‘જો જીતા વોહી સિકંદર’નાં 32 વર્ષ પૂરાં: જૂહી ચાવલા અને નગમાએ રિજેક્ટ કરી તો આયેશા જુલ્કાને મળી ફિલ્મ, રિજેક્ટ થયું હતું અક્ષય કુમારનું ઓડિશન

1992માં રિલીઝ થયેલી ફિલ્મ ‘જો જીતા વોહી સિકંદર’એ તેની રિલીઝના 32 વર્ષ પૂર્ણ કર્યા છે. આમિર ખાન, આયેશા ઝુલ્કા, દીપક તિજોરી, પૂજા બેદી સ્ટારર ફિલ્મ જબરદસ્ત હિટ રહી હતી. ફિલ્મ ‘જો જીતા વો હી સિકંદર’નું નિર્દેશન આમિર ખાનના પિતરાઈ ભાઈ મન્સૂર અલી ખાને કર્યું હતું, જ્યારે તેના નિર્માતા આમિરના કાકા નાસિર ખાન હતા. અક્ષય કુમારે આ ફિલ્મમાં સહાયક ભૂમિકા માટે ઓડિશન આપ્યું હતું, પરંતુ તેને રિજેક્ટ કરવામાં આવ્યો હતો.

આજે ફિલ્મના 32 વર્ષ પૂરા થવાના અવસર પર જાણીએ ફિલ્મ સાથે જોડાયેલાં કેટલાક તથ્યો-

અક્ષયનું ઓડિશન રિજેક્ટ કરવામાં આવ્યું, દીપક તિજોરી આમિરની ભલામણ પર આવ્યા
આ ફિલ્મમાં દીપક તિજોરીએ શેખર મલ્હોત્રાની ભૂમિકા ભજવી હતી. જો કે તે પહેલા અક્ષય કુમારે આ ફિલ્મ માટે ઓડિશન આપ્યું હતું. મન્સૂર ખાનને અક્ષયનું ઓડિશન પસંદ ન આવ્યું અને તેને રિજેક્ટ કરવામાં આવ્યો. આ પછી મિલિંદ સોમણને ફિલ્મમાં સાઈન કરવામાં આવ્યા હતા. મિલિંદ સોમણે આ ફિલ્મનું શૂટિંગ પણ શરૂ કરી દીધું હતું, પરંતુ તેણે છેલ્લી ઘડીએ ફિલ્મ છોડી દીધી હતી. શરૂઆતમાં દીપક તિજોરીનું ઓડિશન પણ રિજેક્ટ કરવામાં આવ્યું હતું, પરંતુ બાદમાં આમિર ખાને તેને ફરીથી મન્સૂર ખાન સાથે મુલાકાત કરાવી અને પછી તેને ફિલ્મમાં કાસ્ટ કરવામાં આવ્યો.

જૂહી ચાવલાએ આ ફિલ્મને રિજેક્ટ કરી દીધી હતી
મન્સૂર ખાન આ ફિલ્મમાં આમિર ખાન સાથે જૂહી ચાવલાને કાસ્ટ કરવા માગતા હતા. તેણે જૂહીને આ ફિલ્મ ઓફર કરી હતી, પરંતુ જૂહીએ વ્યસ્ત હોવાને કારણે આ ફિલ્મ કરવાની ના પાડી દીધી હતી. એ જ રીતે અભિનેત્રી નગમાએ પણ આ ફિલ્મને નકારી કાઢી હતી. બાદમાં આ ફિલ્મ ગિરિજા શેટ્ટરને આપવામાં આવી હતી.

ગિરિજાએ ફિલ્મનું શૂટિંગ પણ શરૂ કરી દીધું હતું. તેણે ફિલ્મ માટે ‘જવાં હો યારો…’ ગીત શૂટ કર્યું હતું, પરંતુ મન્સૂર ખાન તેના અભિનયથી નાખુશ હતા. શૂટિંગ ચાલી રહ્યું હોવા છતાં, તેણે ગિરિજા શેટ્ટરને ફિલ્મમાંથી હટાવી દીધી અને તેની જગ્યાએ આયેશા જુલ્કાને કાસ્ટ કરી. જોકે, ફિલ્મમાં ગિરિજા પર ફિલ્માવવામાં આવેલું ગીત ‘જવાં હો યારો…’ રાખવામાં આવ્યું છે.

‘જો જીતા વોહી સિકંદર…’ના સેટ પર ગિરિજા શેટ્ટર સાથે આમિર ખાન

ફિલ્મનો પ્લોટ હોલિવૂડની ફિલ્મ જેવો જ છે
‘જો જીતા વોહી સિકંદર’ ફિલ્મનો પ્લોટ 1979ની અમેરિકન ફિલ્મ ‘બ્રેકિંગ અવે’ જેવો જ છે. જો કે, મન્સૂર ખાને કહ્યું છે કે ફિલ્મ બનાવ્યા પછી લોકોએ તેમને કહ્યું કે, તેમની અને અમેરિકન ફિલ્મની વાર્તા મેળ ખાય છે. બંને ફિલ્મોમાં મિત્રતા, સાયકલ રેસ, ક્લાસ બેરિયર અને માતાપિતાના સંબંધો બતાવવામાં આવ્યા છે.

22 મે, 1992ના રોજ રિલીઝ થયેલી ફિલ્મ જો જીતા વોહી સિકંદર એક કલ્ટ ક્લાસિક ફિલ્મ સાબિત થઈ હતી. આ ફિલ્મને ફિલ્મફેર પુરસ્કારોમાં 8 નોમિનેશન મળ્યાં હતાં, જેમાંથી આ ફિલ્મ ‘શ્રેષ્ઠ ફિલ્મ’ અને ‘શ્રેષ્ઠ એડિટિંગ’ની શ્રેણીઓમાં વિજેતા બની હતી.