મોરબી જિલ્લા પંચાયતના ચેરમેન અજય લોરિયા.
Related posts
ગત શનિવારે મોરબીમાં મોરબી જિલ્લા પંચાયતના એક ચેરમેને પોતાની ઓફિસે પત્રકાર પરિષદ કરી હતી અને ત્યારે ના માત્ર મોરબી પરંતુ ગુજરાતમાં સિનિયર ધારાસભ્યોમાં જેની ગણતરી કરવામાં આવે છે તેવા મોરબીના ભાજપના ધારાસભ્ય ઉપર ગંભીર પ્રકારના આક્ષેપો કરવામાં આવ્યા હતા.
.
આમંત્રણ પત્રિકામાં ચેરમેનનું નામ ન હોવાથી થયો વિવાદ મોરબી જિલ્લામાં ભાજપમાં જૂથવાદ ચાલી રહ્યો છે તેમાં શંકાને કોઈ સ્થાન નથી. તેવામાં ગત શનિવારે મોરબી જિલ્લા પંચાયત દ્વારા જુદા જુદા 4.18 કરોડના વિકાસ કામોનું લોકાર્પણ અને ખાતમુહૂર્ત કરવા માટેનો કાર્યક્રમ રાખવામાં આવેલો હતો અને આ કાર્યક્રમની આમંત્રણ પત્રિકામાં મોરબી જિલ્લા પંચાયતના ચેરમેન અજય લોરિયાનું નામ ન હોવાથી શુક્રવારે સાંજના સમયે જુદા જુદા સમાચાર માધ્યમોમાં આમંત્રણ પત્રિકામાં નામ ન હોવાથી નવા જૂની થશે તેવા સમાચારો પ્રસિદ્ધ થયા હતા.
’30 વર્ષથી મોરબીના ધારાસભ્ય હોવા છતાં આ દુર્દશા’ ત્યાર બાદ બીજા દિવસે એટલે કે શનિવારે ભાજપમાંથી ચૂંટાયેલા મોરબી જિલ્લા પંચાયતની સિંચાઈ સમિતિના ચેરમેન અજય લોરીયાએ તેની ઓફિસે પત્રકાર પરિષદ કરી હતી. જેમાં તેને પોતે જ જે આમંત્રણ કાર્ડને લઈને વિવાદ શરૂ થયો હતો તેનો છેદ પોતે જ પોતાની વાતમાં ઉડાવી દીધો હતો અને કાર્ડમાં તેનું નામ ન હોવાથી શરૂ થયેલ વાતને પોતે જ ગૌણ ગણાવી હતી. મોરબીના ધારાસભ્ય કાંતિ અમૃતિયા ઉપર સીધું નિશાન તાકવામાં આવ્યું હતું અને “છેલ્લા 30 વર્ષથી મોરબીના ધારાસભ્ય હોવા છતાં પણ મોરબીની દુર્દશા છે અને તે મોરબીના ધારાસભ્યને ધારાસભ્ય ગણતા જ નથી તે સહિતની વગેરે વાતો કરી હતી.
‘લોકોની દુકાનો બંધ થતાં પેટમાં તેલ રેડાયું’ ત્યાર બાદ જિલ્લા પંચાયતના ભાજપના જ ચેરમેને આક્ષેપો કરેલ હોવાથી આ બાબતે મોરબી માળિયાના ધારાસભ્ય કાંતિ અમૃતિયાએ પ્રતિક્રિયા આપતા કહ્યું હતું કે, “કેટલાક લોકોની દુકાનો છેલ્લા ઘણા સમયથી બંધ થઈ ગઈ છે જેથી તેના પેટમાં તેલ રેડાયું છે. જોકે મોરબીના લોકોની સલામતી જળવાઈ રહે, સુખશાંતિ રહે તે માટે થઈને ઘણા બધા દુશ્મનો છે અને હજુ પણ દુશ્મનો કરવાના જ છે અને દુશ્મનો કરવા માટે તે તૈયાર છે. તેવું કહીને ચેરમેને કરેલા તમામ આક્ષેપોને ધારાસભ્યએ વખોડી કાઢ્યા હતા. તેવામાં મોરબી જિલ્લા ભાજપના પ્રમુખ દ્વારા મોરબી જિલ્લા પંચાયતના ચેરમેન અજય લોરિયાને હાલમાં કારણદર્શક નોટિસ આપવામાં આવેલ છે.
મોરબી જિલ્લા ભાજપના પ્રમુખ રણછોડ દલવાડી
ચેરમેનને 15 દિવસમાં તેને ખુલાસો આપવા કહેવાયું મોરબી જિલ્લા ભાજપના પ્રમુખ રણછોડ દલવાડી સાથે વાત કરતાં તેમણે કહ્યું હતું કે, જિલ્લા ભાજપ દ્વારા મોરબી જિલ્લા પંચાયતની સિંચાઇ સમિતિના ચેરમેન અજય લોરિયાને હાલમાં કારણદર્શક નોટિસ આપવામાં આવેલ છે. કેમ કે, તેને પોતાની ઓફિસે પત્રકાર પરિષદ કરીને જે નિવેદન આપેલ છે તેનાથી મોરબી જિલ્લામાં ભાજપને નુકશાન થયું છે અને મોરબી જિલ્લામાં ભાજપને નુકશાન થાય તેવું કૃત્ય કરેલ હોવાથી તેને કારણદર્શંક નોટિસ આપવામાં આવેલ છે. આગમી 15 દિવસમાં તેને ખુલાસો કરવા માટે કહેવામાં આવ્યું છે.
વધુમાં માહિતી આપતા જિલ્લા ભાજપના પ્રમુખે જણાવ્યું હતું કે, જિલ્લા પંચાયતના આ ચેરમેને પત્રકાર પરિષદ કરતાં પહેલા જિલ્લા ભાજપને કોઈપણ પ્રકારની જાણ કરેલ નથી અને જિલ્લા પંચાયતના જે કાર્યક્રમની આમંત્રણ પત્રિકામાં તેનું નામ નથી તેવું કહેવામાં આવ્યું હતું. તે કાર્યક્રમમાં તે અપેક્ષિત નથી અને તેના સિવાય જિલ્લા પંચાયતના બીજા પણ ચેરમેનોના નામ તે કાર્ડમાં ન હતા. તો પણ જિલ્લામાં ભાજપને નુકશાન થાય તેવું કૃત્ય શા માટે તેણે કર્યું હતું. તેનો ખુલાસો પુછવામાં આવેલ છે ત્યાર બાદ આગામી સમયમાં તેની સામે શિક્ષાત્મક કાર્યવાહી કરવામાં આવે તેવા સંકેતો હાલમાં જિલ્લા ભાજપ પ્રમુખ તરફથી મળ્યા છે.
