સંસદમાં અદાણી મુદ્દે હોબાળો: વિપક્ષના નારા – દેશને લૂંટવાનું બંધ કરો; ધનખરે કહ્યું- સંસદીય વિવાદ લોકશાહીને નબળી પાડે છે

લોકસભામાં કાર્યવાહી શરૂ થતાં જ અદાણી મુદ્દે હોબાળો થયો હતો. વિપક્ષના નેતાઓએ સૂત્રોચ્ચાર કર્યા – દેશને લૂંટવાનું બંધ કરો. રાજ્યસભામાં પણ અદાણીનો મુદ્દો ઉઠાવવામાં આવ્યો હતો.

હોબાળો જોઈને અધ્યક્ષ જગદીપ ધનખડે કહ્યું- સંસદીય વિવાદ લોકશાહીને નબળી પાડે છે. આ પછી, બંને ગૃહોની કાર્યવાહી આખા દિવસ માટે સ્થગિત કરવામાં આવી હતી.

ગુરુવારે સંસદના શિયાળુ સત્રના ત્રીજા દિવસે પ્રિયંકા ગાંધી પહેલીવાર લોકસભા પહોંચ્યા હતા. તેમણે સાંસદ પદના શપથ લીધા હતા. આ દરમિયાન તેમના હાથમાં બંધારણની કોપી રાખી હતી. તેમની સાથે માતા સોનિયા અને રાહુલ ગાંધી પણ સંસદ પહોંચ્યા હતા. પ્રિયંકાએ વાયનાડ બેઠક પરથી પેટાચૂંટણી જીત્યા છે. પ્રિયંકાની સાથે નાંદેડથી પેટાચૂંટણી જીતનાર રવિન્દ્ર ચવ્હાણે પણ શપથ લીધા હતા.

રાહુલ ગાંધીએ સંસદની બહાર કહ્યું હતું કે અદાણી પર અમેરિકામાં 2 હજાર કરોડ રૂપિયાની લાંચ આપવાનો આરોપ છે. તેમને જેલમાં ધકેલવા જોઈએ. પણ મોદી સરકાર તેમને બચાવી રહી છે.

પ્રિયંકા ગાંધીએ સાંસદ પદના શપથ લીધા હતા. આ દરમિયાન તેમના હાથમાં બંધારણની કોપી રાખી હતી.

ગાંધી પરિવારના ત્રણ સભ્યો પહેલીવાર સંસદમાં

કેરળની વાયનાડ લોકસભા પેટાચૂંટણીમાં પ્રિયંકા ગાંધીની જીત બાદ, કોંગ્રેસ પાસે ફરી એકવાર લોકસભામાં 99 સાંસદો છે. વાયનાડ બેઠક રાહુલ ગાંધીએ ખાલી કરી હતી, જ્યારે નાંદેડ બેઠક કોંગ્રેસના સાંસદ બસંતરાવ ચૌહાણના નિધનને કારણે ખાલી પડી હતી. હાલમાં જ પેટાચૂંટણી યોજાઈ છે અને બંને બેઠકો કોંગ્રેસની પાસે પાછી આવી છે.

આ પહેલીવાર બનશે જ્યારે કોંગ્રેસ પાર્ટી સાથે જોડાયેલા ગાંધી પરિવારના ત્રણ સભ્યો એકસાથે સંસદના સભ્ય હશે. રાહુલ ગાંધી રાયબરેલીથી લોકસભાના સાંસદ છે અને પ્રિયંકા ગાંધી વાડ્રા વાયનાડથી છે. જ્યારે સોનિયા ગાંધી રાજસ્થાનથી રાજ્યસભાના સાંસદ છે.

અશ્વિની વૈષ્ણવે કહ્યું- અભદ્ર કન્ટેન્ટને રોકવા માટે કડક કાયદો બનાવવો જોઈએ

કેન્દ્રીય માહિતી અને પ્રસારણ મંત્રી અશ્વિની વૈષ્ણવે સોશિયલ મીડિયા પર અભદ્ર કન્ટેન્ટને રોકવા માટે કડક કાયદો બનાવવાની વાત કરી હતી. વૈષ્ણવે કહ્યું- જે દેશોમાંથી આવી સામગ્રી આવે છે તે દેશોની સંસ્કૃતિ આપણા કરતા તદ્દન અલગ છે. સંસદીય સ્થાયી સમિતિએ આ વિષય પર ધ્યાન આપવાની અને અભદ્ર સામગ્રીને રોકવા માટે કાયદો કડક બનાવવાની જરૂર છે.

તેમણે કહ્યું હતું કે સોશિયલ મીડિયાના જમાનામાં એડિટોરિયલ ચેકિંગ ખતમ થઈ ગયું છે. અગાઉ પ્રેસમાંથી જે પણ છાપવામાં આવતું હતું તે સાચું છે કે ખોટું તે તપાસવામાં આવતું હતું અને પછી તેને મીડિયા સમક્ષ લાવવામાં આવતું હતું.

તેમણે કહ્યું કે એડિટોરિયલ ચેકિંગ ખતમ થવાને કારણે, આજે સોશિયલ મીડિયા એક તરફ પ્રેસની સ્વતંત્રતાનું એક વિશાળ માધ્યમ બની ગયું છે, પરંતુ બીજી તરફ તે એક અનિયંત્રિત અભિવ્યક્તિ છે જેમાં અનેક પ્રકારની અભદ્ર સામગ્રી પોસ્ટ કરવામાં આવે છે. આ માટે હાલના કાયદાને વધુ કડક બનાવવાની જરૂર છે. આ માટે પણ સર્વસંમતિની જરૂર છે.

​​​​​​સત્રમાં કુલ 16 બિલ રજૂ કરવામાં આવશે, 11 પર ચર્ચા, 5 મંજૂરી માટે રજૂ કરવામાં આવશે

સંસદના શિયાળુ સત્ર દરમિયાન કુલ 16 બિલ રજૂ કરવામાં આવનાર છે. તેમાંથી 11 બિલ ચર્ચા માટે મૂકવામાં આવશે. જ્યારે 5 કાયદા બનવા માટે મંજૂરી માટે મૂકવામાં આવશે. વન નેશન વન ઇલેક્શન માટે પ્રસ્તાવિત બિલનો સેટ હજુ સુધી સૂચિનો ભાગ નથી, જોકે કેટલાક અહેવાલો કહે છે કે સરકાર તેને સત્રમાં લાવી શકે છે.

તેમજ, રાજ્યસભાના બુલેટિનમાં કહેવામાં આવ્યું છે કે લોકસભા દ્વારા પસાર કરાયેલ એક વધારાનું બિલ, ભારતીય એરક્રાફ્ટ બિલ, રાજ્યસભામાં મંજૂરી માટે પેન્ડિંગ છે.

​​​​​​હવે જાણો છેલ્લા સત્રની 4 મુખ્ય બાબતો…

ચોમાસુ સત્રમાં 12 બિલ રજૂ કરવામાં આવ્યા, માત્ર 4 જ પસાર થઈ શક્યા

18મી લોકસભાનું પ્રથમ ચોમાસુ સત્ર 22 જુલાઈથી 9 ઓગસ્ટ સુધી ચાલ્યું હતું. અંદાજે 115 કલાક સુધી ચાલેલા સમગ્ર સત્રમાં કુલ 15 બેઠકો યોજાઈ હતી. સત્ર દરમિયાન ગૃહની પ્રોડક્ટિવિટી 136% હતી. આ જ સત્રમાં નાણામંત્રી નિર્મલા સીતારમણે 23 જુલાઈએ 2024-2025 માટેનું બજેટ રજૂ કર્યું હતું. આ ચર્ચા કુલ 27 કલાક અને 19 મિનિટ સુધી ચાલી હતી, જેમાં 181 સભ્યોએ ભાગ લીધો હતો.