નવી દિલ્હી3 કલાક પેહલા
- કૉપી લિંક
દિલ્હી હાઈકોર્ટે એવિએશન રેગ્યુલેટર ડિરેક્ટોરેટ જનરલ ઓફ સિવિલ એવિએશન (DGCA) ને ગો ફર્સ્ટ પાસેથી લીઝ પર લીધેલા તમામ 54 એરક્રાફ્ટનું રજીસ્ટ્રેશન રદ કરવાનો આદેશ આપ્યો છે. હાઈકોર્ટે ડીજીસીએને ગો ફર્સ્ટ દ્વારા લીઝ પર લીધેલા એરક્રાફ્ટની ડીરજીસ્ટ્રેશન પ્રક્રિયાને આગામી 5 કામકાજના દિવસોમાં આગળ વધારવા જણાવ્યું છે.
જસ્ટિસ તારા વિતાસ્તા ગંજુની સિંગલ જજની બેન્ચે શુક્રવારે આ આદેશ આપ્યો છે. હાઈકોર્ટે એરલાઈન અને તેના ડિરેક્ટરોના સંચાલન માટે ઈન્સોલ્વન્સી એક્ટ હેઠળ નિયુક્ત રિઝોલ્યુશન પ્રોફેશનલ (RP)ને એરક્રાફ્ટ અથવા સ્પેરપાર્ટ્સ, દસ્તાવેજો, રેકોર્ડ્સ અને અન્ય કોઈપણ સામગ્રી લેવા અથવા સંગ્રહિત કરવા પર પણ રોક લગાવી છે.
રોકડની તંગીવાળી એરલાઈન્સના તમામ વિમાનો ગ્રાઉન્ડ થઈ ગયા છે. જે કંપનીઓએ એરલાઇનને પ્લેન લીઝ પર આપ્યા છે તેઓ તેને પરત લેવા માગે છે.
કંપનીઓએ વિમાનો છોડવાની માગ કરી હતી
એરક્રાફ્ટ લીઝિંગ કંપનીઓમાં Pembroke Aviation, Accipiter Investments Aircrafts 2 Ltd, EOS એવિએશન અને SMBC એવિએશનનો સમાવેશ થાય છે. કંપનીઓએ દિલ્હી હાઈકોર્ટમાં અરજી દાખલ કરીને ગો ફર્સ્ટને લીઝ પર આપવામાં આવેલા વિમાનોને મુક્ત કરવાની માગ કરી હતી. NCLAT એ 22 મેના રોજ NCLTના આદેશને પણ માન્ય રાખ્યો હતો, જે અંતર્ગત તેને નાદાર જાહેર કરવા માટે ગો ફર્સ્ટની અરજી સ્વીકારવામાં આવી હતી.
આખો મામલો સમજો
- ગો ફર્સ્ટ એરલાઈને 2 મેના રોજ જણાવ્યું હતું કે તે 3, 4 અને 5 મે માટે તેની તમામ ફ્લાઈટ્સ રદ કરી રહી છે.
- 3 મેના રોજ એરલાઇન સ્વૈચ્છિક નાદારીની અરજી માટે નેશનલ કંપની લો ટ્રિબ્યુનલ (NCLT) પાસે પહોંચી હતી.
- 4 મેના રોજ ગો ફર્સ્ટ એરલાઇનની અરજી પર સુનાવણી કરતી વખતે NCLTએ પોતાનો નિર્ણય અનામત રાખ્યો હતો.
- ફ્લાઇટ સસ્પેન્શન 9 મે સુધી લંબાવવામાં આવ્યું હતું. પછી તેને ઘણી વખત લંબાવવામાં આવ્યો. હાલમાં આ ફ્લાઈટ 10 જુલાઈ સુધી સ્થગિત છે.
- 10 મેના રોજ, NCLTએ એરલાઇનને રાહત આપી અને મોરેટોરિયમની માંગણી સ્વીકારી અને IRPની નિમણૂક કરી.
એરલાઇન પર લેણદારોના 11,463 કરોડનું દેવું
ગો ફર્સ્ટએ તેની અરજીમાં કહ્યું હતું કે તેcણે એપ્રિલ 2020 થી તેના લેણદારોને 19,980 કરોડ રૂપિયા ચૂકવ્યા છે. હવે તેના તમામ નાણાકીય સાધનો ખલાસ થઈ ગયા છે. તેના પર બેંકો, નાણાકીય સંસ્થાઓ, વિક્રેતાઓ અને એરક્રાફ્ટ ભાડે આપનાર સહિત અન્ય લેણદારોના રૂ. 11,463 કરોડનું દેવું છે. ગો ફર્સ્ટએ જણાવ્યું હતું કે નાણાકીય દબાણને કારણે, ઇંધણ સપ્લાયર્સ સહિત અન્ય સેવા પ્રદાતાઓ તેને તેમની સેવાઓ આપવા માટે તૈયાર નથી.
પ્રથમ ફ્લાઇટ 2005માં મુંબઈથી અમદાવાદ માટે ઉડાન ભરી હતી.
GoFirst વાડિયા ગ્રુપની બજેટ એરલાઇન છે. કંપનીની વેબસાઇટ અનુસાર, ગો ફર્સ્ટ 29 એપ્રિલ, 2004ના રોજ લોન્ચ કરવામાં આવી હતી. નવેમ્બર 2005માં મુંબઈથી અમદાવાદની પ્રથમ ફ્લાઈટનું સંચાલન કર્યું. એરલાઇનના કાફલામાં 59 એરક્રાફ્ટ છે.
તેમાંથી 54 એરક્રાફ્ટ A320 NEO છે અને 5 એરક્રાફ્ટ A320 CEO છે. ગો ફર્સ્ટ તેની ફ્લાઇટ 35 ગંતવ્ય સ્થાનો પર ચલાવે છે. જેમાં 27 સ્થાનિક અને 8 આંતરરાષ્ટ્રીય સ્થળોનો સમાવેશ થાય છે. એરલાઈને વર્ષ 2021 માં તેનું બ્રાન્ડ નામ GoAir થી GoFirst માં બદલ્યું.
