અનુપમ ખેરે લવ લાઈફ સાથે જોડાયેલી સ્ટોરી શેર કરી: કહ્યું, ‘ડેટ પર ગર્લફ્રેન્ડને શંકા જતા મારા મોઢા પર બધો ખોરાક ફેંકીને જતી રહી હતી’

અનુપમ ખેરે તેમના પોડકાસ્ટ શો ‘અનુપમ કેયર્સ’માં તેમના પ્રેમ જીવન સાથે સંબંધિત એક કિસ્સો સંભળાવ્યો. તેમણે કહ્યું કે, એકવાર તે તેની ગર્લફ્રેન્ડ સાથે ડેટ પર ગયા હતા. તેની ગર્લફ્રેન્ડનું નામ રાધા હતું. તે જયાં બેઠા હતા તેની સામેના ટેબલ પર ત્રણ છોકરીઓ બેઠી હતી. જેઓ એકબીજાની સાથે વાત કરતાં ખૂબ હસતી હતી.

અભિનેતાએ જણાવ્યું કે, તેમની ગર્લફ્રેન્ડને લાગ્યું કે તેમાંથી એક યુવતી અનુપમની ગર્લફ્રેન્ડ છે. રાધા ગુસ્સાથી ઊભી થઈ અને અનુપમને પૂછ્યું કે ‘તેમાંથી તમારી ગર્લફ્રેન્ડ કઈ છે?.’

રાધાનો પ્રશ્ન સાંભળીને અનુપમને નવાઈ લાગી. તેમણે રાધાને આવી વાત ન કરવા કહ્યું. પણ તે સાંભળવા તૈયાર ન હતી. અનુપમે જણાવ્યું કે ‘તે સમયે માહોલ ખૂબ જ ખરાબ થઈ ગયો હતો. રાધાનો ગુસ્સો વધી રહ્યો હતો અને તેણે ટેબલ પર રાખેલી ખોરાકની ડિશ ઉપાડીને મારા પર ફેંકી દીધી. મારા માથા પર નૂડલ્સ લટકતા હતા. શાકથી આખો શર્ટ બગડી ગયો હતો. તે દિવસ પછી હુંક્યારેય રાધાને મળ્યો નથી કે વાત કરી નથી.’

પરિણીત અનુપમ કિરણ ખેર સાથે પ્રેમમાં પડ્યા, લગ્ન કર્યા અને પુત્રનું નામ આપ્યું
સંઘર્ષના દિવસો દરમિયાન અનુપમ ખેર કિરણ ખેરને મળ્યા, જે ફિલ્મોમાં સ્થાન બનાવવા માટે સંઘર્ષ કરી રહ્યા હતા. આ દરમિયાન બંનેને નાદિરા બબ્બરના નાટક ‘ચાંદપરી કી ચંપાબાઈ’માં સાથે કામ મળ્યું. બંને પ્લે માટે કોલકાતા ગયા હતા, જ્યાં અનુપમે કિરણ સામે લગ્નનો પ્રસ્તાવ મૂક્યો હતો.

કિરણ તરત જ રાજી થઈ ગઈ અને બંનેએ છૂટાછેડા લઈ 1985માં લગ્ન કરી લીધા. અનુપમે કિરણ ખેરના પુત્ર સિકંદરને પણ દત્તક લીધો હતો અને તેને પોતાની અટક આપી હતી. કિરણ અને અનુપમને પોતાનું કોઈ સંતાન નથી. અનુપમ ખેરે પોતાના ફિલ્મી કરિયરની શરૂઆત 1982માં આવેલી ફિલ્મ ‘આગમન’થી કરી હતી, પરંતુ અભિનેતાને ઓળખ 1984માં આવેલી ફિલ્મ ‘સારાંશ’થી મળી હતી. તેમની 37 વર્ષની કારકિર્દીમાં તેમણે 450 થી વધુ ફિલ્મોમાં કામ કર્યું છે.