લંડન3 કલાક પેહલા
- કૉપી લિંક
બ્રિટનના ન્યૂઝપેપર ‘ધ ડેલી ટેલિગ્રાફ’નાં એક રિપોર્ટ પ્રમાણે દેશમાં વધતા કટ્ટરપંથથી પરેશાન ઋષિ સુનકે હવે તેને અંકુશમાં લેવા માટે એક પ્લાન તૈયાર કર્યો છે. જેના હેઠળ અફઘાનિસ્તાન, પાકિસ્તાન અને ઇન્ડોનેશિયાના કટ્ટરપંથી ઇસ્લામી ધર્મગુરુ બ્રિટન જઈ શકશે નહીં.
તેમના માટે વિઝા વોર્નિંગ લિસ્ટ તૈયાર કરવામાં આવી રહી છે. નવા પ્લાન પ્રમાણે, આ લિસ્ટમાં જે પણ નામ સામેલ થશે તેમને બ્રિટનમાં એન્ટ્રી મળશે નહીં. તેમના માટે ઓટોમેટિક એન્ટ્રી બેન પ્રોગ્રામ તૈયાર કરી લેવામાં આવ્યો છે.
ઇઝરાયલ-હમાસના યુદ્ધ શરૂ થયા બાદ બ્રિટનમાં પેલેસ્ટાઇનના સમર્થનમાં અનેક પ્રદર્શન થયા. પોલીસ-પ્રદર્શનકારીઓમાં ઘર્ષણ થયું. બ્રિટિશ સાંસદોને ખુલ્લેઆમ ધમકી આપવામાં આવી હતી.
લંડનમાં 21 જાન્યુઆરીએ થયેલાં ઇઝરાયલ વિરોધી પ્રદર્શન દરમિયાન પોલીસ અને પ્રદર્શનકારીઓ વચ્ચે ઘર્ષણ થયું. તે પછી સરકારે થોડાં કડક પગલા ભરવા પડ્યા
પરિસ્થિતિ ચોંકાવનારી
- અહેવાલ મુજબ,બ્રિટિશ સરકારે ઇન્ટેલિજન્સ રિપોર્ટ્સના અભ્યાસ પછી, સ્વીકાર્યું છે કે દેશમાં કટ્ટરપંથીઓની હરકતો અને સંખ્યા આશ્ચર્યજનક છે. ત્યાર બાદ જ આવા લોકો પર લગામ લગાવવાનો નિર્ણય લેવામાં આવ્યો. આ અંતર્ગત અન્ય દેશોમાંથી આવતા કટ્ટરપંથીઓના પ્રવેશને રોકવાના ઉપાયો પર વિચાર કરવામાં આવ્યો હતો.
- આ અંતર્ગત પાકિસ્તાન અફઘાનિસ્તાન અને ઈન્ડોનેશિયા જેવા દેશોમાંથી આવતા કટ્ટરપંથી ધાર્મિક નેતાઓના પ્રવેશ પર પ્રતિબંધ મૂકવાનો નિર્ણય લેવામાં આવ્યો હતો, જેથી આ લોકો બ્રિટનમાં આવીને ભડકાઉ નિવેદનો ન કરી શકે. આ માટે યાદી તૈયાર કરવામાં આવી છે. તેમાં આ પ્રકારના કટ્ટરપંથીઓના નામ હશે. જ્યારે આ લોકો બ્રિટિશ વિઝા માટે અપ્લાય કરશે ત્યારે તેમનું નામ કોમ્પ્યુટર પ્રોગ્રામમાં ક્રોસ ચેક થશે. જો તે બેન લિસ્ટમાં સામેલ હશે તો તેમને એન્ટ્રી મળી શકશે નહીં.
- બ્રિટિશ વડાપ્રધાને 1 ફેબ્રુઆરીએ કહ્યું હતુ- અમે હોમ મિનિસ્ટરને કહ્યું કે આવા લોકોને વિઝા આપવામાં કડકાઈ રાખવામાં આવે જે આપણાં દેશમાં આવીને લોકોને ભડકાવે છે અથવા બીજા સમુદાયો વિરુદ્ધ ઝેર ઉગલે છે. તેમને અમે અહીં રહેવા દઇશું નહીં.
બ્રિટનના પૂર્વ હોમ સેક્રેટરીએ થોડાં દિવસો પહેલાં કહ્યું હતુ કે જો કટ્ટરપંથી જૂથ પર પ્રતિબંધ મુકવામાં આવશે નહીં તો દેશની સુરક્ષાને ગંભીર જોખમ પેદા થઈ જશે.
બ્રિટનને તોડવાનું કાવતરું
- સુનકે કહ્યું હતું – તે સમય આવી ગયો છે જ્યારે આપણે વિભાજન કરનારી શક્તિઓ સામે એક થવું પડશે. તેઓ આપણાં દેશને તોડવાનું ષડયંત્ર રચી રહ્યા છે. શનિવારે પણ હજારો લોકોએ પેલેસ્ટાઈનના સમર્થનમાં બ્રિટનમાં પ્રદર્શન કર્યું હતું. આ દરમિયાન પોલીસે 12 લોકોની ધરપકડ કરી હતી.
- હાલમાં જ બ્રિટિશ સરકારના સલાહકાર લોર્ડ વોલ્ને એક રિપોર્ટમાં કહ્યું હતું કે ડાબેરી અને કટ્ટરપંથી જૂથોએ ઈસ્લામિક જૂથો સાથે હાથ મિલાવ્યા છે અને તેઓ બ્રિટન માટે જોખમ પેદા કરવાનું ષડયંત્ર કરી રહ્યા છે. ધ ટેલિગ્રાફ સાથે વાત કરતી વખતે, વાલ્નીએ એ પણ સ્વીકાર્યું હતું કે ડાબેરીઓ અને ઇસ્લામિક કટ્ટરપંથીઓ હવે સામાન્ય જોખમ ઉભું કરી રહ્યા છે. તેમણે પેલેસ્ટાઈન સમર્થકોની રેલીઓનો પણ ઉલ્લેખ કર્યો.
- આ પછી બ્રિટનના ગૃહ મંત્રાલયે એક નિવેદન બહાર પાડ્યું છે. કહ્યું- અહીં કટ્ટરવાદ માટે કોઈ સ્થાન નથી. અમે આ સહન પણ નહીં કરીએ. તાજેતરના મહિનાઓમાં કેટલાક લોકોએ હિંસા ફેલાવવાનું કાવતરું ઘડ્યું હતું. અમે પોલીસને આવા લોકો સામે કાર્યવાહી કરવા માટે છૂટ આપી છે.
બ્રિટન અને ખાસ કરીને લંડનમાં થયેલાં ઇઝરાયલ વિરોધી પ્રદર્શનોમાં ભાગ લેનાર લોકો ચહેરો ઢાંકીને બહાર આવે છે અને તેમનું મોટાભાગે પોલીસ સાથે હિંસક ઘર્ષણ થાય છે.
સુનક ઉચ્ચ પોલીસ અધિકારીઓને મળ્યા
- ઋષિ સુનક અને ગૃહ પ્રધાન જેમ્સ ક્લેવરલીએ ગયા અઠવાડિયે દેશના ટોચના પોલીસ અધિકારીઓ સાથે લાંબી બેઠક કરી હતી. અચાનક બોલાવવામાં આવેલી આ બેઠકનો એજન્ડા બ્રિટનમાં કટ્ટરપંથીઓ દ્વારા રસ્તા પર વિરોધ, સાંસદોને ધમકીઓ અને પોલીસ સાથે ઘર્ષણનો હતો.
- ‘ધ સન’ના અહેવાલ મુજબ સુનકે અધિકારીઓને કહ્યું કે દેશમાં કટ્ટરપંથીઓ લોકતંત્ર માટે પડકાર બની રહ્યા છે. જો તેઓ કોઈપણ પ્રકારની હિંસા કરે છે અથવા કાયદાનો ભંગ કરે છે, તો તેને હવે સહન કરવામાં આવશે નહીં.
- સુનકે કહ્યું- હિંસા અને ઉશ્કેરણીજનક ઘટનાઓ પર ચૂપ ન રહી શકાય. કેટલાક લોકો આ દેશના લોકતંત્ર માટે જોખમ ઉભું કરવા માગે છે, અમે ન તો આવું થવા દઈશું અને ન તો સહન કરીશું. સુનકે ખાસ કરીને કટ્ટરપંથીઓ તરફથી કેટલાક સાંસદોને મળેલી તાજેતરની ધમકીઓને ધ્યાનમાં રાખીને આવું કહ્યું હતું.
- સુનકે કહ્યું- ગાઝા મુદ્દે તાજેતરમાં પ્રદર્શનો થયા હતા. જ્યારે પોલીસે કાયદો અને વ્યવસ્થા જાળવવાનો પ્રયાસ કર્યો ત્યારે તેમના પર દબાણ લાવવાનું કાવતરું ઘડવામાં આવ્યું હતું. આ પછી સાંસદોને ધમકી આપવાનો મામલો સામે આવ્યો છે. આ વધતી હિંસા, ઉશ્કેરણી અને ધમકીઓ બંધ થવી જોઈએ. સાંસદો ગૃહમાં તેમના વિચારો રજૂ કરે છે. તેઓ તેમનું કામ કરે છે, તમે તેમને રોકી શકતા નથી. આ લોકશાહીની વિરુદ્ધ છે અને અમે તેને સહન નહીં કરીએ.
