Related posts
નાગપુર37 મિનિટ પેહલા
- કૉપી લિંક
ઔરંગઝેબ મકબરાના વિવાદને લઈને સોમવારે રાત્રે 8:30 વાગ્યે નાગપુરના મહેલ વિસ્તારમાં હિંસા ફાટી નીકળી હતી. વિશ્વ હિન્દુ પરિષદ (VHP) એ મુઘલ સમ્રાટ ઔરંગઝેબના પુતળાનું દહન કરીને તેમની કબર તોડી પાડવાની માંગ કરી. આ પછી પથ્થરમારો અને તોડફોડ શરૂ થઈ ગઈ.
તોફાનીઓએ ઘરો પર પથ્થરમારો કર્યો અને રસ્તાની બાજુમાં આવેલા વાહનોને આગ ચાંપી દીધી. પોલીસ પર પણ હુમલો થયો. કુહાડીથી હુમલામાં ડીસીપી નિકેતન કદમ ઘાયલ થયા. પરિસ્થિતિને કાબુમાં લેવા માટે ટીયર ગેસના શેલ છોડવામાં આવ્યા હતા અને 55થી વધુ લોકોને કસ્ટડીમાં લેવામાં આવ્યા.
પોલીસ કમિશનર રવિન્દ્ર સિંઘલે જણાવ્યું હતું કે શહેરમાં BNSની કલમ 163 (IPCની કલમ 144ની જેમ) લાગુ કરવામાં આવી છે. તે જ સમયે, મીડિયા રિપોર્ટ્સ અનુસાર, શાંતિ પુનઃસ્થાપિત કરવા માટે 20 પોલીસ ટીમો બનાવવામાં આવી છે.
બીજી તરફ, મુખ્યમંત્રી દેવેન્દ્ર ફડણવીસે મોડી રાત્રે રાજ્ય ભાજપ પ્રમુખ અને કેબિનેટ મંત્રી ચંદ્રશેખર બાવનકુલે સાથે બેઠક યોજી હતી. આ પછી બાવનકુલે નાગપુર જવા રવાના થયા. મુખ્યમંત્રીએ તેમને ઘટનાનો અહેવાલ રજૂ કરવા કહ્યું છે.
બાવનકુલે નાગપુરના ગાર્ડિયન મિનિસ્ટર છે. દરમિયાન, મુખ્યમંત્રી દેવેન્દ્ર ફડણવીસ નાગપુર દક્ષિણ-પશ્ચિમ બેઠકના ધારાસભ્ય છે. તે જ સમયે, છત્રપતિ સંભાજીનગરમાં ઔરંગઝેબના મકબરા પર સુરક્ષા વધારી દેવામાં આવી છે. એસપીએ જણાવ્યું હતું કે જિલ્લામાં એક કંપની અને SRPFની બે પ્લાટૂન તૈનાત કરવામાં આવી છે.
હિંસા સંબંધિત તસવીરો…
કારમાં લાગેલી આગ ઓલવવાનો પ્રયાસ કરી રહેલા લોકો.
પોલીસના જણાવ્યા અનુસાર, ટોળાએ બે જેસીબીને આગ ચાંપી દીધી હતી.
10થી વધુ વાહનોને નુકસાન થયું છે.
કેટલાક લોકોએ ઘરની અંદર પથ્થરમારો કર્યો. વાહનોને નુકસાન પહોંચાડ્યું
મહલ વિસ્તારમાં રસ્તાની બાજુમાં પાર્ક કરેલા વાહનોના કાચ તોડ્યા.
આ વિસ્તારમાં મોટી સંખ્યામાં પોલીસ દળ તૈનાત છે.
પ્રત્યક્ષદર્શીઓએ કહ્યું – તોફાનીઓ ચહેરા ઢાંકીને આવ્યા હતા પ્રત્યક્ષદર્શીઓએ જણાવ્યું કે તોફાનીઓએ પોતાના ચહેરા ઢાંકેલા હતા. તેમના હાથમાં તલવારો, લાકડીઓ અને બોટલો હતી. અચાનક બધાએ હોબાળો મચાવ્યો. ઘરો પર પથ્થરમારો શરૂ કર્યો. દુકાનોમાં તોડફોડ કરવામાં આવી. આ પછી તેઓએ વાહનોના કાચ તોડવાનું શરૂ કર્યું અને તેમને આગ લગાવી દીધી.
મુંબઈના મુસ્લિમ બહુમતીવાળા વિસ્તારોમાં સુરક્ષા વધારી દેવાઈ હિંસા બાદ, શહેરના ગણેશપેઠ, લાકડાગંજ, પચપૌલી, શાંતિ નગર, સક્કરદરા, નંદનવન, ઇમામવાડા, યશોધરા નગર અને કપિલ નગર વિસ્તારોમાં કર્ફ્યુ લાદવામાં આવ્યો છે. આ ઉપરાંત મુંબઈમાં પોલીસ સુરક્ષા પણ વધારી દેવામાં આવી છે.
મુસ્લિમ બહુમતી ધરાવતા વિસ્તારોમાં માલવાણી, ભીંડી બજાર, કુર્લા, શિવાજી નગર-માનખુર્દ અને એન્ટોપહિલ જેવા વિસ્તારોમાં સ્થાનિક પોલીસને એલર્ટ કરવામાં આવી હતી. મુંબઈ પોલીસે વિવિધ ક્ષેત્રોના તમામ ધર્મોના અગ્રણી લોકોનો પણ સંપર્ક કર્યો છે અને તેમને કોઈપણ પ્રકારની અફવાઓ પર વિશ્વાસ ન કરવા અપીલ કરી છે.
ટી રાજાએ પણ કબર હટાવવાની માગ કરી
તેલંગાણાના ગોશામહલના ભાજપ ધારાસભ્ય અને હિન્દુ નેતા ટી રાજા સિંહે પણ કબરને દૂર કરવાની માગ કરી છે. તેમણે કહ્યું- હું VHP અને બજરંગ દળની માગણીઓનું સમર્થન કરું છું.
આ પહેલાં ટી રાજા સિંહે 15 માર્ચે કેન્દ્રીય મંત્રી ગજેન્દ્રસિંહ શેખાવતને પત્ર લખ્યો હતો. તેમણે છત્રપતિ સંભાજીનગર ખાતેની મુઘલ સમ્રાટ ઔરંગઝેબના મકબરાના જાળવણી માટે ભારતીય પુરાતત્ત્વ સર્વેક્ષણ (ASI) દ્વારા ફાળવવામાં આવેલા અને ખર્ચવામાં આવેલા ભંડોળની વિગતો માગી છે.
તેમણે કહ્યું હતું કે હિન્દુ રાજાઓને મારનારા, મંદિરોનો નાશ કરનારા અને આપણી સંસ્કૃતિ પર દમન કરનારા ઔરંગઝેબની કબર પર સરકારી ખર્ચનું શું વાજબીપણું છે? આપણા પૂર્વજોને આટલી બધી તકલીફો આપનારા સરમુખત્યારની કબરની જાળવણી માટે લોકોના રૂપિયાનો એકપણ પૈસો ખર્ચવો જોઈએ નહીં. આ તાત્કાલિક બંધ થવું જોઈએ.
રાઉતે કહ્યું- આ મરાઠાઓની બહાદુરીનું સ્મારક શિવસેના ઉદ્ધવ જૂથના નેતા સંજય રાઉતે ગંભીર વિવાદ પર ભાજપના નેતાઓ પર નિશાન સાધ્યું. તેમણે કહ્યું- ઔરંગઝેબની કબર મરાઠાઓની બહાદુરીનું સ્મારક છે. આ આવનારી પેઢીઓને કહેશે કે શિવાજી મહારાજ અને મરાઠા સૈનિકોએ આક્રમણકારો સામે કેવી રીતે લડ્યા.
બજરંગ દળના નેતાએ કહ્યું- બાબરી મસ્જિદ જેવા જ હાલ થશે શનિવારે બજરંગ દળના નેતા નીતિન મહાજને સંભાજીનગરમાં ઔરંગઝેબની કબરને હટાવવાની માગ કરી હતી. તેમણે કહ્યું હતું કે જો સરકાર આમ કરવામાં નિષ્ફળ જાય તો ઔરંગઝેબની કબરની હાલત પણ બાબરી મસ્જિદ જેવી જ થશે.
મહાજને કહ્યું – ઔરંગઝેબની કબર પર નમાજ અદા થઈ રહી છે. સંભાજીના હત્યારાની કબર છે. જ્યારે આવી કબરોની ઇબાદત કરવામાં આવે છે ત્યારે સમાજનો પણ એ જ રીતે વિકાસ થાય છે. એ સમયે આપણે લાચાર હતા, પરંતુ હવે વિશ્વ હિન્દુ પરિષદ અને બજરંગ દળ માગ કરી રહ્યાં છે કે કબરને હટાવવામાં આવે.
અમે જાણીએ છીએ કે જ્યારે હિન્દુ સમુદાય પોતાના અસ્તિત્વ માટે વિરોધ કરે છે ત્યારે શું થાય છે. આપણે બધાએ જોયું કે અયોધ્યામાં બાબરી ઢાંચાને હટાવવા માટે શું થયું. જો સરકાર કબર નહીં હટાવે તો અમે એને હટાવીશું.
પોલીસે કડક સુરક્ષા વ્યવસ્થા કરી ઔરંગઝેબની કબરના વિસ્તારમાં પોલીસે સઘન સુરક્ષા વ્યવસ્થા કરી છે. વિવિધ સ્થળોએ બેરિકેડ્સ લગાવવામાં આવ્યાં છે. એવી વ્યવસ્થા કરવામાં આવી છે કે ત્યાં ફક્ત એક જ વ્યક્તિ પ્રવેશ કરી શકે. પોલીસે ઔરંગઝેબની કબરનો મુખ્ય દરવાજો બંધ કરી દીધો છે. ઔરંગઝેબની કબર પાસે જવા પર પણ પ્રતિબંધ મૂકવામાં આવ્યો છે.
કોંગ્રેસે કહ્યું- કબર હટાવીને શું મળશે? મહારાષ્ટ્રમાં કોંગ્રેસના ધારાસભ્ય વિજય વાડેટ્ટીવારે કહ્યું – બજરંગ દળ અને વીએચપી પાસે કરવા માટે કંઈ બાકી રહ્યું નથી. તેઓ નથી ઇચ્છતા કે મહારાષ્ટ્રના લોકો શાંતિથી રહે. તેઓ રાજ્યના વિકાસની ગતિ ધીમી કરવા માગે છે. હું તેમને કહેવા માગું છું કે ઔરંગઝેબ અહીં 27 વર્ષ રહ્યો, હવે તેની કબર હટાવીને તેમને શું મળશે?
VHP બજરંગ દળે ઔરંગઝેબની કબર હટાવવાની માગ કરી હતી
મહારાષ્ટ્રના છત્રપતિ સંભાજીનગર (પહેલાં ઔરંગાબાદ)માં આવેલી ઔરંગઝેબની કબરને દૂર કરવાનો મુદ્દો જોર પકડી રહ્યો છે. બજરંગ દળ અને વિશ્વ હિન્દુ પરિષદ (VHP)એ મહારાષ્ટ્ર સરકારને એને દૂર કરવાની માગ કરી છે. વિવાદ વચ્ચે કબર પર સુરક્ષા વધારી દેવામાં આવી છે.
વિશ્વ હિન્દુ પરિષદ (VHP)ના મહારાષ્ટ્ર અને ગોવાના પ્રાદેશિક મંત્રી ગોવિંદ શેંડેએ ઔરંગઝેબની કબરને ગુલામીનું પ્રતીક ગણાવ્યું. તેમણે સોમવારે કહ્યું- ઔરંગઝેબે છત્રપતિ સંભાજી મહારાજને મારતાં પહેલાં 40 દિવસ સુધી ત્રાસ આપ્યો. આવા ક્રૂર શાસકની છાપ શા માટે રહે.
બીજી તરફ, મહારાષ્ટ્રના મુખ્યમંત્રી દેવેન્દ્ર ફડણવીસે એક કાર્યક્રમમાં કહ્યું હતું કે ક્રૂર ઔરંગઝેબના બર્બર વિચારોને મહિમા આપનારાઓ સામે કડક કાનૂની કાર્યવાહી કરવામાં આવશે. એ વિચાર ત્યાં જ કચડી નાખવામાં આવશે.
મહારાષ્ટ્રભરમાં હિન્દુ સંગઠનો વિરોધ કરી રહ્યાં છે સોમવારે બજરંગ દળ અને વિશ્વ હિન્દુ પરિષદ (VHP) ઔરંગઝેબની કબરને દૂર કરવાની માગણી સાથે સમગ્ર મહારાષ્ટ્રમાં વિરોધપ્રદર્શન કરી રહ્યાં છે. આ સમય દરમિયાન મુઘલ આક્રમણકારોનાં પૂતળાંનું પણ દહન કરવામાં આવી રહ્યું છે.
નાગપુરમાં પણ બજરંગ દળે છત્રપતિ શિવાજી મહારાજની પ્રતિમા સામે વિરોધ પ્રદર્શન કર્યું હતું.
1707માં ઔરંગઝેબની કબર બની હતી
મુઘલ સમ્રાટ ઔરંગઝેબની કબર મહારાષ્ટ્રના ખુલદાબાદમાં છે. ઇતિહાસકારોના મતે, 1707માં જ્યારે ઔરંગઝેબનું નિધન થયું ત્યારે તેની ઇચ્છા મુજબ તેને ખુલદાબાદમાં તેના આધ્યાત્મિક ગુરુ શેખ ઝૈનુદ્દીનની દરગાહ પાસે દફનાવવામાં આવ્યો. આ સ્થળ સંભાજીનગરથી લગભગ 25 કિમી દૂર આવેલું છે.
ઔરંગઝેબની કબર એક સાદો માટીનો મકબરો હતો, જેને પાછળથી બ્રિટિશ અધિકારી લોર્ડ કર્ઝન દ્વારા આરસપહાણથી સજાવાયો હતો. આ સ્થળ ઐતિહાસિક અને ધાર્મિક રીતે મહત્ત્વપૂર્ણ માનવામાં આવે છે, જ્યાં આજે પણ લોકો શ્રદ્ધાંજલિ આપવા આવે છે.
