23 મિનિટ પેહલા
- કૉપી લિંક
વરુણ ધવને ‘બોર્ડર 2’માં તેની એન્ટ્રીની જાહેરાત કરી છે, જે 1997ની સુપરહિટ ફિલ્મ ‘બોર્ડર’ની સિક્વલ છે. આયુષ્માન ખુરાનાની ફિલ્મમાંથી બહાર થયા બાદ હવે વરુણ આ મોટી ફિલ્મનો હિસ્સો બની ગયો છે.
ખુદ અભિનેતાએ ઈન્સ્ટાગ્રામ પર આ સમાચારની પુષ્ટિ કરી છે. તેણે ફિલ્મનું ટીઝર શેર કર્યું અને કેપ્શનમાં લખ્યું – ‘જ્યારે હું ચોથા ધોરણમાં હતો ત્યારે મેં ચંદન સિનેમામાં ‘બોર્ડર’ને જોઈ હતી. આ ફિલ્મની મારા પર ઊંડી અસર પડી.’ ‘આજે પણ મને ગર્વની લાગણી યાદ છે જે આપણે બધા થિયેટરમાં અનુભવતા હતા. તે દિવસથી મેં આપણા સૈનિકોનું સન્માન કરવાનું શરૂ કર્યું અને આપણી સેનાએ હંમેશા આપણને બચાવ્યા છે. સીમા સુરક્ષા હોય કે કોઈપણ કુદરતી આફત, સેના હંમેશા આપણા માટે તૈયાર છે.’
વરુણે આગળ લખ્યું, ‘જેપી દત્તા સરની બોર્ડર હજી પણ મારી ફેવરિટ ફિલ્મોમાંથી એક છે. જે.પી. સર અને ભૂષણ કુમાર દ્વારા નિર્મિત બોર્ડર 2 નો ભાગ બનવું એ મારી કારકિર્દીની ખૂબ જ ખાસ ક્ષણ છે. સની પાજી સાથે કામ કરવું મારા માટે વધુ ખાસ છે. એક બહાદુર સૈનિકની વાર્તાને મોટા પડદા પર લાવવા માટે હું તમારા આશીર્વાદની રાહ જોઈ રહ્યો છું. ભારતની સૌથી મોટી આ યુદ્ધ ફિલ્મ બનવા જઈ રહી છે. જય હિંદ.’
નોંધનીય છે કે, સની દેઓલે આ વર્ષે જૂનમાં ‘બોર્ડર 2’ની જાહેરાત કરી હતી. તેમણે કહ્યું હતું કે, ‘એક સૈનિક ફરીથી પોતાનું 27 વર્ષ જૂનું વચન પૂરું કરવા આવી રહ્યો છે. ભારતની સૌથી મોટી યુદ્ધ ફિલ્મ, બોર્ડર 2.’
‘બોર્ડર 2’નું નિર્માણ ભૂષણ કુમાર, કૃષ્ણ કુમાર, જેપી દત્તા અને નિધિ દત્તા કરી રહ્યા છે. તે અનુરાગ સિંહ દ્વારા નિર્દેશિત કરવામાં આવશે, જેમણે અગાઉ અક્ષય કુમારની ફિલ્મ ‘કેસરી’નું નિર્દેશન કર્યું હતું.
