ઈમરાને કહ્યું- બાજવા પર વિશ્વાસ કરવો મારી સૌથી મોટી ભૂલ: ઈન્ટરવ્યુમાં પૂર્વ આર્મી ચીફને દગાબાજ કહ્યા, તેમને બીજી ટર્મ આપીને ભૂલ કરી

નારાજ ઈમરાન ખાને જેલમાં પત્રકાર મહેદી હસનને ઈન્ટરવ્યુ આપ્યો છે. આ ઈન્ટરવ્યુમાં તેણે ખાસ કરીને જનરલ બાજવા પર નિશાન સાધ્યું છે.

ઓગસ્ટ 2023થી જેલમાં બંધ પાકિસ્તાનના પૂર્વ વડા પ્રધાન ઇમરાન ખાને કહ્યું છે કે તેમને અફસોસ છે કે જ્યારે તેઓ સત્તામાં હતા ત્યારે તેમણે જનરલ કમર જાવેદ બાજવા પર વિશ્વાસ કર્યો હતો. એક ઈન્ટરવ્યુમાં ઈમરાન ખાને કહ્યું કે જનરલ બાજવાને બીજી ટર્મ આપી તે મારી ભૂલ હતી.

પાકિસ્તાની અખબાર ડૉન અનુસાર, પૂર્વ વડાપ્રધાન ઈમરાન ખાને હાલમાં જ પત્રકાર મેહદી હસનને એક ઈન્ટરવ્યુ આપ્યો હતો. જેમાં તેમણે રાજકીય પક્ષોના નેતાઓ અને સૈન્ય નેતૃત્વની ટીકા કરી છે. આ ઈન્ટરવ્યુમાં તેણે ખાસ કરીને ‘દોસ્તમાંથી દુશ્મન’ બનેલા જનરલ બાજવા પર નિશાન સાધ્યું છે.

પૂર્વ પીએમ ઈમરાન ખાને પોતાના ઈન્ટરવ્યુમાં રિટાયર્ડ જનરલ બાજવા પર નિશાન સાધ્યું છે.

ઈમરાન ખાને પત્ર દ્વારા ઈન્ટરવ્યુ આપ્યો હતો
પત્રકાર મહેંદી હસને જણાવ્યું કે તેમણે ઈમરાન ખાનનો ઈન્ટરવ્યુ લેવા માટે સવાલ લખેલો પત્ર મોકલ્યો હતો. ખાને પણ તેમને પત્ર દ્વારા જવાબ આપ્યા હતા. ઈન્ટરવ્યુમાં ઈમરાન ખાને કહ્યું હતું કે આતંકવાદીઓ જ્યાં રહે છે તે જગ્યાએ તેમને કેદ કરીને રાખવામાં આવ્યો છે. આ સમય દરમિયાન તેમને પ્રાથમિક સુવિધાઓ પણ મળી રહી નથી. તેમણે જેલની સજા માટે જનરલ બાજવાને જવાબદાર ગણાવ્યા હતા.

તેમણે કહ્યું કે આ બધુ જનરલ બાજવા દ્વારા રચાયેલ ખેલ છે. તે છેતરપિંડી કરનાર વ્યક્તિએ ખૂબ જ ચતુરાઈથી તમામ પ્લાનિંગ કર્યું હતું. દેશ અને દુનિયામાં અરાજકતા ફેલાવવા માટે ખોટી કહાનીઓ ઘડી. આ બધું તેણે બીજી ટર્મ મેળવવા માટે કર્યું હતું.

2019માં ઈમરાન ખાને તત્કાલિન આર્મી ચીફનો કાર્યકાળ 3 વર્ષ સુધી લંબાવ્યો હતો.

ઈમરાન ખાને કહ્યું- બીજી ટર્મ મળ્યા બાદ બાજવાએ બદલવું જોઈએ
જનરલ બાજવાએ વર્ષ 2016માં પાકિસ્તાનમાં આર્મી ચીફની કમાન સંભાળી હતી. આ દરમિયાન ઈમરાન ખાન સાથે તેની ટ્યુનિંગ સારી ચાલી રહી હતી. આ જ કારણ હતું કે 2019માં ઈમરાન ખાને જનરલ બાજવાનો કાર્યકાળ 3 વર્ષ માટે વધારવાની મંજૂરી આપી હતી. જો કે, બાદમાં ઈમરાન ખાનને પોતાની ભૂલનો અહેસાસ થયો હતો. વડાપ્રધાન તરીકે ઈમરાન ખાને 2022માં બોલ ન્યૂઝને આપેલા ઈન્ટરવ્યુમાં કહ્યું હતું કે આર્મી ચીફનો કાર્યકાળ વધારીને તેમણે ભૂલ કરી છે.

ઈમરાન ખાને કહ્યું કે જનરલ બાજવાએ જ અમેરિકા જેવા દેશોમાં તેમના વિશે ખોટી વાતો ફેલાવી હતી. તેઓએ મને અમેરિકા વિરોધી કહ્યો હતો. બાજવા એ સાબિત કરવા માંગતા હતા કે તેમને અમેરિકા સાથે સંબંધો જાળવવામાં રસ નથી. ઈમરાન ખાને કહ્યું કે જનરલ બાજવાના અંગત લોભને કારણે તેમનું વર્તન બદલાઈ ગયું અને તેઓ અત્યંત ખતરનાક બની ગયા.

ઈમરાન ખાન ઓગસ્ટ 2023થી જેલમાં છે. તેની સામે 200થી વધુ કેસ નોંધાયેલા છે.

ઈમરાન ખાને કહ્યું- સરકાર પડી ગયા પછી પણ અન્ય દેશો સાથે સારા સંબંધો જાળવી રાખ્યા
ઈમરાન ખાને કહ્યું કે તેમની સાથે ન્યાય થયો નથી. તેમણે પાકિસ્તાનમાં કાયદાના શાસન માટે સતત લડત આપી છે. હસને ખાનને પૂછ્યું હતું કે હવે તેમની પાસે કોઈ મિત્ર નથી, જવાબમાં તેમણે કહ્યું કે તેમની સરકારના પતન પછી પણ તેમણે મોટાભાગના દેશો સાથે સારા સંબંધો જાળવી રાખ્યા હતા.

8 ફેબ્રુઆરીની સામાન્ય ચૂંટણીઓ અંગે, તેમણે કહ્યું કે તેમની પાર્ટીનું ચૂંટણી ચિન્હ ‘બેટ’ છીનવી લેવાયા બાદ તેઓ ચૂંટણી લડી શક્યા નથી. જ્યારે તેમને પૂછવામાં આવ્યું કે શું તેઓ વર્તમાન સરકારને માન્યતા આપે છે, ત્યારે ઈમરાને કહ્યું કે “સરકાર નકલી છે” અને નવાઝ શરીફની PML-N “સંસદમાં ભાગ્યે જ કોઈ બેઠક જીતી શકી છે”.

ક્રિકેટરમાંથી રાજનેતા બનેલા ઈમરાન ખાન વિરુદ્ધ 200થી વધુ કેસ નોંધાયા છે. ઈમરાન સામેનો સૌથી ગંભીર કેસ 9 મે 2023ની હિંસાનો છે. આરોપ છે કે તેમના કહેવા પર તેમના સમર્થકોએ મહત્વપૂર્ણ સૈન્ય મથકો અને સેનાના હેડક્વાર્ટર પર પણ હુમલો કર્યો હતો.