‘હાઉસફુલ 5’માં અભિષેક બચ્ચનની એન્ટ્રી: સાજિદ નડિયાદવાલાએ જાહેરાત કરી, ઓગસ્ટથી UKમાં શૂટિંગ શરૂ થશે

હાઉસફુલ ફ્રેન્ચાઈઝીની 4 સફળ ફિલ્મો બાદ તેની પાંચમી ફિલ્મ ‘હાઉસફુલ 5’ની તૈયારીઓ શરૂ થઈ ગઈ છે. આ ફિલ્મમાં અક્ષય કુમાર અને રિતેશ દેશમુખને કાસ્ટ કરવામાં આવ્યા હતા, ત્યારબાદ હવે અભિષેક બચ્ચન પણ ઓનબોર્ડ આવી ગયા છે.

તાજેતરમાં જ ફિલ્મના નિર્માતા સાજિદ નડિયાદવાલાએ અભિષેક બચ્ચનની કાસ્ટિંગ અંગે સત્તાવાર જાહેરાત કરી છે. તેણે અભિષેકની એક તસવીર શેર કરી અને લખ્યું,- અમને જણાવતા ખૂબ જ આનંદ થાય છે કે હવે અભિષેક બચ્ચન ફરીથી હાઉસફુલ પરિવારનો ભાગ બની ગયો છે. અમે તેમને મેળવીને ખૂબ જ ખુશ છીએ.

ફિલ્મનું શૂટિંગ ઓગસ્ટથી શરૂ થશે
ફિલ્મ ‘હાઉસફુલ 5’નું શૂટિંગ ઓગસ્ટથી યુનાઇટેડ કિંગડમમાં શરૂ થવાનું છે. ફિલ્મમાં જોડાવા પર અભિષેક બચ્ચને ફિલ્મફેરને કહ્યું કે, ‘હાઉસફુલ મારી ફેવરિટ કોમેડી ફ્રેન્ચાઈઝીમાંથી એક છે અને તેમાં જોડાવું એ ઘરે પરત ફરવા જેવું છે. સાજિદ નડિયાદવાલા સાથે જોડાવું એ એક મહાન અનુભવ છે. હું અક્ષય કુમાર અને રિતેશ સાથે સેટ પર મસ્તી કરવા માટે આતુરતાથી રાહ જોઈ રહ્યો છું. હું મારા નજીકના મિત્ર તરુણ મનસુખાની સાથે બીજી વખત કામ કરવા માટે પણ ઉત્સાહિત છું’.

તરુણ મનસુખાની ફિલ્મ ‘હાઉસફુલ 5’નું નિર્દેશન કરી રહ્યા છે. આ પહેલા તેણે અભિષેક બચ્ચનની ફિલ્મ ‘દોસ્તાના’ ડિરેક્ટ કરી હતી. નડિયાદવાલા ‘ગ્રાન્ડસન એન્ટરટેઈનમેન્ટ’ના બેનર હેઠળ સાજિદ નડિયાદવાલા દ્વારા ફિલ્મ ‘હાઉસફુલ 5’ બનાવવામાં આવી રહી છે. આ ફિલ્મ 6 જૂન, 2025ના રોજ રિલીઝ થવાની છે.

‘હાઉસફુલ 5’ પહેલા અક્ષય, અભિષેક અને રિતેશ હાઉસફુલ 3માં સાથે જોવા મળ્યા હતા

‘હાઉસફુલ’ ભારતની સૌથી વધુ કમાણી કરનાર કોમેડી ફિલ્મ ફ્રેન્ચાઇઝી છે
અત્યાર સુધી ‘હાઉસફુલ ફ્રેન્ચાઈઝી’ની 4 સફળ ફિલ્મો રિલીઝ થઈ છે. આ ફ્રેન્ચાઇઝીએ વિશ્વભરમાં રૂ. 800 કરોડની કમાણી કરી છે, જે તેને ભારતની સૌથી વધુ કમાણી કરનાર કોમેડી ફિલ્મ ફ્રેન્ચાઇઝી બનાવે છે. તે ભારતની 7મી સૌથી વધુ કમાણી કરનાર ફ્રેન્ચાઈઝી ફિલ્મ પણ છે.