દિવ્યા ભારતીનું મોત હજુ પણ રહસ્ય જ છે: માતાનો દાવો – ‘તે પોતાને નુકસાન પહોંચાડતી હતી, તેના પતિનું નામ અંડરવર્લ્ડ સાથે જોડાયેલું હતું અને તે ડિપ્રેશનમાં હતી’

બોલિવૂડની ગુડિયા તરીકે જાણીતી અભિનેત્રી દિવ્યા ભારતીની આજે 50મી જન્મજયંતી છે. 19 વર્ષની ઉંમરે 21 ફિલ્મો કરનાર દિવ્યાની ગણતરી બોલિવૂડની ટોચની અભિનેત્રીઓમાં થવા લાગી હતી. તેણે 18 વર્ષની ઉંમરે લગ્ન કરીને બધાને ચોંકાવી દીધા હતા, પરંતુ 1993માં એક અકસ્માતમાં તેનું મૃત્યુ થયું હતું.

તેના મૃત્યુને લઈને ઘણી થિયરીઓ સામે આવી. કોઈએ તેના મૃત્યુને હત્યા અને કોઈએ આત્મહત્યા ગણાવી, જો કે, આજે પણ આ રહસ્ય ઉકેલાયું નથી.

આજે દિવ્યાની જન્મજયંતી પર, તેના જીવન અને મૃત્યુ સાથે જોડાયેલી વાતો વાંચો…

એક વ્યક્તિએ દિવ્યાને નકલી ઢીંગલી સમજી લીધી
દિવ્યા ભારતીનો જન્મ 25 ફેબ્રુઆરી, 1974ના રોજ મુંબઈમાં ઓમ પ્રકાશ ભારતી અને મીતા ભારતીના ઘરે થયો હતો. દિવ્યાને એક ભાઈ કુણાલ અને સાવકી બહેન પૂનમ હતી. પૂનમનો જન્મ તેના પિતાની પ્રથમ પત્નીથી થયો હતો. દિવ્યા નાનપણથી જ એટલી બબલી હતી કે તે બધા બાળકોથી અલગ હતી.

તે બિલકુલ ઢીંગલી જેવી દેખાતી હતી. એકવાર વાસ્તવમાં, એક વ્યક્તિએ તેને ઢીંગલી સમજી લીધી હતી. ખરેખર, એકવાર તેની માતાએ દિવ્યાને કારના બોનેટ પર બેસાડીને કારમાં વસ્તુઓ રાખવાનું શરૂ કર્યું. ત્યારે ત્યાંથી પસાર થતા એક વ્યક્તિએ પૂછ્યું કે તે બોનેટ પર બેઠેલી ઢીંગલી ક્યાંથી લઈ આવ્યા છો?. ત્યારે તેની માતાએ હસીને જવાબ આપ્યો કે તે ગુડિયા(ઢીંગલી) નહીં પરંતુ તેની પુત્રી દિવ્યા છે.

તે અભ્યાસમાં નબળી હતી, તેથી જ તે ફિલ્મો માટે સંમત થઈ હતી
અભ્યાસની વાત કરીએ તો દિવ્યા તેમાં સાવ નબળી હતી. કોઈક રીતે તે પાસ થવામાં સફળ રહી. અભ્યાસમાં નબળાઈ જ એક મોટું કારણ હતું કે તેણે અભ્યાસ છોડીને અભિનયમાં આવવાનું નક્કી કર્યું. જો કે, હિન્દી, મરાઠી અને અંગ્રેજી ભાષાઓ પર તેનું પ્રભુત્વ ઘણું સારું હતું.

ફિલ્મોની ઓફર મળી, પણ પછી પાછી ખેંચી લીધી
1988માં, જ્યારે દિવ્યા 14 વર્ષની હતી, ત્યારે ફિલ્મનિર્માતા નંદુ તોલાનીએ તેને ફિલ્મ ‘ગુનાહોં કે દેવતા’ ઓફર કરી હતી. આ ફિલ્મથી તે ફિલ્મોમાં આવવાની હતી, પરંતુ તેના પિતાએ તેની નાની ઉંમરનું કારણ ધરીને ના પાડી દીધી. બાદમાં તેની જગ્યાએ સંગીતા બિજલાનીને કાસ્ટ કરવામાં આવી હતી.

આને થોડા દિવસો જ પસાર થયા હતા જ્યારે એક દિવસ ગોવિંદાના ભાઈ કીર્તિ કુમારે દિવ્યાને વીડિયો લાઈબ્રેરીમાં જોઈ. દિવ્યાને જોતાંની સાથે જ તે તેની સુંદરતા પર મોહિત થઈ ગયો. ત્યારપછી કીર્તિ કુમારે ‘રાધા કા સંગમ’ ફિલ્મમાં ગોવિંદાની સામે તેને કાસ્ટ કરવાનું નક્કી કર્યું.

અભ્યાસમાંથી છુટકારો મેળવવા દિવ્યાએ તેના પરિવારને મનાવીને ફિલ્મ સાઈન કરી હતી. આ માટે તેણે મહિનાઓ સુધી ડાન્સ અને એક્ટિંગના ક્લાસ પણ લીધા, પરંતુ છેલ્લી ઘડીએ તેની જગ્યાએ જુહી ચાવલાને સાઈન કરવામાં આવી.

તેને ફિલ્મમાંથી હટાવવા અંગે ઘણી અટકળો ચાલી રહી હતી. કેટલાકે કહ્યું કે ફિલ્મના દિગ્દર્શક નવોદિત પર જોખમ લેવા માંગતા ન હતા. કેટલાકે એમ પણ કહ્યું કે દિવ્યા અને ગોવિંદાએ અફેર શરૂ કર્યું હતું અને કીર્તિ કુમારને આ બિલકુલ પસંદ નહોતું.

તે તેની પહેલી જ ફિલ્મથી ટોલિવૂડમાં ફેમસ થઈ ગઈ હતી
1990માં ડી. રામાનાયડુ તેમના પુત્ર વેંકટેશ સાથે ફિલ્મ ‘બોબલી રાજા’ બનાવી રહ્યા હતા. આ તે ફિલ્મ હતી જેના દ્વારા દિવ્યા ભારતીએ અભિનયની દુનિયામાં પ્રવેશ કર્યો હતો. તે એક હિટ ફિલ્મ હતી અને હજુ પણ તેલુગુની સૌથી આઇકોનિક ફિલ્મોમાંની એક છે. આ ફિલ્મની 3.5 કરોડ ટિકિટ વેચાઈ હતી. આ પછી દિવ્યા ઘણી શાનદાર ફિલ્મોમાં જોવા મળી.

સ્ટારડમ એટલો વધી રહ્યો હતો કે તેનું નામ ટોચની તેલુગુ અભિનેત્રીઓની યાદીમાં સામેલ થઈ ગયું. 1991 એ વર્ષ હતું જ્યારે દિવ્યાની સરખામણી દક્ષિણ બોક્સ ઓફિસ પર પ્રખ્યાત અભિનેત્રી વિજયા શાંતિ સાથે થવા લાગી હતી. ટોલિવૂડમાં દિવ્યાનો ક્રેઝ એટલો વધી ગયો હતો કે, ઘરની બહાર ડિરેક્ટર અને પ્રોડ્યુસરની લાઈન લાગતી હતી.

1992માં બોલિવૂડમાં ડેબ્યૂ કર્યું હતું
સાઉથની ફિલ્મોમાં દિવ્યાની જોરદાર એક્ટિંગ જોઈને બોલિવૂડના ફિલ્મમેકર્સ પણ તેનો સંપર્ક કરવા લાગ્યા. આ પછી તેણે 1992માં રિલીઝ થયેલી ફિલ્મ વિશ્વાત્માથી બોલિવૂડમાં એન્ટ્રી કરી હતી. આ ફિલ્મ સુપરહિટ રહી હતી અને હિન્દી દર્શકોએ પણ આ ફિલ્મથી દિવ્યાને સ્વીકારી હતી.

આ ફિલ્મ રિલીઝ થયાના એક અઠવાડિયા પછી જ દિવ્યાની બીજી ફિલ્મ ‘દિલ કા ક્યા કસૂર’ રિલીઝ થઈ. જોકે તે ફ્લોપ રહી હતી. તે જ વર્ષે, દિવ્યા ગોવિંદા સાથે ડેવિડ ધવનની ફિલ્મ ‘શોલા ઔર શબનમ’માં જોવા મળી હતી. દિવ્યાની આ પહેલી મોટી હિટ ફિલ્મ હતી. આ પછી 1992માં જ દિવ્યા ‘દિવાના’, ‘જાન સે પ્યારા’, ‘દિલ આશના હૈ’, ‘બલવાન’, ‘દિલ હી તો હૈ’, ‘દુશ્મન જમાના’, ‘ગીત’ જેવી 10 ફિલ્મોમાં જોવા મળી હતી.

પરિવારને જાણ કર્યા વગર 18 વર્ષની ઉંમરે દુલ્હન બની
‘શોલા ઔર શબનમ ફિલ્મના સેટ પર દિવ્યાના અંગત જીવનમાં એક મોટો વળાંક આવ્યો. આ ફિલ્મના સેટ પર યુવા નિર્માતા સાજિદ નડિયાદવાલા ગોવિંદાને મળવા આવ્યા હતા. ત્યારબાદ તેની નજર દિવ્યા ભારતી પર પડી, જેની સાથે તેને પહેલી નજરમાં પ્રેમ થઈ ગયો. કોઈ પણ સમય બગાડ્યા વિના સાજિદે દિવ્યાને લગ્ન માટે પ્રપોઝ કર્યું. તેણે પણ સાજીદના આ પ્રસ્તાવને ખુશીથી સ્વીકારી લીધો.

દિવ્યાને ડર હતો કે તેના માતા-પિતા આ સંબંધ માટે સંમત નહીં થાય. આવી સ્થિતિમાં, બંનેએ 10 મે, 1992ના રોજ કેટલાક મિત્રોની હાજરીમાં ઘરે લગ્ન કર્યા. મુંબઈની તુલસી બિલ્ડિંગમાં યોજાયેલા આ લગ્નમાં માત્ર દિવ્યાના હેરડ્રેસર, મિત્ર સંધ્યા, સંધ્યાના પતિ, કાઝીએ હાજરી આપી હતી. સાજિદ સાથે લગ્ન કરતા પહેલા દિવ્યાએ ઈસ્લામ અંગીકાર કર્યો અને પોતાનું નામ બદલીને ‘સના’ રાખ્યું.

1993 સુધીમાં, 21 ફિલ્મો કર્યા પછી, દિવ્યાની ગણતરી બોલિવૂડની ટોચની અભિનેત્રીઓમાં થવા લાગી હતી, પરંતુ નસીબે બીજું કંઈક નક્કી કરી રાખ્યું હતું. દિવ્યાએ 5 એપ્રિલ, 1993ના રોજ આ દુનિયા છોડી દીધી હતી.

હવે ચાલો જાણીએ તેના મૃત્યુ સાથે જોડાયેલી વાતો…

5 એપ્રિલ, 1993ના રોજ, દિવ્યા બપોરે હૈદરાબાદથી મુંબઈ પરત આવી અને તે જ દિવસે તેણે ફ્લેટનો સોદો ફાઈનલ કર્યો. આ ડીલથી તે ખૂબ જ ખુશ હતી કારણ કે તે સમયે તે વર્સોવાના તુલસી એપાર્ટમેન્ટના પાંચમા માળે ભાડાના ફ્લેટમાં રહેતી હતી, જે તેને તેના પતિ સાજિદ નડિયાદવાલાએ અપાવ્યો હતો.

તે ખૂબ જ ખુશ હતી કારણ કે ઘરનો સોદો થઈ ગયો હતો, તેથી તેણે શૂટિંગ બીજા દિવસે મુલતવી રાખ્યું. પછી અચાનક સાંજે તેને ફેશન ડિઝાઇનર નીતા લુલ્લાનો ફોન આવ્યો કે તે ફિલ્મ ‘આંદોલન’ માટે ડ્રેસ ફાઇનલ કરવા માટે તેને મળવા માંગે છે. દિવ્યા અને નીતા ખૂબ સારા મિત્રો હતા અને તેણે ઘણી ફિલ્મોમાં દિવ્યાના ડ્રેસ ડિઝાઇન કર્યા હતા.

સાંજે નીતા તેના પતિ શ્યામ લુલ્લા સાથે દિવ્યાના ઘરે આવી હતી. આ પછી દિવ્યા, નીતા અને તેના પતિ શ્યામ ડ્રોઈંગ રૂમમાં બેઠા અને ડ્રેસ ફાઈનલ કરવા લાગ્યા. રસોડામાં નોકરાણી અમૃતા, જે દિવ્યાને બાળપણથી ઓળખતી હતી, તે મહેમાનો માટે ભોજનની વ્યવસ્થા કરતી હતી.

અહીં ત્રણેય ડ્રોઈંગ રૂમમાં બેસીને દારૂ પી રહ્યા હતા. થોડી જ વારમાં રાતના 11 વાગી ગયા. ત્યારપછી દિવ્યા ઊભી થઈને રસોડામાં ગઈ અને 12 ઈંચની બારી પર બેસવાનો પ્રયત્ન કરવા લાગી. ત્યારે અચાનક તે પાંચમા માળેથી પડી ગઈ હતી. તે પડતાં જ તેની નોકરાણી જોરથી ચીસો પાડવા લાગી, પછી ડ્રોઈંગરૂમમાં બેઠેલા નીતા અને શ્યામ પણ નીચે દોડી આવ્યા. આ પછી દિવ્યાને નજીકની કૂપર હોસ્પિટલમાં લઈ જવામાં આવી હતી. હોસ્પિટલમાં લઈ જવામાં આવી ત્યારે તે જીવતી હતી, પરંતુ ત્યાં પહોંચતા જ તેને મૃત જાહેર કરવામાં આવી હતી.

એ પણ નોંધનીય છે કે તે બારી પર કોઈ ગ્રીલ ન હતી. બારીની નીચે પાર્કિંગ લૉન હતું, જ્યાં દરરોજ કાર પાર્ક થતી હતી, પરંતુ તે દિવસે એક પણ કાર પાર્ક થઈ ન હતી.

જ્યારે દિવ્યાનું અવસાન થયું ત્યારે તે સૌથી વધુ કમાણી કરતી અભિનેત્રીઓમાંની એક હતી

પોસ્ટમોર્ટમ રિપોર્ટમાં મૃત્યુ અકસ્માત હતો
દિવ્યાના મૃત્યુના સમાચાર આખા ફિલ્મ ઈન્ડસ્ટ્રીમાં ફેલાઈ ગયા. કેટલાક લોકોએ તેને આત્મહત્યા કહેવાનું શરૂ કર્યું તો કેટલાક લોકોએ તેને હત્યા ગણાવી. મૃત્યુ બાદ આ કેસની સમગ્ર તપાસ વર્સોવા પોલીસ સ્ટેશનના અધિકારીઓએ કરી હતી. પોસ્ટમોર્ટમ રિપોર્ટમાં દાવો કરવામાં આવ્યો હતો કે દિવ્યાનું મૃત્યુ માત્ર એક અકસ્માત હતો. તેણે ખૂબ જ દારૂ પીધો હતો જેના કારણે તે પોતાની જાત પર કાબૂ રાખી શકી ન હતી અને બારીમાંથી પડી ગઈ હતી. દિવ્યાના અંતિમ સંસ્કાર 7 એપ્રિલ, 1993ના રોજ મુંબઈના વિલે પાર્લેમાં થયા હતા.

દાવો- પતિનું નામ અંડરવર્લ્ડ સાથે જોડાવાને કારણે તે ડિપ્રેશનમાં હતી
ઘણા લોકોએ દાવો કર્યો હતો કે, દિવ્યા ઘણા સમયથી ડિપ્રેશનમાં હતી. કારણ એ હતું કે તેના પતિ સાજિદનું નામ અંડરવર્લ્ડ સાથે જોડવામાં આવી રહ્યું હતું, જેના કારણે તે ખૂબ જ ચિંતિત હતી. લગ્ન પછી તેના સાસુ-સસરા સાથેના સંબંધો પણ બહુ સારા નહોતા અને તેનાથી તે ખૂબ જ દુઃખી હતી.

એવું પણ કહેવામાં આવી રહ્યું હતું કે, જો તેણીએ આત્મહત્યા કરવી જ હતી, તો તે જ દિવસે ઘરનો સોદો શા માટે ફાઇનલ કર્યો હોત. તેના ભાઈ અને નોકરાણીએ જણાવ્યું હતું કે તેના મૃત્યુની સવારથી તે ખૂબ જ ખુશ હતી.

એવા પુરાવા જેનાથી હત્યાની શંકા પણ જન્મી
ફિલ્મ ઈન્ડસ્ટ્રીના કેટલાક લોકોએ એમ પણ કહ્યું કે, દિવ્યાની હત્યા થઈ છે. જ્યારે આ એંગલથી કેસની તપાસ કરવામાં આવી ત્યારે જાણવા મળ્યું કે, જે બારીમાંથી પડીને તેનું મૃત્યુ થયું હતું તેમાં ઓટો સ્ટોપર્સ લગાવવામાં આવ્યા ન હતા. જ્યારે તે બિલ્ડીંગની તમામ બારીઓમાં ઓટો-સ્ટોપર્સ લગાવેલાં હતાં.

5 વર્ષ પછી આવ્યો નિર્ણય, મૃત્યુને અકસ્માત જાહેર કર્યો
આ પછી પોલીસે 5 વર્ષ સુધી તપાસ ચાલુ રાખી. ફિલ્મ ઈન્ડસ્ટ્રીના ઘણા લોકોની પૂછપરછ કરવામાં આવી હતી. દિવ્યાનો પતિ સાજિદ નડિયાદવાલા સૌથી વધુ શંકાના દાયરામાં રહ્યો હતો. પછી 1998 માં, સત્તાવાર રીતે પુષ્ટિ કરવામાં આવી કે દિવ્યાનું મૃત્યુ માત્ર એક અકસ્માત હતું. પોલીસે શંકાના ઘેરામાં રહેલા તમામ લોકોને ક્લીનચીટ આપી હતી.

મૃત્યુ પહેલા તેણે પોતાની જાતને સિગારેટથી ડામ દીધા હતા અને એક વખત પોતાના હાથ પર કાપા માર્યા હતા.
દિવ્યાના મૃત્યુ બાદ તેની માતાએ ખુલાસો કર્યો હતો કે, દિવ્યા ગુસ્સામાં પોતાને ઇજા પહોંચાડતી હતી. મૃત્યુ પહેલા પણ તેણે સિગારેટથી પોતાની જાતને ડામ દીધા હતા. મૃત્યુના થોડા મહિના પહેલા તે અમેરિકા ગઈ હતી. ત્યાં, કોઈ મુદ્દે નારાજ થઈને, તેણે સિગારેટના બૂટ્સથી પોતાની જાતને ડામ આપ્યા હતા. તે નિશાન તેમના મૃત્યુ સમયે પણ હતા.

તેમજ ફિલ્મ ‘રાધા કા સંગમ’ દરમિયાન કેટલાક અપસેટના કારણે તેણે પોતાના કાંડા પર કાપા માર્યા હતા.

‘દીવાના’ ફિલ્મનું આ દૃશ્ય છે. આ ફિલ્મમાં દિવ્યાએ શાહરુખ ખાન સાથે કામ કર્યું હતું. દિવ્યાને 1993માં ફિલ્મ ‘દીવાના’ માટે ફિલ્મફેર એવોર્ડ મળ્યો હતો

દિવ્યાના મૃત્યુના એક મહિના પછી નોકરાણીનું પણ મૃત્યુ થયું હતું
એ પણ નોંધનીય છે કે, જ્યારે દિવ્યા બારીમાંથી પડી ત્યારે માત્ર તેની નોકરાણીએ તેને જોઈ હતી. તેમના મૃત્યુના એક મહિના પછી, નોકરાણીનું પણ હૃદયરોગના હુમલાથી મૃત્યુ થયું.

દિવ્યા તેના મૃત્યુ પછી લોકોના સપનામાં દેખાતી રહી
દિવ્યાની માતા મીતાએ કહ્યું હતું- ‘દિવ્યા મારા સપનામાં ઘણી વાર આવતી હતી. જે દિવસે મારે વહેલા ઉઠવાનું થતું ત્યારે દિવ્યા મારા સપનામાં આવતી અને મને જગાડતી. તેણે જણાવ્યું કે સાજિદની બીજી પત્ની વર્ધાએ પણ ઘણી વખત દિવ્યા સપનામાં આવવા વિશે જણાવ્યું હતું. લગ્નના છ વર્ષ પછી તેને દિવ્યા સપનામાં આવતી બંધ થઈ ગઈ હતી.

વર્ધાએ એકવાર કહ્યું હતું કે દિવ્યાએ જ તેને અને સાજિદને મળવાની વ્યવસ્થા કરી હતી. તેમજ આજે પણ સાજીદના વોલેટમાં દિવ્યાની તસવીર મોજુદ છે.

દિવ્યાના મૃત્યુ બાદ બની આશ્ચર્યજનક ઘટના, શ્રીદેવીએ પણ તેમની જેમ કામ કરવાનું શરૂ કર્યું.
અગાઉ દિવ્યા ‘લાડલા’ ફિલ્મમાં લીડ રોલમાં હતી, પરંતુ તેના મૃત્યુ બાદ શ્રીદેવીને ફિલ્મમાં લેવામાં આવી હતી. એક દિવસ શૂટિંગ દરમિયાન બનેલી એક ઘટનાથી સેટ પર હાજર લોકો ડરી ગયા હતા. ખરેખર, શ્રીદેવી એ જ જગ્યાએ શૂટિંગ કરી રહી હતી જ્યાં દિવ્યા શૂટિંગ કરતી હતી. એક સીન દરમિયાન શ્રીદેવી એ જ લાઈનમાં વારંવાર અટવાઈ જતી હતી જેના પર દિવ્યા પણ અટવાઈ જતી હતી. આ સીનમાં શક્તિ કપૂર અને રવિના ટંડન પણ હતા. તે સમયે શ્રીદેવીને પોતાની લાઈન ભૂલી જતા જોઈને બધા ગભરાઈ ગયા હતા.

આ પછી ત્યાં ગાયત્રી મંત્રનો પાઠ કરવામાં આવ્યો હતો. ત્યારબાદ શ્રીદેવીએ અટક્યા વિના શૂટિંગ પૂરું કર્યું અને ફિલ્મ રિલીઝ થઈ. ‘લાડલા’ ફિલ્મ બોક્સ ઓફિસ પર હિટ સાબિત થઈ હતી.