શું હાર્દિક પંડ્યાનું પત્તું કપાશે?: રોહિતને ફરી મળી શકે છે મુંબઈની કેપ્ટનશિપ; પૂર્વ ક્રિકેટરે કરેલી આ વાતથી સૌ કોઈ ચોંક્યા

ઈન્ડિયન પ્રીમિયર લીગ (IPL) 2024ની સિઝનમાં મુંબઈ ઈન્ડિયન્સ (MI) ટીમ માટે અત્યાર સુધી કંઈપણ બરાબર થયું નથી. ફ્રેન્ચાઇઝીએ આ સિઝનમાં 5 વખત ટાઇટલ જીતનાર રોહિત શર્માની જગ્યાએ સ્ટાર ઓલરાઉન્ડર હાર્દિક પંડ્યાને કેપ્ટન બનાવ્યો. પરંતુ મુંબઈના ચાહકોને આ પસંદ નથી આવ્યું અને તેઓ પંડ્યાને સતત ટ્રોલ કરી રહ્યા છે. આ દરમિયાન મુંબઈ તેની પ્રથમ ત્રણ મેચ પણ હારી ગયું છે. એટલે કે ટીમ જીતનું ખાતું ખોલાવી શકી નથી. ત્યારે હવે ક્રિકબઝના એક શોમાં આ વિશે વાત કરતી વખતે ભારતીય ક્રિકેટર મનોજ તિવારીએ મોટું નિવેદન આપ્યું છે. તિવારીની વાત સાંભળીને સેહવાગ ચોંકી ગયો હતો

તિવારીએ કહ્યું કે મુંબઈ હવે તેની આગામી મેચ 7 એપ્રિલે દિલ્હી કેપિટલ્સ (DC) સામે રમવાની છે. આવી સ્થિતિમાં, ફ્રેન્ચાઇઝી પાસે લાંબો બ્રેક છે અને આ સમય દરમિયાન તેઓ કોઈ મોટો નિર્ણય લઈ શકે છે. ફ્રેન્ચાઇઝી ફરીથી રોહિતને કેપ્ટનશિપ સોંપી શકે છે. મનોજ તિવારી જ્યારે ક્રિકબઝ શોમાં આ વાત કહી રહ્યો હતો ત્યારે તેમની સાથે દિગ્ગજ ક્રિકેટર વીરેન્દ્ર સેહવાગ પણ હાજર હતો, જે તેની વાત સાંભળીને ચોંકી ગયો હતો. સેહવાગે કહ્યું કે ‘હા તે થઈ શકે છે, પરંતુ તિવારીએ આ વાત વહેલી કહી દીધી છે. ઓછામાં ઓછી 7 મેચ હોવી જોઈએ, તે પછી આપણે વાત કરી શકીએ.’

દબાણમાં છે મુંબઈનો કેપ્ટન હાર્દિક પંડ્યા
મનોજ તિવારીએ કહ્યું, ‘મને લાગે છે કે હાર્દિક પંડ્યા દબાણમાં છે, કદાચ એટલા માટે જ હાર્દિક પંડ્યાએ રાજસ્થાન સામે મુંબઈ તરફથી બોલિંગ નથી કરી. જ્યારે અગાઉની મેચમાં તે જ્યારે બોલ શરૂઆતમાં સ્વિંગ થતો હતો ત્યારે જ બોલિંગ કરી લેતો હતો. તે સમયે તેણે બોલિંગ કરવી જોઈતી હતી. પરંતુ દબાણને કારણે તેણે તે કર્યું નહીં.

આ બ્રેકમાં રોહિતને કેપ્ટનશિપ મળી શકે છે
મનોજે વધુમાં કહ્યું કે ‘મને લાગે છે કે આ બ્રેક દરમિયાન (રવિવાર સુધી) મુંબઈ ઈન્ડિયન્સ ફ્રેન્ચાઇઝી કોઈ મોટો નિર્ણય લઈ શકે છે અને રોહિત શર્માને ફરીથી કેપ્ટન બનાવી શકે છે. કારણ કે હું ફ્રેન્ચાઇઝી ક્રિકેટ અથવા તેમના માલિકોને જેટલું સમજું છું, તેઓ નિર્ણય લેવામાં અચકાતા નથી.’

તિવારીએ કહ્યું, ‘મુંબઈની ટીમ અત્યાર સુધી એક પણ પોઇન્ટ મેળવી શકી નથી અને હાર્દિકે ખૂબ જ સાધારણ કેપ્ટનશિપ કરી છે. તે પોતાના બોલરોનો યોગ્ય રીતે ઉપયોગ કરી શક્યો નથી. જ્યારે હૈદરાબાદ ઘણા રન બનાવી રહ્યું હતું. પછી તેણે બોલિંગ ચાલુ રાખી. આ સિવાય 13મી ઓવરમાં ટીમના સર્વશ્રેષ્ઠ બોલર જસપ્રીત બુમરાહને લાવીને હાર્દિક કંઈ ખાસ કરી શક્યો નહોતો. તેથી, આ એક મોટો કોલ લેવાનો છે અને માહોલ પણ યોગ્ય નથી લાગતું.’