કેજરીવાલે જેલમાંથી પહેલો આદેશ આપ્યો: જળ મંત્રાલયના નામે એક નોટ મોકલી; કહ્યું- હું જેલમાંથી સરકાર ચલાવીશ

દિલ્હી લિકર પોલિસી કેસમાં 21 માર્ચે ધરપકડ કરાયેલા દિલ્હીના સીએમ અરવિંદ કેજરીવાલે રવિવારે (24 માર્ચ) જેલમાંથી પોતાનો પહેલો આદેશ જારી કર્યો હતો. એક નોંધ દ્વારા તેમણે જળ વિભાગને સૂચનાઓ આપી હતી. 22 માર્ચે કોર્ટમાં હાજર થતાં કેજરીવાલે કહ્યું હતું કે તેઓ સીએમ પદ પરથી રાજીનામું નહીં આપે. જરૂર પડશે તો જેલમાંથી સરકાર ચલાવશે.

દરમિયાન, AAP મંત્રી આતિશી આજે પ્રેસ કોન્ફરન્સ કરશે. ગઈકાલે આતિશીએ દાવો કર્યો હતો કે તેમની પાર્ટી ઓફિસને ચારે બાજુથી સીલ કરી દેવામાં આવી છે. તેમણે કહ્યું કે લોકસભા ચૂંટણી દરમિયાન કોઈપણ રાષ્ટ્રીય પાર્ટીના કાર્યાલયમાં લોકોની એન્ટ્રી કેવી રીતે રોકી શકાય? અમે આ અંગે ચૂંટણી પંચને ફરિયાદ કરીશું.

શનિવારે સાંજે કેજરીવાલના વકીલે EDની ધરપકડ અને નીચલી કોર્ટના રિમાન્ડના નિર્ણયને દિલ્હી હાઈકોર્ટમાં પડકાર્યો હતો. વકીલોએ કહ્યું કે બંને નિર્ણયો ગેરકાયદે છે. કેજરીવાલ મુક્ત થવાને લાયક છે. અમે કોર્ટ પાસે 24 માર્ચ સુધી સુનાવણીની માગ કરી છે.

દિલ્હી હાઈકોર્ટે કેજરીવાલની ધરપકડ અને રિમાન્ડના કેસ પર તાત્કાલિક સુનાવણી કરવાનો ઇનકાર કર્યો હતો. કોર્ટે કહ્યું કે હોળીની રજા છે. બુધવારે (27 માર્ચ)ના રોજ કોર્ટ ખુલશે ત્યારે જ કેસની સુનાવણી થશે.