શ્રુતિ હાસને કર્યા સિક્રેટ મેરેજ!: ઓરીએ તેમના બોયફ્રેન્ડને શ્રુતિનો પતિ ગણાવ્યો; કહ્યું, ‘તેમણે મારી સાથે ખુબ જ ખરાબ વર્તન કર્યું હતું’

આ દિવસોમાં ફિલ્મ ‘સાલાર’માં જોવા મળેલી અભિનેત્રી શ્રુતિ હાસન છેલ્લા ઘણા સમયથી શાંતનુ હજારિકાને ડેટ કરી રહી છે. હવે એવા અહેવાલો છે કે 37 વર્ષની શ્રુતિએ બોયફ્રેન્ડ શાંતનુ સાથે ગુપ્ત રીતે લગ્ન કરી લીધા છે. પાપારાઝીની ફેવરિટ ઓરીએ સોશિયલ મીડિયા દ્વારા લગ્નનો સંકેત આપ્યો છે. સોશિયલ મીડિયા પર સવાલ-જવાબ વચ્ચે ઓરીએ શાંતનુને શ્રુતિનો પતિ ગણાવ્યો છે.

હાલમાં ઓરી ઉર્ફે ઓરહાન અવતરમણિએ ઈન્સ્ટાગ્રામ પર આસ્ક મી એનિથિંગ સેશન કર્યું હતું. આ દરમિયાન એક ફેન્સે તેમને પૂછ્યું કે, શું એવી કોઈ સેલિબ્રિટી છે કે જેણે તમારી સાથે ફોટો ક્લિક કરાવવાની ના પાડી હોય અને જબરદસ્ત વલણ દાખવ્યું હોય. જો તમે નામ ન લઈ શકો તો એક સંકેત આપો.

જેના જવાબમાં ઓરીએ શ્રુતિ હાસનનું નામ લીધું. તેમણે કહ્યું, મેં ક્યારેય તેમની સાથે ફોટો ક્લિક કરાવવાનું કહ્યું નથી, અમે એક ઈવેન્ટમાં મળ્યા હતા, જ્યાં તે મારી સાથે ખૂબ જ અસભ્ય વર્તન કરી રહી હતી. હું તેમને ઓળખતો પણ નથી. મને બહુ ખરાબ લાગ્યું. મને લાગે છે કે કોઈ ગેરસમજ થઈ હશે કારણ કે હું તેમના પતિને સારી રીતે ઓળખું છું અને તેમને પસંદ કરું છું. અમારી ગેરસમજ તરત જ દૂર થઈ ગઈ, પણ પછી મને ખબર પડી કે તેમણે મને પટાવાળા કે સ્પોટબોય ગણાવ્યો હતો.

શ્રુતિ હાસનનો બોયફ્રેન્ડ શાંતનુ એક કલાકાર છે. બંને લગભગ 3 વર્ષથી રિલેશનશિપમાં છે. થોડા સમય પહેલાં શ્રુતિએ દિવ્ય ભાસ્કર સાથેની ખાસ વાતચીત દરમિયાન બોયફ્રેન્ડ અને લગ્ન વિશે વાત કરી હતી. તેમણે કહ્યું હતું કે, શાંતનુ મારો સૌથી સારો મિત્ર છે. તે ખૂબ જ પ્રતિભાશાળી કલાકાર છે. કલા, સંગીત અને સિનેમા જેવા અનેક પાસાઓમાં આપણી વિચારસરણી મેળ ખાય છે. આવા સંજોગોમાં મને તેમની સાથે સમય પસાર કરવો ગમે છે. મારા મનમાં પણ તેમના માટે ઘણું સન્માન છે. જો કે, લગ્નના સંદર્ભમાં, હું કહેવા માગુ છું કે હાલમાં મારું આવું કોઈ પ્લાનિંગ નથી.

આ દિવસોમાં શ્રુતિ હાસન પ્રભાસ સાથે ફિલ્મ ‘સાલાર પાર્ટ-1: સીઝફાયર’માં જોવા મળી રહી છે. આ સિવાય અભિનેત્રી ‘ધ આઈ’ અને ‘ડકેત’માં જોવા મળશે. બંને ફિલ્મો 2024માં રિલીઝ થશે.