‘મુસ્લિમો પર હુમલા યથાવત્…’: ભાજપ સરકારમાં બદમાશોને ખૂલી છૂટ છે, સરકારી તંત્ર મૂકપ્રેક્ષક બનીને તમાશો જુએ છે: મોબ લિંચિંગ મામલે રાહુલના પ્રહાર

રાહુલનું કહેવું છે કે તેઓ નફરત સામે ભારતને જોડવાની લડાઈ જીતશે.

લોકસભામાં વિપક્ષના નેતા રાહુલ ગાંધીએ હરિયાણા અને મહારાષ્ટ્રમાં મોબ લિંચિંગની ઘટનાઓને મામલે ભાજપ સરકાર પર નિશાન સાધ્યું છે. રાહુલે કહ્યું કે, બદમાશોને ભાજપ સરકાર તરફથી ખૂલી છૂટ મળી છે, તેથી જ તેમનામાં આટલી હિંમત છે. લઘુમતીઓ અને ખાસ કરીને મુસ્લિમો પર સતત હુમલાઓ ચાલુ છે અને સરકારી તંત્ર મૂક પ્રેક્ષક બનીને તમાસો જોઈ રહ્યું છે.

રાહુલે વધુમાં કહ્યું કે ભાજપ ગમે તેટલા પ્રયાસ કરે, અમે નફરત સામે ભારતને એક કરવાની લડાઈ જીતીશું.

રાહુલે કહ્યું- BJP દેશમાં ભયનું વાતાવરણ બનાવી રહી છે
રાહુલનું કહેવું છે કે ભાજપ પાર્ટી નફરતનો રાજકીય હથિયાર તરીકે ઉપયોગ કરીને સત્તાની સીડી પર ચઢી રહી છે અને દેશમાં ભયનું વાતાવરણ ઊભું કરી રહી છે. ગુનેગારો ખુલ્લેઆમ ટોળાના રૂપમાં હિંસા ફેલાવી રહ્યા છે અને તેઓને ભાજપ સરકારથી ખૂલી છૂટ છે. આવા ગુનેગારો સામે કડક કાર્યવાહી થવી જોઈએ.

રાહુલ ગાંધીએ હરિયાણા અને મહારાષ્ટ્રમાં મોબ લિંચિંગની ઘટનાઓની તસવીરો પણ શેર કરી છે.

મહારાષ્ટ્રમાં ગૌમાંસ રાખવાની શંકામાં વૃદ્ધ વ્યક્તિ પર ટ્રેનમાં હુમલો કરવામાં આવ્યો

આ ઘટના થોડા દિવસો પહેલાં મહારાષ્ટ્રના ઇગતપુરી પાસે ધુલે એક્સપ્રેસમાં બની હતી. તેનો વીડિયો સોશિયલ મીડિયા પર વાઇરલ થઈ રહ્યો છે.

મહારાષ્ટ્રમાં ચાલુ ટ્રેનમાં એક વૃદ્ધ પર હુમલાની ઘટના સામે આવી છે. સાથી મુસાફરોએ વૃદ્ધને થપ્પડ મારી હતી અને દુર્વ્યવહાર કર્યો, તેના પર ગૌમાંસ લઈ જવાનો આરોપ લગાવ્યો હતો. આ દરમિયાન ટ્રેનમાં બેઠેલા બાકીના લોકો ચૂપચાપ આ તમાસો જોઈ રહ્યા હતા.

આ ઘટના થોડા દિવસો પહેલાં ઇગતપુરી પાસે ધુલે એક્સપ્રેસમાં બની હતી. તેનો વીડિયો સામે આવ્યા બાદ, થાણે જીઆરપીએ પાંચથી વધુ મુસાફરો વિરુદ્ધ એફઆઈઆર નોંધી છે. AIMIM સાંસદ ઈમ્તિયાઝ જમીલે વીડિયો શેર કરતા સરકાર અને પોલીસની નિંદા કરી હતી.

હરિયાણામાં યુવકને માર માર્યો, ગૌમાંસ ખાવાની આશંકા

આ હુમલાનો વીડિયો 31 ઓગસ્ટના રોજ સામે આવ્યો હતો, જેમાં કેટલાક લોકો યુવક સાથે મારપીટ કરી રહ્યા છે.

હરિયાણાના ચરખી દાદરીમાં ગૌમાંસ ખાવાની શંકામાં એક યુવકને માર મારવામાં આવ્યો હતો. ઘટના 27મી ઓગસ્ટની છે. તેનો વીડિયો શનિવારે (31 ઓગસ્ટ) સામે આવ્યો હતો.

વીડિયોમાં કેટલાક લોકો યુવકને લાકડીઓ વડે માર મારી રહ્યા છે. પોલીસે આ કેસમાં 29 ઓગસ્ટે 7 આરોપીઓની ધરપકડ કરી હતી, જેમાંથી બે સગીર છે. સગીરોને જુવેનાઈલ હોમમાં મોકલી દેવામાં આવ્યા છે.

સીએમ નાયબ સિંહ સૈનીએ કહ્યું હતું કે આ ઘટના દુર્ભાગ્યપૂર્ણ છે. તેમણે એમ પણ કહ્યું કે લોકોમાં ગાય માતા પ્રત્યે આદર છે. આવી સ્થિતિમાં લોકોની ધાર્મિક ભાવનાઓને ઠેસ પહોંચે તેવી પ્રવૃત્તિઓમાં લોકોએ સામેલ ન થવું જોઈએ.

નવા કાયદામાં મોબ લિંચિંગ માટે મૃત્યુદંડ
નવા ફોજદારી કાયદામાં મોબ લિંચિંગ પર અલગ કાયદો બનાવવામાં આવ્યો છે. આ કાયદા હેઠળ, શારીરિક ઈજા પહોંચાડતા ગુનાઓ કલમ 100-146 હેઠળ આવરી લેવામાં આવે છે.

મોબ લિંચિંગના કિસ્સામાં ઓછામાં ઓછી 7 વર્ષની જેલ થઈ શકે છે. આજીવન કેદ અથવા મૃત્યુદંડની પણ જોગવાઈ છે. આ સિવાય હત્યાના મામલામાં કલમ 103 હેઠળ કેસ નોંધવામાં આવશે. કલમ 111માં સંગઠિત ગુના માટે સજાની જોગવાઈ છે. સેક્શન 113માં ટેરર ​​એક્ટનું વર્ણન કરવામાં આવ્યું છે.

આ સમાચાર પણ વાંચો…

SC જજે કહ્યું- સમાજમાં ભીડ તંત્ર ઊભરી રહ્યું છે, નેતાઓ ગુનેગારોને ફાંસી આપવાનું વચન આપે છે, જ્યારે નિર્ણય લેવાનું કામ ન્યાયતંત્રનું છે

સુપ્રીમ કોર્ટના જસ્ટિસ અભય ઓકાએ રવિવારે કહ્યું કે સમાજમાં ‘ભીડ તંત્ર’ ઊભરી રહ્યું છે. કોઈ દુર્ઘટના થાય ત્યારે નેતાઓ તેનો લાભ લેવાનો પ્રયાસ કરે છે. તેઓ તે જગ્યાએ જાય છે અને જનતાને વચન આપે છે કે આરોપીઓને ફાંસીની સજા આપવામાં આવશે, પરંતુ આ નક્કી કરવાનું કામ તેમનું નથી. આ નિર્ણય લેવાની સત્તા માત્ર ન્યાયતંત્ર પાસે છે.