નવી દિલ્હી43 મિનિટ પેહલા
- કૉપી લિંક
આજે એટલે કે 3જી એપ્રિલે સોનું અને ચાંદી ઓલ ટાઈમ હાઈ રહ્યા. ઈન્ડિયા બુલિયન એન્ડ જ્વેલર્સ એસોસિયેશન (IBJA)ની વેબસાઈટ અનુસાર ટ્રેડિંગ દરમિયાન 10 ગ્રામ સોનું રૂ. 295 વધીને રૂ. 69,256 થયું હતું. આ વર્ષે અત્યાર સુધીમાં માત્ર 3 મહિનામાં સોનાની કિંમતમાં 5,954 રૂપિયાનો વધારો થયો છે. 1 જાન્યુઆરીએ સોનું રૂ. 63,302 હતું.
ચાંદી પણ આજે ઓલ ટાઈમ હાઈ પર પહોંચી ગઈ છે. તે રૂ. 1,537 મોંઘી થઇ અને રૂ. 77,664 પ્રતિ કિલોએ પહોંચી. પહેલા તે 76,127 રૂપિયા હતી. ચાંદીએ અગાઉ ગયા વર્ષે 4 ડિસેમ્બરે એટલે કે 2023માં 77,073ની ઓલ ટાઇમ હાઈ બનાવી હતી.
કેરેટ પ્રમાણે સોનાનો ભાવ
| કેરેટ | કિંમત (રૂ/10 ગ્રામ) |
| 24 કેરેટ | 69,256 |
| 22 કેરેટ | 63,686 |
| 18 કેરેટ | 52,145 |
સોનામાં તેજીના 4 કારણો:
- 2024 માં વિશ્વવ્યાપી મંદીનો ભય
- લગ્નસરાની સિઝનને કારણે સોનાની માંગ વધી છે
- ડૉલર ઇન્ડેક્સ નબળો પડ્યો છે
- વિશ્વભરની સેન્ટ્રલ બેંકો સોનું ખરીદી રહી છે
2023માં સોનું 8 હજાર રૂપિયાથી વધુ મોંઘુ થયું હતું
વર્ષ 2023ની શરૂઆતમાં સોનું 54,867 રૂપિયા પ્રતિ ગ્રામ હતું, જે 31 ડિસેમ્બરના રોજ 63,246 રૂપિયા પ્રતિ ગ્રામે પહોંચ્યું હતું. એટલે કે વર્ષ 2023માં તેની કિંમત રૂ. 8,379 (16%) વધી. તેમજ, ચાંદી પણ રૂ. 68,092થી વધીને રૂ. 73,395 પ્રતિ કિલોગ્રામ પર પહોંચી ગઈ હતી.
સોનું 70 હજાર રૂપિયા સુધી જઈ શકે છે
બજારના જાણકારોના મતે આગામી દિવસોમાં સોનાના ભાવમાં વધારો જોવા મળી શકે છે. આ કારણે આ વર્ષના અંત સુધીમાં સોનું 70 હજાર રૂપિયા પ્રતિ 10 ગ્રામ સુધી જઈ શકે છે. સાથે જ ચાંદી પણ 75 હજાર રૂપિયા પ્રતિ કિલો સુધી પહોંચી શકે છે.
સોનું ખરીદતી વખતે આ 4 બાબતોનું ધ્યાન રાખો
1. પ્રમાણિત સોનું જ ખરીદો
બ્યુરો ઓફ ઇન્ડિયન સ્ટાન્ડર્ડ્સ (BIS) ના હોલમાર્ક ધરાવતું પ્રમાણિત સોનું હંમેશા ખરીદો. નવા નિયમ હેઠળ, 1 એપ્રિલથી છ અંકના આલ્ફાન્યૂમેરિક હોલમાર્કિંગ વિના સોનું વેચવામાં આવશે નહીં. જેમ આધાર કાર્ડમાં 12 અંકનો કોડ હોય છે, તેવી જ રીતે સોનામાં 6 અંકનો હોલમાર્ક કોડ હશે. તેને હોલમાર્ક યુનિક આઇડેન્ટિફિકેશન નંબર એટલે કે HUID કહેવામાં આવે છે.
આ નંબર આલ્ફાન્યૂમેરિક હોઈ શકે છે એટલે કે કંઈક આના જેવું – AZ4524. હોલમાર્કિંગ દ્વારા કેટલા કેરેટ સોનું છે તે જાણવાનું શક્ય બન્યું છે.
2. કિંમત ક્રોસ ચેક કરો
બીજા સ્ત્રોતો (જેમ કે ઇન્ડિયા બુલિયન એન્ડ જ્વેલર્સ એસોસિયેશનની વેબસાઇટ) પરથી ખરીદીના દિવસે સોનાનું સાચું વજન અને તેની કિંમત ક્રોસ-ચેક કરો. સોનાની કિંમત 24 કેરેટ, 22 કેરેટ અને 18 કેરેટ પ્રમાણે બદલાય છે.
24 કેરેટ સોનાને સૌથી શુદ્ધ સોનું માનવામાં આવે છે, પરંતુ તેમાંથી જ્વેલરી બનાવવામાં આવતી નથી કારણ કે તે ખૂબ જ નરમ હોય છે. સામાન્ય રીતે જ્વેલરી માટે 22 કેરેટ કે તેનાથી ઓછા સોનાનો ઉપયોગ થાય છે.
કેરેટ પ્રમાણે આ રીતે કિંમત તપાસો: ધારો કે 24 કેરેટ સોનાની કિંમત 60 હજાર રૂપિયા પ્રતિ 10 ગ્રામ છે. એટલે કે એક ગ્રામ સોનાની કિંમત 6000 રૂપિયા હતી. આવી સ્થિતિમાં 1 કેરેટ શુદ્ધતાના 1 ગ્રામ સોનાની કિંમત 6000/24 એટલે કે 250 રૂપિયા હતી.
હવે ધારો કે તમારી જ્વેલરી 18 કેરેટ શુદ્ધ સોનાથી બનેલી છે, તો તેની કિંમત 18×250 એટલે કે 4,500 રૂપિયા પ્રતિ ગ્રામ છે. હવે તમારી જ્વેલરીના ગ્રામની સંખ્યાને રૂ. 4,500 વડે ગુણાકાર કરીને સોનાની ચોક્કસ કિંમતની ગણતરી કરી શકાય છે.
3. રોકડ ચૂકવશો નહીં, બિલ લો
સોનું ખરીદતી વખતે રોકડ ચુકવણી મોટી ભૂલ સાબિત થઈ શકે છે. UPI (જેમ કે BHIM એપ) અને ડિજિટલ બેંકિંગ દ્વારા ચુકવણી કરવી વધુ સારું છે. જો તમે ઈચ્છો તો ડેબિટ અથવા ક્રેડિટ કાર્ડ દ્વારા પણ પેમેન્ટ કરી શકો છો. આ પછી બિલ લેવાનું ભૂલશો નહીં. જો ઓનલાઈન ઓર્ડર કરો છો તો ચોક્કસપણે પેકેજીંગ તપાસો.
4. રિસેલિંગ પોલિસી જાણો
ઘણા લોકો સોનાને રોકાણ તરીકે જુએ છે. આવી સ્થિતિમાં તમારી પાસે સોનાની રિસેલ વેલ્યુ વિશે સંપૂર્ણ માહિતી હોવી જરૂરી છે. ઉપરાંત સંબંધિત જ્વેલરની બાયબેક પોલિસી વિશે શો રૂમના કર્મચારીઓ સાથે ચર્ચા કરો.
