મુકેશ અંબાણી શપથ ગ્રહણ પહેલા ટ્રમ્પને મળ્યા: પત્ની નીતા સાથે અભિનંદન પાઠવ્યા; આવતીકાલે ટ્રમ્પ બીજી વખત રાષ્ટ્રપતિ તરીકે શપથ લેશે

ભારતના સૌથી ધનાઢ્ય વ્યક્તિ મુકેશ અંબાણી અને તેમની પત્ની નીતા અંબાણી રવિવારે અમેરિકામાં ડોનાલ્ડ ટ્રમ્પને રાષ્ટ્રપતિ તરીકેના બીજા કાર્યકાળ પહેલા અભિનંદન આપવા માટે મળ્યા હતા. આવતીકાલે ડોનાલ્ડ ટ્રમ્પ અમેરિકાના 47માં રાષ્ટ્રપતિ તરીકે શપથ લેશે. ટ્રમ્પ આ પહેલા 2016થી 2020 સુધી અમેરિકાના રાષ્ટ્રપતિ રહ્યા હતા.

રિલાયન્સ ફાઉન્ડેશને આ મીટિંગનો વીડિયો સોશિયલ મીડિયા પર શેર કર્યો હતો

નીતા અને મુકેશ અંબાણીને આશા છે કે ટ્રમ્પ સરકાર દરમિયાન ભારત-અમેરિકાના સંબંધો વધુ મજબૂત થશે. આ સાથે તેમણે ટ્રમ્પને તેમના નવા પરિવર્તનકારી કાર્યકાળ માટે શુભેચ્છા પાઠવી હતી.

મુકેશ અંબાણી અને નીતા અંબાણીએ આજે એક ખાનગી કાર્યક્રમમાં ડોનાલ્ડ ટ્રમ્પને અભિનંદન પાઠવ્યા હતા.

શપથ ગ્રહણમાં અંબાણી દંપતીને મહત્વની બેઠક મળશે અહેવાલ મુજબ શપથ ગ્રહણ સમારોહમાં અંબાણી દંપતીને મહત્વની બેઠક મળશે. તે ટ્રમ્પ કેબિનેટના નામાંકિત સભ્યો અને ચૂંટાયેલા અધિકારીઓ સાથે બેસશે. આ સિવાય કેબિનેટ સ્વાગત સમારોહ અને ઉપરાષ્ટ્રપતિનું ડિનર પણ હશે, જેમાં અંબાણી પરિવાર હાજરી આપશે.

ટ્રમ્પ અને અંબાણી પરિવાર વચ્ચે ઘણા સારા સંબંધો છે. મુકેશ અંબાણીના પુત્ર અનંત અંબાણીના લગ્નમાં ડોનાલ્ડ ટ્રમ્પની પુત્રી ઈવાંકા ટ્રમ્પે તેના પતિ સાથે હાજરી આપી હતી.

શપથ ગ્રહણમાં 3 પૂર્વ રાષ્ટ્રપતિ હાજર રહેશે, મિશેલ ઓબામા નહીં આપે હાજરી આવતીકાલે ટ્રમ્પના શપથ ગ્રહણ સમારોહમાં રાષ્ટ્રપતિ જો બાઇડન, તેમની પત્ની જીલ બાઇડન, ઉપરાષ્ટ્રપતિ કમલા હેરિસ અને તેમના પતિ ડગ એમહોફ હાજર રહેશે. જો કે છેલ્લી વખત ટ્રમ્પે બાઇડનના શપથ ગ્રહણ સમારોહમાં ભાગ લીધો ન હતો. અમેરિકાના 150 વર્ષના ઈતિહાસમાં આવું કરનાર તેઓ પ્રથમ રાષ્ટ્રપતિ હતા.

ટ્રમ્પની ગેરહાજરીમાં રાષ્ટ્રપતિની જવાબદારી તત્કાલીન ઉપરાષ્ટ્રપતિ માઈક પેન્સે નિભાવી હતી. આ વખતે પૂર્વ રાષ્ટ્રપતિ બરાક ઓબામા, જ્યોર્જ ડબલ્યુ બુશ, તેમની પત્ની લૌરા બુશ અને બિલ ક્લિન્ટન અને હિલેરી ક્લિન્ટન પણ શપથ ગ્રહણ સમારોહમાં હાજર હોવાનું કહેવાય છે. મિશેલ ઓબામા સમારોહમાં હાજર નહીં રહે.

2017માં ડોનાલ્ડ ટ્રમ્પના શપથ ગ્રહણની તસવીર.

પ્રથમ વખત વિદેશી મહેમાનોને આમંત્રણ, જયશંકર ભારતથી જશે અમેરિકાના ઈતિહાસમાં આ પહેલીવાર છે જ્યારે રાષ્ટ્રપતિના શપથ ગ્રહણ સમારોહમાં વિદેશી નેતાઓને આમંત્રણ આપવામાં આવ્યું છે. અહેવાલો અનુસાર, ટ્રમ્પના શપથ ગ્રહણ સમારોહમાં ઇટાલીના વડા પ્રધાન જ્યોર્જિયા મેલોની, અલ સાલ્વાડોરના રાષ્ટ્રપતિ નાયબ બુકેલે, હંગેરીના વિક્ટર ઓર્બાન, ઇઝરાયલના વડાપ્રધાન બેન્જામિન નેતન્યાહૂ અને આર્જેન્ટિનાના રાષ્ટ્રપતિ જેવિયર મિલી હાજર રહેશે.

ભારત તરફથી વિદેશ મંત્રી એસ જયશંકર ઉપરાંત QUAD દેશોના વિદેશ મંત્રીઓ પણ હાજર રહેશે. ઈલોન મસ્ક ઉપરાંત અમેરિકન ઉદ્યોગપતિઓમાં જેફ બેઝોસ, માર્ક ઝકરબર્ગ અને સેમ ઓલ્ટમેન હાજર રહી શકે છે.

ટ્રમ્પના શપથ ગ્રહણ સમયે રેકોર્ડ દાન શપથ ગ્રહણ સમારોહ માટે ટ્રમ્પની ટીમને રેકોર્ડ દાન મળ્યું છે. ઉદ્યોગપતિઓ ટ્રમ્પ સાથે વધુ સારા સંબંધો બનાવવા માટે ભારે ભંડોળ આપી રહ્યા છે. ન્યૂયોર્ક ટાઈમ્સ અનુસાર, અત્યાર સુધીમાં 170 મિલિયન ડોલર (લગભગ 1.5 હજાર કરોડ રૂપિયા) આવી ચૂક્યા છે. આ આંકડો $200 મિલિયન સુધી પણ પહોંચી શકે છે.

છેલ્લી વખતે બાઇડનના શપથ ગ્રહણ સમારોહમાં $62 મિલિયન (રૂ. 500 કરોડ)નો ચાંદલો એકત્ર થયો હતો. તે જ સમયે ટ્રમ્પના 2017 શપથ ગ્રહણ સમારોહમાં 107 મિલિયન ડોલર (રૂ. 925 કરોડ) એકત્રિત થયા હતા.