રશિયાએ શરૂ કર્યું પરમાણુ શસ્ત્રોનું પરીક્ષણ: ઈસ્કંદર અને કિંજલ મિસાઈલનું ટેસ્ટિંગ; યુક્રેનમાં નાટોની એન્ટ્રીના જવાબમાં રશિયાની ન્યુક્લિયર ડ્રિલ

રશિયાના રાષ્ટ્રપતિ વ્લાદિમીર પુતિને યુક્રેનની સરહદ પાસે તહેનાત નૌકાદળ અને સૈનિકોને આ પરીક્ષણમાં ભાગ લેવા કહ્યું.

​​​​​​યુક્રેન યુદ્ધ વચ્ચે, રશિયન સેનાએ ઇસ્કંદર અને કિંજલ મિસાઇલો સાથે વ્યૂહાત્મક પરમાણુ પરીક્ષણો શરૂ કર્યા છે. રશિયાના સંરક્ષણ મંત્રાલયે મંગળવારે (21 મે) કહ્યું કે આ પરીક્ષણો યુક્રેનના દક્ષિણી સૈન્ય વિસ્તારમાં થઈ રહ્યા છે. આ વિસ્તાર ઘણો મોટો છે. રશિયાએ તે ચોક્કસ સ્થળ જણાવ્યું નથી કે જ્યાં પરીક્ષણો કરવામાં આવી રહ્યા છે.

અલજઝીરા અનુસાર રશિયાએ યુદ્ધના શરૂઆતના દિવસોમાં આ વિસ્તાર પર કબજો કરી લીધો હતો. બેલારુસ પણ આ પરીક્ષણમાં ભાગ લે તેવી શક્યતા છે. ગયા વર્ષે રશિયાએ જાહેરાત કરી હતી કે તે બેલારુસમાં ટેક્ટિકલ ન્યુક્લિયર વેપન તહેનાત કરશે.

રશિયા આ પરીક્ષણ દ્વારા પશ્ચિમી દેશોની ધમકીઓનો જવાબ આપવાનો પ્રયાસ કરી રહ્યું છે. ગયા મહિને જ રશિયાના રાષ્ટ્રપતિ વ્લાદિમીર પુતિને તેમની સેનાને પરમાણુ હથિયારોની કવાયત હાથ ધરવાનો આદેશ આપ્યો હતો. આમાં તેણે યુક્રેનની સરહદ પાસે તહેનાત નૌકાદળ અને સૈનિકોને પણ ભાગ લેવા માટે કહ્યું હતું.

ફ્રાન્સ સહીત નાટોના ઘણા નેતાઓએ યુક્રેનમાં નાટો સૈનિકો મોકલવાની વાત કરી હતી
રશિયાના સંરક્ષણ મંત્રાલયનું કહેવું છે કે રશિયાની સુરક્ષાની સાથે-સાથે રશિયાને પશ્ચિમી દેશો તરફથી મળી રહેલી ધમકીઓને ધ્યાનમાં રાખીને પરમાણુ હથિયારોનું પરીક્ષણ કરવામાં આવી રહ્યું છે. રશિયાને આશંકા છે કે નાટો સૈનિકો ટ્રેનિંગના બહાને યુક્રેનમાં આવવા લાગ્યા છે. આ પહેલા ફ્રાન્સ રાષ્ટ્રપતિથી લઈને નાટોના ઘણા નેતાઓએ પણ યુક્રેનમાં નાટો સૈનિકો મોકલવાની વાત કરી છે.

પુતિને કહ્યું હતું કે હાલમાં યુક્રેનમાં તહેનાત સૈનિકોએ પણ પરમાણુ હથિયારોની ડ્રિલમાં સામેલ થાય. (ફાઈલ)

પશ્ચિમી દેશોએ યુક્રેનને સૈન્ય મદદ આપવાનું કહ્યું હતું
રશિયા આ પરીક્ષણ એવા સમયે કરી રહ્યું છે જ્યારે થોડા દિવસ પહેલા નાટો અને પશ્ચિમી દેશોએ યુક્રેનની મદદ માટે સૈનિકો મોકલવાની વાત કરી હતી. ફ્રાન્સના રાષ્ટ્રપતિ ઈમેન્યુઅલ મેક્રોને ગયા મહિને કહ્યું હતું કે જો યુક્રેન મદદ માંગે તો તે ત્યાં પોતાના સૈનિકો મોકલી શકે છે.

બ્રિટનના વિદેશ મંત્રી ડેવિડ કેમરને પણ કહ્યું હતું કે જો યુક્રેન ઈચ્છે તો તે રશિયા પર હુમલો કરવા માટે બ્રિટિશ હથિયારોનો ઉપયોગ કરી શકે છે.

અમેરિકાએ એપ્રિલમાં યુક્રેનને 12 ATACMS મિસાઈલો આપી હતી. તેની રેન્જ 300 કિલોમીટર છે એટલે કે જો તેનો ઉપયોગ યુદ્ધમાં કરવામાં આવે તો તે રશિયાની અંદર 300 કિલોમીટર સુધી હુમલો કરી શકે છે.

આ પછી અમેરિકાના વિદેશ મંત્રી એન્ટની બ્લિંકને ગયા અઠવાડિયે જ યુક્રેનની મુલાકાત લીધી હતી. બ્લિંકને કહ્યું હતું કે આજે મોટાભાગની દુનિયા મુક્ત વિશ્વ માટે લડી રહી છે.

ત્રીજા વર્ષમાં રશિયા-યુક્રેન યુદ્ધ
રશિયા અને યુક્રેન વચ્ચેનું યુદ્ધ ફેબ્રુઆરીમાં ત્રીજા વર્ષમાં પહોંચ્યું હતું. યુક્રેનના શસ્ત્રો અને સૈનિકો દિવસેને દિવસે ઘટી રહ્યા છે. બીબીસીના અહેવાલ મુજબ, યુક્રેન-રશિયા યુદ્ધમાં અત્યાર સુધીમાં 50 હજારથી વધુ રશિયન સૈનિકો માર્યા ગયા છે. જ્યારે યુક્રેન યુદ્ધના બીજા વર્ષમાં 27 હજાર 300 રશિયન સૈનિકો ગુમાવ્યા હતા. રિપોર્ટમાં એમ પણ કહેવામાં આવ્યું છે કે મૃત્યુઆંક અંદાજ કરતાં વધુ હોઈ શકે છે.

આ પહેલા ફેબ્રુઆરીમાં રાષ્ટ્રપતિ વોલોદિમિર ઝેલેન્સકીએ પણ યુક્રેનના સૈનિકોના મોતની માહિતી આપી હતી. ઝેલેન્સકીના જણાવ્યા અનુસાર, યુદ્ધમાં અત્યાર સુધીમાં માત્ર 31 હજાર યુક્રેનિયન સૈનિકોએ જીવ ગુમાવ્યા છે. જો કે અમેરિકન ઈન્ટેલિજન્સ અનુસાર 70 હજારથી વધુ યુક્રેનિયન સૈનિકોના મોત થયા છે.