પંચમહાલ જિલ્લાના ગોધરા નગરપાલિકાના વોર્ડ નંબર 7ની પેટા ચૂંટણીમાં એક દિવ્યાંગ મતદારે લોકશાહી પ્રત્યેની પોતાની ફરજ નિભાવીને અન્ય મતદારો માટે પ્રેરણારૂપ ઉદાહરણ પૂરું પાડ્યું છે.
.
લુણાવાડાની ઉચ્ચ માધ્યમિક શાળામાં શિક્ષક તરીકે ફરજ બજાવતા 46 વર્ષીય ડૉ. બેલિવસીમ અબ્દુલ હજીઝ દિવ્યાંગતા ધરાવે છે, છતાં તેઓ ઝકરીયા ઉર્દૂ પ્રાથમિક શાળામાં આવેલા મતદાન મથક સુધી જાતે પહોંચ્યા અને પોતાના મતાધિકારનો ઉપયોગ કર્યો.
મતદાન કર્યા બાદ ડૉ. બેલિવસીમે જણાવ્યું કે તેઓ મતદાનના અધિકાર મળ્યા ત્યારથી દરેક ચૂંટણીમાં મતદાન કરે છે. તેમણે સમાજના દરેક નાગરિકને મતદાન કરવા માટે અપીલ કરી હતી અને કહ્યું કે સશક્ત લોકશાહીના નિર્માણ માટે દરેક નાગરિકે પોતાના અમૂલ્ય મતાધિકારનો ઉપયોગ કરવો જોઈએ.
ગોધરા નગરપાલિકાની આ પેટા ચૂંટણીમાં ડૉ. બેલિવસીમનો ઉત્સાહ અને લોકશાહી પ્રત્યેની પ્રતિબદ્ધતા અન્ય મતદારો માટે પ્રેરણાદાયી બની રહી છે. તેમનું આ કાર્ય સમાજમાં દિવ્યાંગજનોની સક્રિય ભાગીદારી અને લોકશાહી પ્રક્રિયામાં તેમના યોગદાનનું ઉત્તમ ઉદાહરણ બની રહ્યું છે.
