે 2,235.39 ટન સોનાનો ભંડાર હતો.