અયોધ્યા બાદ બિગ બીએ અલીબાગમાં જમીન ખરીદી: આ જગ્યા મુંબઈની નજીક હોવાના કારણે સેલેબ્સની પહેલી પસંદ, શાહરુખ, રણવીર-દીપિકા, અનુષ્કા-વિરાટ સહિત ઘણા સેલેબ્સે લક્ઝુરિયસ હોલિડે હોમ બનાવ્યા છે

રામ મંદિરના નિર્માણ બાદ અમિતાભ બચ્ચને આ વર્ષે અયોધ્યામાં જમીન ખરીદી હતી. હવે તેણે મુંબઈ નજીક અલીબાગમાં ‘ધ હાઉસ ઑફ અભિનંદન લોઢા’ પાસેથી 10 કરોડ રૂપિયામાં 10,000 ચોરસ ફૂટ જમીન ખરીદી છે. મુંબઈની નજીક હોવાને કારણે અલીબાગ સેલેબ્સની પહેલી પસંદ બની રહ્યું છે. શાહરૂખ ખાન, રણવીર – દીપિકા, અનુષ્કા – વિરાટ, રામ કપૂર જેવા ઘણા સેલેબ્સે અલીબાગમાં લક્ઝુરિયસ હોલિડે હોમ બનાવ્યા છે.

મીડિયા રિપોર્ટ્સ અનુસાર, અમિતાભ બચ્ચને અલીબાગમાં અભિનંદન લોઢા પાસેથી 10 કરોડ રૂપિયાની જમીન ખરીદી છે. આ સ્થળ દરિયાની ખૂબ નજીક છે. એવું કહેવામાં આવી રહ્યું છે કે ટ્રાન્ઝેક્શન ગયા અઠવાડિયે નોંધવામાં આવ્યું હતું. અમિતાભ બચ્ચને ‘A Alibaug’ નામના પ્રોજેક્ટમાં એક પ્લોટ ખરીદ્યો છે, જે અલીબાગમાં 20 એકરનો પ્લોટ ડેવલપમેન્ટ છે. આ પ્લોટ જે ગયા વર્ષે એપ્રિલમાં લોન્ચ કરવામાં આવ્યો હતો. જો કે હજુ સુધી અભિનંદન લોઢા તરફથી આ અંગે કોઈ પ્રતિક્રિયા આપવામાં આવી નથી.

કહેવામાં આવી રહ્યું છે કે અમિતાભ બચ્ચને અયોધ્યામાં પોતાના પ્રોજેક્ટ ધ સરયૂમાં એ જ બિલ્ડર પાસેથી જમીન ખરીદી હતી, જેના પર 7 સ્ટાર એન્ક્લેવ બનવા જઈ રહ્યો છે. તે 10,000 ચોરસ ફૂટ જમીનની કિંમત 14.5 કરોડ રૂપિયા છે. તે રામ મંદિરથી 15 મિનિટ દૂર છે અને અયોધ્યા ઈન્ટરનેશનલ એરપોર્ટથી 30 મિનિટ દૂર છે.

લક્ઝરી રિટ્રીટ અને રોકાણની તકો શોધી રહેલા લોકો માટે અલીબાગ એક પસંદગીની રિયલ એસ્ટેટ તરીકે ઉભરી આવ્યું છે. મુંબઈની નજીક હોવાને કારણે તે સેલેબ્સની પહેલી પસંદ રહે છે. બોલિવૂડના બાદશાહ શાહરૂખ ખાનનું પણ અલીબાગમાં હોલિડે હોમ છે. શાહરૂખ ખાન પાર્ટીઓ, જન્મદિવસની ઉજવણી અથવા રજાઓ માટે તેના વૈભવી હોલિડે હોમ અલીબાગની મુલાકાત લેતો રહે છે.

અનુષ્કા શર્મા અને વિરાટ કોહલીનું પણ અલીબાગમાં લક્ઝુરિયસ હોલિડે હોમ છે. વિરાટ અવારનવાર પોતાના પરિવાર સાથે રજાઓ ગાળવા અહીં આવે છે. પ્રખ્યાત ટીવી એક્ટર રામ કપૂરનું પણ અલીબાગમાં હોલિડે હોમ છે. રામ કપૂરના આ લક્ઝરી હોલીડે હોમની કિંમત લગભગ 20 કરોડ રૂપિયા હોવાનું કહેવાય છે. બોલિવૂડના પીઢ અભિનેતા વિનોદ ખન્નાના પુત્ર રાહુલ ખન્નાનું પણ અલીબાગમાં વૈભવી હોલિડે હોમ છે. રાહુલ અવારનવાર સોશિયલ મીડિયા પર તેના ભવ્ય હોલિડે હોમ અલીબાગની તસવીરો શેર કરે છે.

અમિતાભ બચ્ચનના વર્ક ફ્રન્ટની વાત કરીએ તો તે ‘કલ્કી 2898 એડી’માં જોવા મળશે. અમિતાભ બચ્ચનની આ ફિલ્મનું ફર્સ્ટ લૂક ટીઝર રિલીઝ કરવામાં આવ્યું છે. 1 મિનિટના આ ટીઝરમાં અમિતાભ ગુરુ દ્રોણાચાર્યના પુત્ર અશ્વત્થામાના રોલમાં જોવા મળે છે. ફિલ્મમાં અમિતાભ ઉપરાંત પ્રભાસ, કમલ હાસન, દીપિકા પાદુકોણ અને દિશા પટણી જેવા કલાકારો પણ જોવા મળશે.

આ ફિલ્મ આ વર્ષે 9 મેના રોજ ઘણી ભાષાઓમાં રિલીઝ થવાની હતી, પરંતુ તેને મોકૂફ રાખવામાં આવી છે. જોકે, મેકર્સે હજુ સુધી તેની નવી રિલીઝ ડેટ જાહેર કરી નથી. બજેટ પર નજર કરીએ તો 600 કરોડ રૂપિયામાં બનેલી ‘કલ્કી 2898 એડી’ આ વર્ષની સૌથી મોંઘી ફિલ્મ છે. તેને તેલુગુ સિનેમાના જાણીતા નિર્દેશક નાગ અશ્વિને બનાવ્યું છે.