અમ્માન6 મિનિટ પેહલા
- કૉપી લિંક
ઇઝરાયલ-જોર્ડન સરહદ પર એક ભારતીય નાગરિકની ગોળી મારીને હત્યા કરવામાં આવી છે. તેની ઓળખ કેરળના થુમ્બાના રહેવાસી એની થોમસ ગેબ્રિયલ (47) તરીકે થઈ છે. ગેબ્રિયલ ઇઝરાયલમાં ઘુસવાનો પ્રયાસ કરી રહ્યો હતો. આ દરમિયાન તેને જોર્ડનના એક સૈનિકે ગોળી મારી દીધી.
જોર્ડનમાં ભારતીય દૂતાવાસે આ ઘટના અંગે માહિતી આપી છે. દૂતાવાસે જણાવ્યું છે કે તેઓ મૃતકના પરિવારના સંપર્કમાં છે અને તેમના મૃતદેહને મેળવવાનો પ્રયાસ કરી રહ્યા છે. ગેબ્રિયલના પરિવારે કહ્યું છે કે તેમને 1 માર્ચે ભારતીય દૂતાવાસ તરફથી એની થોમસ ગેબ્રિયલના મૃત્યુની પુષ્ટિ કરતો ઇમેઇલ મળ્યો હતો. આ ઘટના 10 ફેબ્રુઆરીના રોજ બની હોવાનું જણાવાયું હતું.
ઇઝરાયલમાં ઘુસવાનો પ્રયાસ કરતી વખતે જોર્ડનના સૈનિકોએ ગેબ્રિયલને ગોળી મારી દીધી હતી.
કુવૈતમાં પાંચ વર્ષ કામ કર્યા પછી ગેબ્રિયલ પાછો ફર્યો હતો
ગેબ્રિયલના સંબંધી એડિસન, જે તેમની સાથે જોર્ડન ગયા હતા, તેમણે જણાવ્યું કે ગેબ્રિયલ પાંચ વર્ષ કુવૈતમાં કામ કર્યા પછી કેરળ પાછો ફર્યો હતો. બંને 5 ફેબ્રુઆરીએ જોર્ડન જવા રવાના થયા. તેમના એક એજન્ટ મિત્ર, બીજુ જલાસ, તેમને જોર્ડન લઈ ગયા. ત્યાં પહોંચ્યા પછી, તેમણે ઇઝરાયલ વિઝા મેળવવાનો પ્રયાસ કર્યો, પરંતુ ટુરિસ્ટ વિઝા માટે 10 લોકોના ગ્રુપની જરૂર હતી.
એડિસને કહ્યું કે અમે ફક્ત ચાર જ હતા, જેમાં એક બ્રિટિશ નાગરિક પણ હતો. ચારેય લોકો 3 મહિનાના ટુરિસ્ટ વિઝા પર જોર્ડન પહોંચ્યા હતા. જ્યારે અમને ઇઝરાયલના ટુરિસ્ટ વિઝા ન મળ્યા, ત્યારે બ્રિટિશ નાગરિક પાછો ફર્યો. તેણે વચન આપ્યું કે તે પોતાની સાથે વધુ લોકોને લઈને આવશે.
આ પછી, ગેબ્રિયલ, એડિસન અને બીજુએ એક ગાઈડની મદદથી સરહદ પાર કરવાનો પ્રયાસ કર્યો. 9 ફેબ્રુઆરીના રોજ, ગેબ્રિયલે ઘરે ફોન કર્યો અને પરિવારને કહ્યું કે અમે ઇઝરાયલ જઈ રહ્યા છીએ, કૃપા કરીને મારા માટે પ્રાર્થના કરજો. સરહદ પાર કરવાનો પ્રયાસ કરતી વખતે જોર્ડનની સેનાએ તેને પકડી લીધો.
એડિસને કહ્યું કે મેં તે સૈનિકોને વિનંતી કરી કે અમને ઘરે ફોન કરવા દો, પરંતુ તેનો કોઈ ફાયદો થયો નહીં. જોર્ડનના સૈનિકો તેમની ભાષા સમજી શક્યા નહીં, તેથી તેઓએ તેના પર ગોળીબાર કર્યો હતો.
3 લાખ રૂપિયા ખર્ચીને ગેબ્રિયલ જોર્ડન પહોંચ્યો હતો
કુવૈતથી પાછા ફર્યા પછી, ગેબ્રિયલે જોર્ડન જવા માટે એક એજન્ટનો સંપર્ક કર્યો. આ માટે તેણે લગભગ 3 લાખ રૂપિયા પણ ચૂકવ્યા હતા. જો કે, તેના પાસપોર્ટ નંબરમાં વધારાનો અંક મળી આવતા તેને પરત મોકલી દેવામાં આવ્યો.
એજન્ટે ખાતરી આપી કે આ વખતે થોમસને અન્ય લોકો સાથે જોર્ડન મોકલવામાં આવશે. આ માટે ગેબ્રિયલ અને એડિસને વિઝા અને એર ટિકિટ માટે બીજુએ 3.10 લાખ રૂપિયા લીધા હતા.
તેમને વચન આપવામાં આવ્યું હતું કે તેને ઇઝરાયલમાં નોકરી મળશે જેમાં તેમને દર મહિને 3 લાખ રૂપિયા મળશે. નોકરી કન્ફર્મ થયા પછી પહેલા 8 મહિના સુધી બંનેએ એજન્ટને દર મહિને 50,000 રૂપિયા ચૂકવવા સમજુતી કરી હતી.
10 ફેબ્રુઆરીએ જ્યારે તેઓ ઇઝરાયલ જવા નીકળ્યા હતા, ત્યારે તેમના એજન્ટ બિજુ છેલ્લી ઘડીએ ફરી ગયો અને ગ્રુપને ઇઝરાયલ લઈ જવાની જવાબદારી બીજા કોઈને સોંપી દીધી. તેની સાથે બે શ્રીલંકન યુવાનો પણ હતા.
