દરેક બજેટમાં નાણામંત્રીનો અનોખો અંદાજ: સીતારમણે બજેટના દિવસે ગોલ્ડન વર્કની મધુબની સાડી પહેરી, એનું બિહાર કનેક્શન; બજેટમાં નાણામંત્રીના લુક્સ પર એક નજર

જ્યારે કેન્દ્રીય નાણાપ્રધાન નિર્મલા સીતારમણ વાર્ષિક બજેટમાં સરકારની આગામી વર્ષ માટેની નાણાકીય નીતિઓ રજૂ કરે છે, ત્યારે તેઓ તેમની સાડીઓ બાબતે પણ હેડલાઇન્સમાં રહે છે. દર વખતે બજેટ દરમિયાન તેમણે પહેરેલી સાડી પાછળ એક કહાની હોય છે. નાણામંત્રીની સાડીઓ એ ભારતની વિવિધતાપુર્ણ સંસ્કૃતિ અને વારસાનું પ્રતિનિધિત્વ કરે છે. આ વર્ષે, બજેટ વખતે નાણામંત્રી નિર્મલા સીતારમણે ક્રીમ કલરની મધુબની પેઇન્ટિંગવાળી સાડી પહેરી છે, તેમાં ગોલ્ડન વર્ક કરેલું છે.

તેમણે આ સાડીને લાલ બ્લાઉઝ સાથે પહેરી છે. આ સાડી નાણામંત્રીને પદ્મશ્રી પુરસ્કાર વિજેતા દુલારી દેવીએ ભેટમાં આપી હતી. તેમણે સીતારામણને બજેટના દિવસે આ સાડી પહેરવાની વિનંતી કરી હતી. નિર્મલા સીતારમણે નમ્રતાપૂર્વક દુલારી દેવીની આ વિનંતી સ્વીકારી, જે નાણામંત્રીનો હેન્ડલૂમ પ્રત્યેનો પ્રેમ દર્શાવે છે. દુલારી દેવી મિથિલા આર્ટ્સ માટે જાણીતી છે. વર્ષ 2021માં તેમને કલામાં તેમના યોગદાન માટે તેમને ભારત સરકાર દ્વારા પદ્મશ્રીથી નવાજવામાં આવ્યા હતા.

નાણામંત્રી નિર્મલા આજે જે સાડી પહેરી છે એ તેમને પદ્મશ્રી પુરસ્કાર વિજેતા દુલારી દેવી (2021) દ્વારા ભેટમાં આપવામાં આવી હતી. દુલારીએ નાણામંત્રીને બજેટના દિવસે આ સાડી પહેરવા કહ્યું હતું.

2019માં બોર્ડર પર ગોલ્ડન વર્કવાળી ગુલાબી મંગલગીરી સિલ્ક સાડી પહેરી હતી

નાણામંત્રી સીતારમણ પણ પાછલા વર્ષોમાં બજેટના દિવસે હાથથી વણેલી સાડીઓ પહેરતા હતા. આ ભારતના નાણામંત્રીનો પરંપરાગત પહેરવેશ માટે પોતાનો પ્રેમ દર્શાવે છે. એવું કહીએ કે સીતારમણે ભારતના સમૃદ્ધ હેન્ડલૂમ અને કાપડના વારસાને રાષ્ટ્રીય મંચ પર લાવ્યા છે. 2019માં પ્રથમ વખત બજેટ રજૂ કરતી વખતે, નાણા પ્રધાન નિર્મલા સીતારમણે બજેટ બ્રીફકેસને પરંપરાગત ખાતાવહી સાથે બદલ્યું હતું. લાલરંગની ખાતાવહી સાથે ત્યારે તેમણે બોર્ડર પર ગોલ્ડન વર્કવાળી ગુલાબી મંગલગીરી સિલ્ક સાડી પહેરી હતી.

બજેટ 2020 દરમિયાન પીળી સિલ્કની સાડી પહેરી હતી

બજેટ 2020 દરમિયાન, સીતારમણે લીલી બોર્ડરવાળી પીળી સિલ્કની સાડી પહેરી હતી. બજેટ 2021 રજૂ કરતી વખતે, સીતારમણે પોચમપલ્લી સિલ્કની સાડી પહેરી હતી જે લાલ અને સફેદ રંગની હતી. નાણામંત્રીએ 2022માં બોમકાઈ સાડી, મરૂન અને ગોલ્ડન બોર્ડરવાળી બ્રાઉન સાડી પહેરી હતી. આ દ્વારા તેમણે ઓડિશાના હેન્ડલૂમ હેરિટેજને પ્રોત્સાહન આપ્યું. બોમકાઈ સાડીઓ ઓડિશાના બોમકાઈ ગામમાં બને છે.

2024નું વચગાળાનું બજેટસત્ર – ફોટો : ફાઇલ ફોટો.

2023માં નિર્મલા સીતારમણે લાલ સિલ્કની સાડી પહેરી હતી

2023માં બજેટ રજૂ કરતી વખતે, નિર્મલા સીતારમણે લાલ સિલ્કની સાડી પહેરી હતી, જેમાં મંદિરની આકૃતિવાળી બોર્ડર હતી. આ સાડી કર્ણાટકના ધારવાડ પ્રદેશ સંબંધિત કસુતી ભરતકામની સુંદરતા દર્શાવી રહી હતી. 2024માં, સીતારામને પશ્ચિમ બંગાળમાં લોકપ્રિય હસ્તકલા, કાંથા ભરતકામ સાથે વાદળી ટસર સિલ્ક સાડી પહેરી હતી.

જાણો કોણ છે દુલારી દેવી

આ વખતે નાણામંત્રી સીતારમણે ક્રીમ રંગની મધુબની પેઇન્ટિંગવાળી સાડી પહેરી છે. તેમાં ગોલ્ડન બોર્ડર છે. આ સાડી તેમને બિહારમાં રહેતી પદ્મશ્રી વિજેતા દુલારી દેવીએ ભેટમાં આપી હતી. દુલારી દેવી બિહારના મધુબની જિલ્લાના એક નાનકડા ગામ રાંટીમાં રહે છે. 57 વર્ષીય દુલારી દેવીને 2021માં પદ્મશ્રી એવોર્ડથી સન્માનિત કરવામાં આવ્યા હતા. દુલારી દેવીને મધુબની પેઇન્ટિંગમાં તેમના યોગદાન માટે કેન્દ્ર સરકારે આ સન્માન આપ્યું હતું.

દુલારી દેવીએ બે મહિના પહેલાં નાણામંત્રીને આ જ સાડી ભેટમાં આપી હતી.

2021માં ભાસ્કર સાથે વાત કરતાં દુલારી દેવીએ કહ્યું હતું કે, ‘પિતા માછીમારી કરતા હતા. નાની ઉંમરે અવસાન પામ્યા. માતાએ મજૂરી કામ કરીને અમારો ઉછેર શરૂ કર્યો. બાળપણથી જ હું, મારી ત્રણ બહેનો અને ભાઈ મારી માતા સાથે કામ કરવા જવા લાગ્યા. તેથી જ મને ક્યારેય શાળાએ જવાનો મોકો મળ્યો નથી.

દુલારી દેવીના લગ્ન માત્ર 12 વર્ષની ઉંમરે થયા હતા. જ્યારે એક પુત્રીનો જન્મ થયો, તે છ મહિના પછી મૃત્યુ પામી હતી. આ પછી સાસરિયાંવાળા અને દુલારીમાં મનમેળ નહોતો. બાદમાં દુલારી દેવી સાસરેથી નીકળીને પોતાના ઘરે આવી ગયા. ત્યારપછી તેણીએ પડોશમાં રહેતી મહાસુંદરી દેવીના ઘરે કામ કરવાનું શરૂ કર્યું. મહાસુંદરી દેવી મિથિલા પોન્ટિંગ કરતી હતી.સરકારે વર્ષ 2011માં તેમને પદ્મશ્રીથી પણ સન્માનિત કર્યા હતા.