અલ્લુ અર્જુન અડધી રાત્રે ચાહકોને મળ્યો: અભિનેતાના જન્મદિવસ પર ઘરની બહાર ચાહકોના ટોળા ઉમટ્યા,વીડિયો થયો વાઇરલ

સાઉથનો સુપરસ્ટાર અલ્લુ અર્જુન 8મી એપ્રિલે પોતાનો 42મો જન્મદિવસ ઉજવી રહ્યો છે. આ પ્રસંગે હૈદરાબાદના જ્યુબિલી હિલ્સમાં તેના ઘરની સામે રાતથી હજારો ચાહકોની ભીડ એકઠી થઈ હતી. અલ્લુ પોતે પણ આ ચાહકોનું અભિવાદન કરવા માટે અડધી રાત્રે ઘરની બહાર આવ્યો હતો. સોમવારે સવારે પણ જ્યારે અલ્લુ પ્રશંસકોને મળવા માટે ઘરની બહાર આવ્યો ત્યારે ઘણા ચાહકો ઝાડ પર ચડી ગયા અને ઘણા રસ્તા પર દોડતા જોવા મળ્યા.

અલ્લુ અડધી રાત્રે ચાહકોનું અભિવાદન કરવા ઘરની બહાર આવ્યો હતો.

ઉત્સાહિત ચાહકોએ ફેન્સીંગ તોડી નાખી
સોશિયલ મીડિયા પર વાઇરલ થયેલા વીડિયોમાં અલ્લુ તેના ચાહકોનો આભાર માનવા માટે અડધી રાત્રે ઘરની બહાર આવ્યો હતો. આ દરમિયાન તેના ચાહકોએ પુષ્પા..પુષ્પાના નારા લગાવ્યા હતા. ઘરની બહાર હાજર વિશાળ ટોળાએ ફેન્સીંગ પણ તોડી નાખી હતી. વીડિયોમાં અલ્લુએ પણ ચિંતા વ્યક્ત કરીને આ અંગે પ્રતિક્રિયા આપી હતી.

સવારે પણ ચાહકોની મોટી ભીડ અલ્લુ અર્જુનને તેના જન્મદિવસની શુભેચ્છા આપવા આવી હતી.

બે કલાકમાં 35 લાખ લોકોએ ટીઝર જોયું
સોમવારે, અભિનેતાના જન્મદિવસ પર, ફિલ્મ ‘પુષ્પા: ધ રાઇઝ’ના નિર્માતાઓએ તેના બીજા ભાગ ‘પુષ્પા 2: ધ રૂલ’નું ટીઝર પણ રિલીઝ કર્યું છે. આ ટીઝરમાં પુષ્પા એક અલગ અવતારમાં સાડી પહેરીને દુશ્મનો સાથે લડતો જોવા મળે છે. તેને યુટ્યુબ પર બે કલાકમાં 35 લાખ લોકોએ જોયો છે. આ ફિલ્મ આ વર્ષે 15 ઓગસ્ટે રિલીઝ થશે. અલ્લુ ઉપરાંત રશ્મિકા મંદાના અને ફહદ ફાસિલ પણ મહત્વના રોલમાં જોવા મળશે.

પુષ્પા-2 આ વર્ષે 15 ઓગસ્ટે રિલીઝ થશે.