14 કલાક પેહલાલેખક: ઈફત કુરૈશી
- કૉપી લિંક
બોલિવૂડની હાલની ટોપ એક્ટ્રેસ પૈકી એક દીપિકા પાદુકોણ આજે 38 વર્ષની થઈ ગઈ છે. બાળપણમાં બ્રાન્ડેડ કંપનીનું જીન્સ ખરીદવાનું સપનું જોનાર દીપિકા આજે એ જ કંપનીની બ્રાન્ડ એમ્બેસેડર છે.
16 વર્ષની એક્ટિંગ કરિયરમાં 39 ફિલ્મો કરીને 52 મોટા એવોર્ડ જીતનાર દીપિકા દરેક નવી ફિલ્મ સાથે વિવાદને કારણે ચર્ચામાં રહી છે. ‘ગોલિયોં કી રાસલીલાઃ રામ-લીલા’ના ટાઇટલનો વિવાદ હોય, ‘પદ્માવત’માં નાક કાપવા બદલ ઈનામ રાખવાનો વિવાદ હોય કે ‘પઠાન’ને લગતી કેસરી બિકીની.
મોટા વિવાદો છતાં દીપિકાની ત્રણેય ફિલ્મો બ્લોકબસ્ટર સાબિત થઈ હતી. જો કે, વર્ષ 2019માં દીપિકાની જેએનયુ મુલાકાતની સીધી અસર તેમની ફિલ્મ ‘છપાક’ ઉપર પડી અને ફિલ્મ બોક્સ ઓફિસ પર ફ્લોપ સાબિત થઇ હતી.
ઘણા ઉતાર-ચઢાવ સાથે દીપિકાએ ફિલ્મદ્યોગમાં 16 સફળ વર્ષ પૂરાં કર્યાં, 39 ફિલ્મો આપી અને 52 એવોર્ડ જીત્યા. વર્ષ 2023માં, દીપિકા એકમાત્ર એવી અભિનેત્રી હતી જેમણે બે બ્લોકબસ્ટર ફિલ્મો ‘જવાન’ અને ‘પઠાન’થી લગભગ રૂ. 2200 કરોડનું બોક્સ ઓફિસ કલેક્શન કર્યું હતું.
2023 માં જે અભિનેત્રી સૌથી વધુ વિવાદમાં રહી તે પણ દીપિકા છે. પછી તે તેની ભગવી બિકીની હોય, છૂટાછેડાની અફવા હોય કે પછી કોફી વિથ કરનમાં આપેલું નિવેદન હોય. આટલા બધા વિવાદો છતાં દીપિકા છેલ્લા 10 વર્ષથી ટોચની અભિનેત્રીઓમાં સામેલ છે.
આજે દીપિકાના જન્મદિવસના ખાસ અવસર પર જાણીએ એક શરમાળ છોકરીની કહાની જે બાળપણમાં વાત કરવામાં સંકોચ અનુભવતી હતી તે આજે ટોપની અભિનેત્રી બની છે અને તેમની કારકિર્દીના 5 સૌથી મોટા વિવાદો-
શાહરુખે 3 વર્ષ પછી હિટ ફિલ્મ આપી
વર્ષ 2023 દીપિકા માટે ખૂબ જ ખાસ રહ્યું છે. 2023માં તેની બે ફિલ્મો ‘જવાન’ અને ‘પઠાન’ રિલીઝ થઈ હતી અને બંને ફિલ્મોએ રેકોર્ડ બ્રેક કમાણી કરીને ઘણા મોટા રેકોર્ડ બનાવ્યા હતા. ખાસ વાત એ છે કે, દીપિકા પાદુકોણની અગાઉ રિલીઝ થયેલી 3 ફિલ્મો ‘છપાક’, ’83’ અને ‘ગહરિયાં’ કંઈ ખાસ કરી શકી ન હતી.શાહરુખને દીપિકાનો લકી ચાર્મ કહેવું ખોટું નહીં હોય, કારણ કે દીપિકાએ શાહરુખ સાથે 2007માં આવેલી ફિલ્મ ‘ઓમ શાંતિ ઓમ’માં ડેબ્યૂ કર્યું હતું અને બોલિવૂડમાં એન્ટ્રી કરી હતી. બંને અત્યાર સુધી 5 ફિલ્મોમાં જોવા મળ્યા છે અને પાંચેય ફિલ્મો સુપરહિટ રહી હતી.
શાહરુખે છેતરપિંડી કરીને ‘જવાન’ ફિલ્મ સાઈન કરાવી હતી
દીપિકાએ 2023ની બ્લોકબસ્ટર ફિલ્મ ‘જવાન’માં શાહરુખની માતાની ભૂમિકા ભજવી હતી. શાહરુખને લાગ્યું કે દીપિકા આ રોલ માટે ક્યારેય સંમત નહીં થાય, તેથી તેમણે દીપિકાને સંમતિ આપે તે માટે તેમને ખોટું કહ્યું હતું.
દીપિકા ફિલ્મ ‘પઠાન’ના ગીત ‘બેશરમ રંગ’નું શૂટિંગ કરી રહી હતી, ત્યારે શાહરુખે સેટ પર એટલીને બોલાવ્યા હતા. ‘પઠાન’ના સેટ પર એટલીએ દીપિકાને ‘જવાન’ની સ્ક્રિપ્ટ સંભળાવી અને તેને અહેસાસ કરાવ્યો કે ફિલ્મમાં તેમની ભૂમિકા કેટલી જરૂરી છે.
શાહરુખે દીપિકાને કહ્યું હતું કે તેને ફિલ્મમાં કેમિયો રોલ કરવાનો હતો, પરંતુ ખોટું બોલીને તેમણે લાંબો સ્ક્રીન ટાઈમ આપ્યો હતો. ‘જવાન’ની સક્સેસ ઈવેન્ટમાં શાહરુખે પોતે આ વાત કહી હતી.
દીપિકા પાદુકોણ 2023માં આ વિવાદોને કારણે ચર્ચામાં રહી
કેસરી બિકીની વિવાદ- દીપિકા પાદુકોણે ફિલ્મ ‘પઠાન’થી વર્ષની શરૂઆત કરી હતી. 25 જાન્યુઆરી 2023ના રોજ રિલીઝ થયેલી આ ફિલ્મનું ગીત ‘બેશરમ રંગ’ વિવાદમાં આવ્યું હતું. આ ગીતમાં દીપિકાએ કેસરી રંગની બિકીની પહેરી હતી, જેમાં ગીતના શબ્દો હતા ‘બેશરમ રંગ’. ફિલ્મ અંગે બહિષ્કારનો ટ્રેન્ડ શરૂ થયો હતો. દેવી-દેવતાઓ દ્વારા પહેરવામાં આવતા ભગવા રંગને ફિલ્મમાં ‘બેશરમ’ કહેતા લોકોએ નિર્માતાઓ પર ધાર્મિક ભાવનાઓને ઠેસ પહોંચાડવાનો આરોપ લગાવ્યો.
મધ્યપ્રદેશના ઈન્દોર શહેરમાં એટલી હદે અંધાધૂંધી હતી કે, પહેલો શો કેન્સલ કરવો પડ્યો હતો. યુપી અને બિહારમાં પણ ઘણી જગ્યાએ ફિલ્મના પોસ્ટરો ફાડવામાં આવ્યાં હતાં અને સળગાવી દેવામાં આવ્યા હતાં. સ્થિતિ એવી હતી કે, ઘણી જગ્યાએ થિયેટરોની બહાર પોલીસ બંદોબસ્ત ગોઠવવો પડ્યો હતો. બજરંગ દળ અને વિશ્વ હિન્દુ પરિષદના કાર્યકર્તાઓએ કહ્યું કે, જો ફિલ્મ રિલીઝ થશે તો તેઓ થિયેટરોને સળગાવી દેશે. માત્ર ઉત્તર ભારતમાં જ નહીં, દક્ષિણનાં રાજ્યોમાં પણ ફિલ્મનો ભારે વિરોધ થયો હતો.
‘કોફી વિથ કરન’નું વિવાદાસ્પદ નિવેદન – દીપિકા પાદુકોણ પોતાના પતિ રણવીર સિંહ સાથે ‘કોફી વિથ કરન’ની 8મી સિઝનમાં પહોંચી હતી. તેણે શોમાં કહ્યું હતું કે, તે ‘રણવીરની સાથે અન્ય ઘણા લોકોને ડેટ કરી રહી છે, પરંતુ તે માનસિક રીતે રણવીર માટે કમિટમેન્ટ છે.’ નિવેદન સામે આવતાં જ લોકોએ દીપિકાના પાત્ર પર સવાલો ઉઠાવવાનું શરૂ કરી દીધું અને થોડી જ વારમાં તે મેમ મટીરિયલ બની ગઈ હતી.
દીપિકાની ફિલ્મોમાંની જર્ની પર એક નજર-
દીપિકાનો જન્મ ભારતમાં નહીં પણ ડેનમાર્કમાં થયો હતો
દીપિકા પાદુકોણનો જન્મ 5 જાન્યુઆરી, 1986ના રોજ ડેનમાર્કના કોપનહેગનમાં થયો હતો. તેમના પિતા પ્રકાશ પાદુકોણ ભારતના પ્રખ્યાત બેડમિન્ટન ખેલાડી છે, જ્યારે તેમના માતા ઉજ્જવલા ટ્રાવેલ એજન્ટ છે. દીપિકાને એક નાની બહેન અનીશા પણ છે. દીપિકા માત્ર 1 વર્ષની હતી જ્યારે તેનો પરિવાર ડેનમાર્કથી ભારત આવ્યો હતો.
પિતા પ્રકાશ અને માતા ઉજ્જવલા સાથે નાની દીપિકા
સંકોચને કારણે બાળપણમાં મિત્રો બનાવી શક્યા નહીં
બેંગલુરુની સોફિયા હાઈસ્કૂલમાં અભ્યાસ કરતી વખતે દીપિકા ખૂબ જ શરમાળ હતી. શ્યામ રંગ અને નાજુક શરીર ધરાવતી દીપિકામાં આત્મવિશ્વાસનો એટલો અભાવ હતો કે તે લોકો સાથે વાત કરવામાં પણ અચકાતી હતી. આ જ કારણ હતું કે તેમણે બાળપણમાં ક્યારેય મિત્રતા નથી કરી.
દીપિકા લિયોનાર્ડોની તસવીરને કિસ કરીને સૂઈ જતી હતી
દીપિકા પાદુકોણ બાળપણથી જ હોલિવૂડ એક્ટર લિયોનાર્ડો ડી કેપ્રિયોની મોટી ફેન હતી. તેમના રૂમમાં લિયોનાર્ડોની તસવીરો પણ હતી, જેને તે દરરોજ સૂતા પહેલાં કિસ કરતી હતી. કોને ખબર હતી કે દીપિકા પોતે ઈન્ટરનેશનલ સ્ટાર બની જશે.
દીપિકા પાદુકોણના પિતા પ્રકાશ પાદુકોણ એક પ્રખ્યાત ટેનિસ ખેલાડી હતા, જેઓ ઘણી હસ્તીઓ સાથે વાતચીત કરતા હતા. એકવાર આમિર ખાને પ્રકાશ પાદુકોણને પરિવાર સાથે પોતાના ઘરે બોલાવ્યા હતા. દીપિકા તેમના પિતા, માતા અને બહેન સાથે આમિરના ઘરે પહોંચી હતી. તે સમયે આમિર જમતો હતો અથવા દીપિકાના શબ્દોમાં કહીએ તો તે દહીં અને ભાત ખાઈ રહ્યો હતો.
13 વર્ષની દીપિકા તેમની સામે બેઠી હતી, પરંતુ ખાવામાં વ્યસ્ત આમિરે તેમને એક વાર પણ પૂછ્યું નહીં કે તેમને ભૂખ લાગી છે કે નહીં. દીપિકાને બહુ ભૂખ લાગી હતી, પણ તે ચૂપચાપ બેસી રહી. આ સ્ટોરી ખુદ દીપિકા પાદુકોણે સોશિયલ મીડિયા પર શેર કરી હતી.
બાળપણમાં જીતેલી ટ્રોફી અને પ્રમાણપત્રો સાથે પોઝ આપતી દીપિકા
પિતાના દબાણ કારણે પ્રેક્ટિસ કરવા માટે સવારે 5 વાગ્યે ઊઠતી હતી
દીપિકા પાદુકોણના પિતા પ્રકાશ પાદુકોણ આંતરરાષ્ટ્રીય બેડમિન્ટન ખેલાડી હતા, જ્યારે તેમના દાદા રમેશ પાદુકોણ મૈસુર બેડમિન્ટન એસોસિએશનના સચિવ હતા. પ્રકાશ હંમેશા ઇચ્છતા હતા કે તેમની મોટી પુત્રી દીપિકા તેની આગેવાનીને અનુસરે અને બેડમિન્ટનમાં કારકિર્દી બનાવે.
હંમેશા એકલી અને મૌન રહેનારી દીપિકાને બેડમિન્ટનમાં કોઈ રસ નહોતો, પરંતુ જ્યારે તેમના પિતાએ તેના પર દબાણ કર્યું ત્યારે તેમને બેડમિન્ટનની પ્રેક્ટિસ શરૂ કરવાની ફરજ પડી હતી. તે દરરોજ સવારે 5 વાગે ઉઠતી અને પોતાના પિતા સાથે પ્રેક્ટિસ કરતી હતી.
10માં બેડમિન્ટન છોડ્યું અને મોડલિંગ શરૂ કર્યું
બેડમિન્ટનની પ્રેક્ટિસ મન વગર શરૂ થઈ અને દીપિકા ઘણી રાષ્ટ્રીય ચેમ્પિયનશિપનો ભાગ રહી હતી. થોડા સમય પછી તેમણે બેઝબોલમાં પણ હાથ અજમાવ્યો હતો. આ સમય દરમિયાન દીપિકા પાસે બીજી કોઈ વસ્તુ માટે સમય નહોતો.
સવારે 5 વાગ્યે પ્રેક્ટિસ કરે પછી સ્કૂલ અને પછી ઘરે પાછા ફરીને પ્રેક્ટિસ કરતી હતી. પિતાની સલાહ પર જ દીપિકા બેડમિન્ટન રમીને કંટાળી ગઈ હતી.એક દિવસ દીપિકાએ હિંમત એકઠી કરી અને પોતાની લાગણી તેમના પિતાને જણાવી હતી.સદભાગ્યે તે સંમત થઈ ગયા અને દીપિકાએ 10માં બેડમિન્ટન છોડી દીધું હતું.
મોડલિંગ કરિયરની શરૂઆત 2004માં થઈ હતી, નસીબજોગે તે ફિલ્મોમાં આવી
પિતાને સમજાવ્યા બાદ દીપિકાએ 10મા ધોરણ પછી જ મોડલિંગની દુનિયામાં પ્રવેશ કર્યો. તે કોરિયોગ્રાફર અને ફેશન સ્ટાઈલિશ પ્રસાદ બિડાપા માટે મોડલિંગ કરતી હતી. દીપિકાએ શાળાનો અભ્યાસ પૂર્ણ કર્યો કે તરત જ દીપિકાએ સમાજશાસ્ત્રમાં ડિગ્રી મેળવવા માટે ‘ઇન્દિરા ગાંધી નેશનલ યુનિવર્સિટી’માં પ્રવેશ લીધો હતો.
મોડેલિંગ કરિયર માટે અભ્યાસ છોડી દીધો
બધું બરાબર ચાલી રહ્યું હતું, પરંતુ પછી દીપિકાને ઘણા મોડેલિંગ પ્રોજેક્ટ્સ મળવા લાગ્યા, જેના કારણે તેને અભ્યાસ અને મોડેલિંગ વચ્ચે બેલેન્સ કરવું મુશ્કેલ બન્યું. આ સ્થિતિમાં તેમણે પોતાનો અભ્યાસ અધૂરો છોડીને મોડલિંગ પર ધ્યાન કેન્દ્રિત કર્યું હતું.
તેમના 16માં બર્થડે પર પિતાએ જે જીન્સ અપાવ્યું હતું, આજે બ્રાન્ડ એમ્બેસેડર છે
દીપિકા પાદુકોણે એક ઇન્ટરવ્યૂમાં જણાવ્યું હતું કે, તે તેમના 16મા જન્મદિવસ પર તેની પ્રથમ લેવિસ જીન્સ ખરીદીને ખૂબ જ ખુશ છે. તેમના પિતા તેમને શાળામાંથી લઈને સીધા બેંગલુરુના બ્રિગેડ રોડ પરના એક સ્ટોરમાં લઈ ગયા. લેવિસની બ્રાન્ડ એમ્બેસેડર બન્યા બાદ દીપિકાએ આ વાર્તા સંભળાવી હતી. દીપિકા પહેલી ભારતીય સેલિબ્રિટી છે, જે લેવિસની ગ્લોબલ બ્રાન્ડ એમ્બેસેડર છે.
વર્ષ 2004માં દીપિકા લિરિલ સોપની જાહેરાતમાં જોવા મળી હતી. 18 વર્ષની દીપિકાને આ એડથી ઓળખ મળી અને તેને ઘણી બ્રાન્ડ્સની એડમાં કામ મળવા લાગ્યું.
19 વર્ષની ઉંમરે ‘મોડલ ઓફ ધ યર’ એવોર્ડ જીત્યો
2005માં ‘લેક્મે ફેશન વીક’માં જ્યારે દીપિકાએ રનવે ડેબ્યૂ કર્યું ત્યારે મોડલિંગ કરિયરની શરૂઆત થઈ હતી. ડિઝાઇનર સુનીત વર્મા માટે તેણે કરેલા રનવે વોકની ખૂબ પ્રશંસા થઈ હતી. આ પછી તેણે કિંગફિશર મોડલ એવોર્ડ્સમાં ‘મોડલ ઓફ ધ યર’નો એવોર્ડ મળ્યો હતો.
ડિઝાઇનર વેન્ડેલ રોડરિકે તેની સરખામણી ઐશ્વર્યા સાથે કરી હતી
દીપિકા છેલ્લા કેટલાક સમયથી જ્વેલરી ડિઝાઈનિંગ શીખી રહી હતી, જ્યાં તેમને ફેશન ડિઝાઈનર વેન્ડેલ રોડરિક દ્વારા તાલીમ આપવામાં આવી હતી. એક દિવસ વેન્ડેલે દીપિકાને મેટ્રિક્સ ટેલેન્ટ એજન્સીમાં જોડાવાનું કહ્યું હતું. વેન્ડેલે દીપિકાને જોયા બાદ કહ્યું હતું કે, ‘ઐશ્વર્યા પછી પહેલીવાર મેં આટલી સુંદર અને તાજા ચહેરાવાળી છોકરી જોઈ છે. વેન્ડેલ દીપિકાના મોડેલિંગ મેન્ટર હતા.
મોડલિંગ કરિયર માટે 21 વર્ષની ઉંમરે મુંબઈ પહોંચી
21 વર્ષની ઉંમરે દીપિકા ‘મેટ્રિક્સ ટેલેન્ટ એજન્સી’માં જોડાવા માટે બેંગલુરુથી મુંબઈ શિફ્ટ થઈ હતી. તે પોતાની આંટી સાથે રહેતી હતી. એજન્સી દ્વારા જ દીપિકાને 2006માં હિમેશ રેશમિયાનું ગીત ‘નામ હૈ તેરા’ મળ્યું હતું. આ ગીત ચાર્ટબસ્ટર હતું અને દીપિકાને ઈન્ડસ્ટ્રીમાં ઓળખ મળી હતી.
યોગાનુયોગ દીપિકાને ‘ઓમ શાંતિ ઓમ’ મળી, મલાઈકા અરોરા લીડ રોલમાં હતી
વર્ષ 2006માં ફરાહ ખાન તેની દિગ્દર્શિત ફિલ્મ ‘હેપ્પી ન્યૂ યર’ માટે નવા ચહેરાની શોધમાં હતી. તેમણે મલાઈકા અરોરા પાસે મદદ માગી હતી. થોડા સમય પછી મલાઈકાએ આ વાત તેમના મિત્ર અને મોડલિંગ મેન્ટર રોડરિકને કહી હતી, જે તે સમયે દીપિકાના મેન્ટર પણ હતા. રોડરિકે મલાઈકાને દીપિકાનું નામ સૂચવ્યું અને તેમને ‘નામ હૈ તેરા’ ગીત જોવા માટે કહ્યું હતું.
દીપિકાને ‘ઓમ શાંતિ ઓમ’ નહીં, ‘હેપ્પી ન્યૂ યર’માં કાસ્ટ કરવામાં આવી હતી
મલાઈકાએ ફરાહને પણ આ જ વાત કહી. ગીત જોયા પછી ફરાહ દીપિકાને મળી અને ઓડિશન પછી તેને ફિલ્મ ‘હેપ્પી ન્યૂ યર’માં સાઈન કરી.
હેમા માલિની અને હેલનની ફિલ્મો જોઈને એક્ટિંગ શીખી
ફરાહ ખાન ફિલ્મ ‘હેપ્પી ન્યૂ યર’નું શૂટિંગ શરૂ કરવાની હતી, પરંતુ પછી તેમણે ‘ઓમ શાંતિ ઓમ’માં કામ કરવાનું શરૂ કર્યું. તેમણે આ ફિલ્મમાં દીપિકાને શાહરુખ ખાન સાથે કામ કરાવ્યું હતું. 2007માં રિલીઝ થયેલી ફિલ્મ ‘ઓમ શાંતિ ઓમ’માં શાંતિપ્રિયાનો રોલ કરવા માટે દીપિકાએ હેલન અને હેમા માલિનીની ફિલ્મો જોઈને આ રોલ માટે તૈયારી કરી હતી.
રણબીર અને દીપિકાની ડેબ્યુ ફિલ્મો એક જ તારીખે સાથે રિલીઝ થઈ હતી
2007ની ફિલ્મ બ્લોકબસ્ટર સાબિત થઈ હતી, જેની રણબીર કપૂર અને સોનમ કપૂરની પ્રથમ ફિલ્મ ‘સાંવરિયા’ સાથે બોક્સ ઓફિસની ટક્કર હતી. બંને ફિલ્મો 9 નવેમ્બર, 2007ના રોજ રિલીઝ થઈ હતી અને બંને હિટ રહી હતી. યોગાનુયોગ બંનેને આગામી ફિલ્મ ‘બચના એ હસીનોં’માં સાથે કામ મળ્યું. 2008માં આવેલી ફિલ્મના શૂટિંગ દરમિયાન બંને એકબીજાને પસંદ કરવા લાગ્યા અને રિલેશનશિપમાં આવી ગયા.
થોડા મહિનાઓમાં દીપિકાએ ખુલ્લેઆમ તેના પ્રેમની જાહેરાત કરી અને તેના ગળા પર આરકે (રણબીર કપૂર)નું કાયમી ટેટૂ કરાવ્યું. ટેટૂને લઈને ઘણી ચર્ચા થઈ હતી, પરંતુ તેના કરતાં પણ વધારે ચર્ચા રણબીર અને કેટરીનાના લિન્ક-અપની હતી. દીપિકાએ રણબીર પર છેતરપિંડીનો આરોપ લગાવ્યો હતો. રણબીર સાથેના બ્રેકઅપ બાદ દીપિકા ડિપ્રેશનમાં હતી.
ઘણી વખત આત્મહત્યાના વિચાર આવ્યા
કરિયર ટોપ પર હોવા છતાં દીપિકા પાદુકોણ ડિપ્રેશનમાં હતી. તેમણે લોકોને મળવાનું અને ઘરની બહાર નીકળવાનું પણ ઓછું કર્યું હતું. તેમને માત્ર સૂવું ગમતું હતું કારણ કે તે માનતી હતી કે, બચવા માટેનો આ માર્ગ છે. ઘણી વખત દીપિકા એકલી હોય ત્યારે આપઘાતના વિચાર પણ કરી લેતી હતી.
જ્યારે પણ દીપિકાના માતા-પિતા તેમની પાસે આવતા ત્યારે તે એવું વર્તન કરતી હતી કે, જાણે બધું બરાબર છે. એક ઈવેન્ટમાં ડિપ્રેશન વિશે ખૂલીને વાત કરતા દીપિકાએ કહ્યું હતું કે, એકવાર મારા પેરેન્ટ્સ બેંગ્લોરથી મુંબઈ આવ્યા હતા. હું તેમની સાથે રહી હતી, પણ જે દિવસે તેઓ પરત ગયા ત્યારે હું ખૂબ જ રડી હતી. આ જોઈને મારી માતાએ મને પૂછ્યું કે શું મારા બોયફ્રેન્ડને કારણે કંઈક થયું છે? કોઈએ કંઈ કહ્યું છે? શું ઉદ્યોગમાં કંઈક થયું છે? દેખીતી રીતે દીપિકા પાસે આ સવાલોના જવાબ નહોતા, કારણ કે તે પોતે કારણ જાણતી ન હતી.
દીપિકાની માતાને ખબર પડી કે તેને ડૉક્ટરની જરૂર છે. પોતાની માતાની મદદથી દીપિકાએ હિંમતભેર હતાશાનો સામનો કર્યો અને શાનદાર કમબેક કર્યું. દીપિકાએ ન માત્ર કમબેક કર્યું પરંતુ આજે તે ડિપ્રેશન વિરોધી સંસ્થા ‘લિવ લવ લાઈફ’ ચલાવે છે, જેના દ્વારા તે ડિપ્રેશનથી પીડિત લોકોને મદદ કરે છે. દીપિકાને વર્ષ 2020 માં માનસિક સ્વાસ્થ્ય જાગૃતિ ફેલાવવા બદલ વર્લ્ડ ઈકોનોમિક ફોરમ તરફથી ‘ક્રિસ્ટલ એવોર્ડ’ મળ્યો છે.
પહેલીવાર કોઈ ગીતથી વિવાદમાં આવી
ડિપ્રેશન સામે લડતી વખતે દીપિકાની અનેક ફિલ્મો ફ્લોપ રહી હતી. આ પછી દીપિકા કોઈ ફિલ્મથી નહીં પરંતુ એક ગીત દ્વારા ચર્ચામાં આવી ગઈ હતી. આ ગીત 2011માં આવેલી ફિલ્મ ‘દમ મારો દમ’નું ટાઈટલ સોંગ હતું.
ગીતની એક લાઇન વિવાદ અને વિરોધનું કારણ બની હતી. દીપિકાનો સિઝલિંગ અવતાર અને ગીતના શબ્દો જોઈને એવું કહેવામાં આવ્યું કે, આ હિન્દી સિનેમાના ઇતિહાસનું સૌથી વાઈલ્ડ ગીત છે. ગીતને કારણે દીપિકા સામે કોર્ટ કેસ પણ થયો હતો. તે જ વર્ષે તેની વધુ બે ફિલ્મો ‘આરક્ષણ’ અને ‘દેશી બોયઝ’ ફ્લોપ થઈ હતી.
કરિયરની બીજી ઈનિંગ 2012માં ‘કોકટેલ’થી શરૂ થઈ હતી
દીપિકા પાદુકોણે 2012માં આવેલી ફિલ્મ ‘કોકટેલ’થી જબરદસ્ત કમબેક કર્યું હતું. તેને ‘વેરોનિકા’ અને ‘મીરા’ની ભૂમિકાઓમાંથી એકની પસંદગી કરવાની હતી, પરંતુ તેણે ‘વેરોનિકા’ની બોલ્ડ અને પડકારજનક ભૂમિકા ભજવી. પછી ‘રેસ 2’, ‘ચેન્નાઈ એક્સપ્રેસ’ અને ‘યે જવાની હૈ દીવાની’ જેવી હિટ ફિલ્મો આપી હતી.
સંજય લીલા ભણસાલીએ 2013માં તક આપી હતી
ઐશ્વર્યા અને કરીનાએ ફિલ્મ રિજેક્ટ કર્યા બાદ સંજય લીલા ભણસાલીએ ફિલ્મ ‘ગોલિયોં કી રાસલીલાઃ રામલીલા’માં પ્રિયંકાને લીલાનો રોલ આપ્યો હતો. જોકે તે આનાથી સંતુષ્ટ નહોતા. એક દિવસ તે સ્ક્રિપ્ટ લઈને દીપિકા પાદુકોણના ઘરે પહોંચ્યા હતા.
તે સમયે દીપિકા બીમાર હતી અને સંજયના આવવા પહેલાં તૈયાર થઈ શકી નહોતી. સંજયને બીમાર દીપિકાનો લુક એટલો ગમ્યો કે તેમણે તરત જ તેને ફિલ્મની ઓફર કરી. બીજી તરફ, આ ફિલ્મ પાકિસ્તાની અભિનેતા ઈમરાન ખાન અને સુશાંત પછી રણવીર સિંહ પાસે ગઈ હતી.
સેટ પર નિકટતા વધી, કિસિંગ સીન દ્વારા નજીક આવી
આ ફિલ્મમાં દીપિકાએ 30 કિલો વજનનો લહેંગા પહેર્યો હતો. સેટ પર સાથે સમય પસાર કરતી વખતે, દીપિકા અને રણવીર પહેલા મિત્રો બન્યા અને પછી એક કિસિંગ સીન દ્વારા નજીક આવ્યા.
જ્યારે સંજય લીલા ભણસાલીએ ફિલ્મ રામલીલાનું ટાઇટલ આપ્યું હતું, તેની જાહેરાત પછી તરત જ વિવાદ શરૂ થયો હતો. રામલીલા ટાઇટલ સાથે બોલ્ડ લવ સ્ટોરી બતાવવામાં આવતાં હિન્દુ સંગઠનોએ જોરદાર વિરોધ કર્યો હતો.
રસ્તાઓ પર રેલીઓ કાઢવામાં આવી હતી અને ફિલ્મ પર પ્રતિબંધ મૂકવાની માગ કરવામાં આવી હતી. આ વિવાદ વચ્ચે દીપિકા પાદુકોણ, નિર્દેશક સંજય લીલા ભણસાલી અને રણવીર સિંહ વિરુદ્ધ જાલંધરમાં ફરિયાદ પણ દાખલ કરવામાં આવી હતી.વિવાદોથી બચવા માટે નિર્માતાઓએ રામલીલાનું શીર્ષક બદલીને ‘ગોલિયોં કી રાસલીલા: રામ-લીલા’ કર્યું.
રાણી પદ્માવતી બન્યા બાદ તેમનું નાક કાપી નાખવાની અને જાનથી મારી નાખવાની ધમકીઓ મળી હતી
દીપિકાએ 2018ની ફિલ્મ ‘પદ્માવત’માં રાણી પદ્માવતીની ભૂમિકા ભજવી હતી. જોધપુરમાં શૂટિંગ દરમિયાન ધાર્મિક સંગઠનોએ સેટમાં તોડફોડ કરી અને શૂટર્સને મારી નાખવાની ધમકી આપી.
આ દરમિયાન ડિરેક્ટર સંજય લીલા ભણસાલીનું મોઢું કાળું કરવામાં આવ્યું હતું અને તેમની સાથે મારપીટ કરવામાં આવી હતી. કારણ એ હતું કે, ફિલ્મનું ટાઈટલ ‘પદ્માવતી’ હતું. વિવાદોથી બચવા માટે મેકર્સે પદ્માવતીનું ટાઈટલ બદલીને ‘પદ્માવત’ કરવું પડ્યું. ફિલ્મનું ગીત ઘૂમર રિલીઝ થતાની સાથે જ વિવાદો વધી ગયા છે.
ગીતમાં રાણી પદ્માવતીનું પાત્ર ભજવનાર દીપિકાને લોકો સહન કરી શક્યા નહીં, પુરુષોની સામે ડાન્સ કરીને કમર બતાવી. લોકોના ટોળાએ રસ્તાઓ પર પ્રદર્શન કર્યું અને અભિનેત્રીને જાનથી મારી નાખવાની ધમકીઓ પણ મળી.
કરણી સેનાના લોકોએ દીપિકાનું નાક કાપી નાખવાની ધમકી પણ આપી હતી. એવા સમાચાર પણ ફેલાઈ ગયા કે જે વ્યક્તિ દીપિકાનું નાક કાપશે તેને ઈનામ મળશે. આવી સ્થિતિમાં દીપિકાને સુરક્ષા આપવામાં આવી હતી. આખરે, સેન્સર બોર્ડની સૂચના પર દીપિકાનું પેટ એડિટિંગ દ્વારા છુપાવવામાં આવ્યું હતું અને ટાઇટલ બદલવામાં આવ્યું હતું.
જેએનયુ વિરોધમાં પહોંચી ત્યારે ફિલ્મ ‘છપાક’ ફ્લોપ થઈ ગઈ હતી
2020માં ‘છપાક’ની રિલીઝ પહેલાં જ દીપિકા જેએનયુ પ્રોટેસ્ટનો ભાગ બની હતી. દીપિકાને ડાબેરી ગણાવીને તેના પર અનેક આરોપો લગાવવામાં આવ્યા હતા. પરિણામ એ આવ્યું કે વિવાદો વચ્ચે, KA પ્રોડક્શન હેઠળ બનેલી દીપિકાની પ્રથમ ફિલ્મ ‘છપાક’ ખરાબ રીતે ફ્લોપ થઈ હતી.
2018માં લગ્ન, 2024માં ફેમિલી પ્લાનિંગ કરશે
વર્ષ 2015માં જ રણવીરે દીપિકાને લગ્ન માટે પ્રપોઝ કર્યું હતું અને તેની સાથે ગુપ્ત રીતે સગાઈ કરી લીધી હતી. બંનેએ 2018 માં લગ્ન કર્યા હતા અને હવે તાજેતરમાં જ દીપિકાએ જણાવ્યું છે કે તે ફેમિલી પ્લાનિંગ કરી રહી છે.
દીપિકા પાદુકોણ એક બિઝનેસવુમન છે
- 2013 માં, દીપિકાએ વેન હ્યુસેન સાથે કોલિબ્રેશન કર્યું હતું અને કપડાંનું કલેક્શન લોન્ચ કર્યું.
- 2015માં દીપિકાએ Myntra સાથે All About You ક્લોથિંગ બ્રાન્ડ લોન્ચ કરી.
- દીપિકાએ કેએ એન્ટરપ્રાઇઝ દ્વારા આંતરરાષ્ટ્રીય ખાદ્ય પુરવઠામાં સ્થાન બનાવ્યું છે. આ એપિજેમિયા નામનો દહીં અને ફ્રોઝન ફૂડ બિઝનેસ છે. આ સિવાય દીપિકા ઇલેક્ટ્રિક ટેક્સી, બ્લુ સ્માર્ટથી પણ કમાણી કરે છે.
- 2022માં દીપિકાએ ’82 ડિગ્રી ઈસ્ટ બ્રાન્ડ’ નામ સાથે સ્કિનકેર પ્રોડક્ટ્સ શરૂ કરી છે.
દીપિકા ઘણી પ્રોપર્ટીની માલિક છે
2021માં દીપિકાએ અલીબાગમાં 22 કરોડ રૂપિયાનું હોલિડે હોમ ખરીદ્યું હતું. અહીં બે બંગલા ઉપરાંત આ કપલના નારિયેળ અને સોપારીના બગીચા પણ છે. ઓગસ્ટ 2021 માં, દીપિકાએ તેના હોમટાઉન બેંગલુરુમાં એક સર્વિસ એપાર્ટમેન્ટ ખરીદ્યું. 2010માં દીપિકાએ મુંબઈના પ્રભાદેવી વિસ્તારમાં 4BHK ફ્લેટ ખરીદ્યો હતો, જેની કિંમત 20 કરોડ રૂપિયા છે. દીપિકાએ શાહરુખ ખાનના ઘર મન્નત પાસે નવું ઘર પણ ખરીદ્યું છે.
