રાજનાથની પાકિસ્તાનને મદદની ઓફર: કહ્યુ- આતંકવાદને ખતમ કરવા માંગતા હોય તો અમે મદદ કરીશું; એક ઈંચ જમીન પણ કોઈએ લીધી નથી

ANIને આપેલા ઈન્ટરવ્યૂમાં રક્ષા મંત્રી રાજનાથ સિંહે પાકિસ્તાન અને ચીન પર ખુલીને વાત કરી હતી.

રક્ષા મંત્રી રાજનાથ સિંહે પાકિસ્તાનને મદદની ઓફર કરી છે. ન્યૂઝ એજન્સી ANIને આપેલા ઈન્ટરવ્યુમાં રાજનાથે કહ્યું કે પાકિસ્તાને પોતાની ધરતી પરથી આતંકવાદને ખતમ કરવો જોઈએ. જો તેને લાગે છે કે તે આ કામ કરવા સક્ષમ નથી તો ભારત પાડોશી હોવાના કારણે તેની મદદ કરી શકે છે. આ માટે પાકિસ્તાને નિર્ણય લેવો પડશે.

સંરક્ષણ મંત્રીએ એમ પણ કહ્યું કે જો પાકિસ્તાન આતંકવાદનો ઉપયોગ કરીને ભારતને અસ્થિર કરવાનો પ્રયાસ કરશે તો તેને પરિણામ ભોગવવા પડશે. અમે કોઈપણ કિંમતે સરહદ પારના આતંકવાદને સહન નહીં કરીએ. આતંકવાદને ખતમ કર્યા વિના પાકિસ્તાન સાથેના સંબંધો સુધારી શકાય નહીં.

રાજનાથના જણાવ્યા અનુસાર, ભારતે કહ્યું છે કે પાકિસ્તાને વાતચીત માટે વધુ સારું વાતાવરણ બનાવવું જોઈએ, જેમાં આતંકવાદ, દુશ્મનાવટ કે હિંસા માટે કોઈ જગ્યા ન હોય.

ભારતની એક ઈંચ જમીન કોઈએ લીધી નથીઃ રાજનાથ
સંરક્ષણ પ્રધાને એવા અહેવાલોને પણ નકારી કાઢ્યા હતા જેમાં કહેવામાં આવ્યું હતું કે ચીને ભારતની ઘણી જમીન પર કબજો કરી લીધો છે. રાજનાથે કહ્યું કે પીએમ નરેન્દ્ર મોદીના નેતૃત્વમાં કોઈએ ભારતની એક ઈંચ જમીન પર પણ કબજો નથી કર્યો. વાસ્તવિક નિયંત્રણ રેખા (LAC) પર ચીનના નિર્માણના સમાચાર પર રાજનાથે કહ્યું કે બંને દેશો પોતપોતાના ભાગોમાં બાંધકામ કરવા માટે સ્વતંત્ર છે.