મલયાલમ નિર્દેશક તુલસીદાસ પર જાતીય સતામણીના આરોપો: એક્ટ્રેસ ગીતા વિજયન અને શ્રીદેવિકાએ કહ્યું, ;ડિરેકટર દરરોજ મોડી રાત્રે હોટલના રૂમનો દરવાજો ખખડાવતો હતો’

જ્યારથી હેમા કમિટિનો રિપોર્ટ સામે આવ્યો છે ત્યારથી મલયાલમ ફિલ્મ ઈન્ડસ્ટ્રી સાથે જોડાયેલી ઘણી જાણીતી અભિનેત્રીઓ તેમની સાથે થયેલા યૌન ઉત્પીડનના કિસ્સાઓ વિશે ખુલ્લેઆમ વાત કરી રહી છે.આ દરમિયાન અભિનેત્રી ગીતા વિજયન અને શ્રીદેવિકાએ પણ નિર્દેશક તુલસીદાસ પર ફિલ્મના શૂટિંગ દરમિયાન જાતીય સતામણીનો આરોપ લગાવ્યો છે.

તુલસીદાસે 1988માં દિગ્દર્શક તરીકેની શરૂઆત કરી હતી. તેની છેલ્લી ફિલ્મ 2016માં રિલીઝ થઈ હતી.

1991માં શોષણ થયું
અભિનેત્રી ગીતાએ કહ્યું કે, 1991માં ફિલ્મના શૂટિંગ દરમિયાન ડિરેક્ટરે તેનું શોષણ કર્યું હતું. અભિનેત્રીના કહેવા પ્રમાણે, ડિરેક્ટર ​​​​​વારંવાર તેની હોટલનો દરવાજો ખખડાવતા હતા. જ્યારે ગીતાએ તેની સામે વિરોધ કર્યો, ત્યારે બદલો લેવા માટે ડિરેક્ટરે તેને ફિલ્મના સેટ પર સીન સમજાવવાની ના પાડી.

અભિનેત્રી ગીતા વિજયને આરોપ લગાવ્યો હતો કે 1991માં રિલીઝ થયેલી ફિલ્મ ‘ચાંચત્તમ’ના શૂટિંગ દરમિયાન ડિરેક્ટરે તેનું શોષણ કર્યું હતું.

શ્રીદેવિકાએ પણ આવો જ આરોપ લગાવ્યો હતો
તેવી જ રીતે અભિનેત્રી શ્રીદેવિકાએ પણ નિર્દેશક તુલસીદાસ પર મોડી રાત્રે હોટલનો દરવાજો ખખડાવવાનો આરોપ લગાવ્યો છે. તેણે કહ્યું કે 2006માં રિલીઝ થયેલી ફિલ્મના શૂટિંગ દરમિયાન તુલસીદાસે તેને ખૂબ હેરાન કરી હતી. તે દર મોડી રાત્રે હોટલના રિસેપ્શનને તેના રૂમનો નંબર પૂછીને તેનો દરવાજો ખખડાવતો હતો.

અભિનેત્રીએ AMMAને ફરિયાદ કરી હતી
જ્યારે શ્રીદેવિકાની માતાએ અભિનેતાને આ વાત કહી તો તેણે પોતાનો રૂમ બદલી નાખ્યો. આ પછી, નિર્દેશકે ગુસ્સામાં ફિલ્મમાંથી અભિનેત્રીના દ્રશ્યો અને સંવાદો કાપી નાખ્યા. બાદમાં શ્રીદેવિકાએ આ અંગે AMMAમાં ફરિયાદ કરી હતી પરંતુ નિર્દેશક સામે કોઈ કાર્યવાહી કરવામાં આવી ન હતી.

અભિનેત્રી શ્રીદેવિકાએ કહ્યું છે કે 2006માં રિલીઝ થયેલી એક ફિલ્મના શૂટિંગ દરમિયાન ડિરેક્ટરે તેને હેરાન કરી હતી.

ડિરેક્ટરે કહ્યું- સેટ પર વાતાવરણ ખુશનુમા હતું
આ આરોપોને નકારી કાઢતાં તુલસીદાસે એક ઈન્ટરવ્યુમાં કહ્યું, ‘ફિલ્મના શૂટિંગ દરમિયાન આવું કંઈ થયું ન હતું. સૌ કોઈ ખુશનુમા વાતાવરણમાં હતા. હું સારી રીતે જાણું છું કે તે મારા પર આવો આરોપ કેમ લગાવી રહી છે.

અભિનેત્રી મીનુએ ચાર સહ કલાકારો પર પણ આરોપ લગાવ્યા હતા
સોમવારે અભિનેતા મીનુ મુનીરે પણ મુકેશ, મણિયનપિલ્લા રાજુ, ઇદવેલા બાબુ અને જયસૂર્યા જેવા કલાકારો પર યૌન શોષણનો આરોપ લગાવ્યો હતો. 2013ના આ કેસનો ઉલ્લેખ કરીને તેણે તેમાં કેટલાક પ્રોડક્શન કંટ્રોલર્સની સંડોવણી હોવાનો પણ દાવો કર્યો છે.