નવી દિલ્હી4 મિનિટ પેહલા
- કૉપી લિંક
સુપ્રીમ કોર્ટે આજે 7 નવેમ્બરના રોજ નાણાકીય સમસ્યાઓ સામે ઝઝુમી રહેલી જેટ એરવેઝના લિક્વિડેશનનો આદેશ આપ્યો છે, એટલે કે તેની સંપત્તિને વેચવાનો આદેશ આપ્યો છે. હવે જેટ એરવેઝ શરૂ થાય તેવી કોઈ શક્યતા નથી. તેની એસેટ લેન્ડર્સને આપવામાં આવશે. સુપ્રીમ કોર્ટે આ મામલે નેશનલ કંપની લો એપેલેટ ટ્રિબ્યુનલ (NCLAT)ના નિર્ણયને ફગાવી દીધો હતો.
NCLATએ માર્ચ 2024માં તેના આદેશમાં રોકડની સમસ્યાઓ સામે ઝઝુમી રહેલી જેટ એરવેઝની માલિકી માટે રિઝોલ્યુશન પ્લાન હેઠળ સંપૂર્ણ ચુકવણી કર્યા વિના જાલાન-કલરોક કન્સોર્ટિયમ (JKC)ને ટ્રાન્સફર કરવાની મંજૂરી આપી હતી. 90 દિવસમાં એરલાઇન જાલાન-કલરોક કન્સોર્ટિયમને ટ્રાન્સફર કરવાની હતી.
NCLATના આ આદેશને સ્ટેટ બેંક ઓફ ઈન્ડિયાની આગેવાની હેઠળના ધિરાણકર્તાઓએ સુપ્રીમ કોર્ટમાં પડકાર્યો હતો. સુનાવણી બાદ CJI DY ચંદ્રચુડ અને જસ્ટિસ જેબી પારડીવાલા અને જસ્ટિસ મનોજ મિશ્રાની બેન્ચે 16 ઓક્ટોબરે પોતાનો નિર્ણય સુરક્ષિત રાખ્યો હતો.
હવે જેટ એરવેઝ શરૂ થાય તેવી કોઈ શક્યતા નથી.
સમાધાન પ્લાન 5 વર્ષથી લાગુ થયો ન હતો, તેથી નિર્ણય પલટ્યો
સુપ્રીમ કોર્ટે બંધારણની કલમ 142 હેઠળ તેની અસાધારણ સત્તાનો ઉપયોગ કરીને “ગજબ અને ચિંતાજનક” પરિસ્થિતિને ધ્યાનમાં રાખીને જેટ એરવેઝને લિક્વિડેશનનો આદેશ આપ્યો. કોર્ટે આવું એટલા માટે કર્યું કારણ કે રિઝોલ્યુશન પ્લાન 5 વર્ષથી લાગુ થયો નથી.
કન્સોર્ટિયમ દ્વારા આપવામાં આવેલા 200 કરોડ રૂપિયા જપ્ત કરવાનો આદેશ
કોર્ટે NCLTની મુંબઈ બેંચને તરત જ લિક્વિડેટરની નિમણૂક કરવાનો નિર્દેશ આપ્યો હતો. જાલાન-કલરોક કોન્સોર્ટિયમ દ્વારા ચૂકવવામાં આવેલી રૂ. 200 કરોડની રકમ જપ્ત કરવામાં આવી છે.
17 એપ્રિલ 2019ના રોજ એરલાઇન બંધ થઈ ગઈ
વધતી જતી નાણાકીય મુશ્કેલીઓ વચ્ચે 17 એપ્રિલ 2019ના રોજ જેટ એરવેઝ બંધ કરવામાં આવી હતી. સ્ટેટ બેંક ઓફ ઇન્ડિયાએ આ એરલાઇનને સૌથી વધુ લોન આપી હતી, તેથી બેંકે NCLT મુંબઈ સમક્ષ કંપની સામે નાદારીની કાર્યવાહી શરૂ કરી હતી.
જેટને બાદમાં સમાધાન પ્રક્રિયામાં સામેલ કરવામાં આવ્યું હતું. જૂન 2021માં, જાલાન-કલરોક કન્સોર્ટિયમે NCLTની નાદારી રિઝોલ્યુશન પ્રક્રિયા હેઠળ જેટ એરવેઝની બિડ જીતી હતી. ત્યારથી માલિકી ટ્રાન્સફર અંગે JKC અને લેન્ડર્સ વચ્ચે વિવાદ ચાલી રહ્યો હતો.
JKCએ દાવો કર્યો હતો કે લેન્ડર્સ એરલાઇનના ટ્રાન્સફરની પ્રક્રિયા શરૂ કરી રહ્યા નથી. લેન્ડર્સે દલીલ કરી હતી કે JKCએ હજુ સુધી કોઈ ફંડ જમા કરાવ્યું નથી.
સમગ્ર મામલો ત્રણ મુદ્દામાં સમજો
- રિઝોલ્યુશન પ્લાન મુજબ, જાલાન-કલરોક કન્સોર્ટિયમને રૂ. 4783 કરોડ ચૂકવવાના હતા. કરાર મુજબ, ચુકવણીના પ્રથમ હપ્તામાં 350 કરોડ રૂપિયા જમા કરાવવાના હતા.
- કન્સોર્ટિયમે યોજના હેઠળ ₹350 કરોડમાંથી માત્ર ₹200 કરોડ જમા કરાવ્યા હતા. લેન્ડર્સે એ પણ ધ્યાન દોર્યું હતું કે JKC એર ઓપરેટર સર્ટિફિકેટ અને આંતરરાષ્ટ્રીય અધિકૃતતાઓ મેળવવા સહિત અન્ય મુખ્ય જવાબદારીઓને પૂર્ણ કરવામાં નિષ્ફળ રહી હતી.
- જેટ એરવેઝને રિવાઈવ કરવામાં લાંબા વિલંબને કારણે, એરલાઇનને તેની સંપત્તિની જાળવણી પર દર મહિને ₹22 કરોડનું નુકસાન થઈ રહ્યું હતું. વધુમાં, જેટ એરવેઝે તેના લેણદારોને આશરે ₹7,500 કરોડનું દેવું હતું, જે પરિસ્થિતિને વધુ જટિલ બનાવી છે.
મુરારી લાલ જાલાન અને કલરોક કેપિટલની સંયુક્ત કંપની
JKC મુરારી લાલ જાલાન અને કલરોક કેપિટલની સંયુક્ત કંપની છે. જાલાન દુબઈ બેસ્ડ બિઝનેસમેન છે. કલરોક કેપિટલ મેનેજમેન્ટ લિમિટેડ એ લંડન ખાતેની ગ્લોબલ ફર્મ છે જે નાણાકીય સલાહકાર અને અલ્ટરનેટિવ મેનેજમેન્ટ ક્ષેત્રે કામ કરે છે.
નરેશ ગોયલે જેટ એરવેઝની શરૂઆત કરી હતી
1990ના દાયકાની શરૂઆતમાં, ટિકિટિંગ એજન્ટમાંથી ઉદ્યોગસાહસિક બનેલા નરેશ ગોયલે જેટ એરવેઝ ઈન્ડિયા લિમિટેડ શરૂ કરીને લોકોને એર ઈન્ડિયાનો વિકલ્પ આપ્યો હતો. એક સમયે જેટ પાસે કુલ 120 વિમાનો હતા અને તે અગ્રણી એરલાઇન્સમાંની એક હતી.
જ્યારે ‘ધ જોય ઓફ ફ્લાઈંગ’ ટેગ લાઈન ધરાવતી કંપની તેની પીક પર હતી ત્યારે તે દરરોજ 650 ફ્લાઈટ્સ ઓપરેટ કરતી હતી. જ્યારે કંપની બંધ થઈ ત્યારે તેની પાસે માત્ર 16 વિમાનો જ બચ્યા હતા. માર્ચ 2019 સુધીમાં કંપનીની ખોટ 5,535.75 કરોડ રૂપિયા સુધી પહોંચી ગઈ હતી.
