‘​​​​​​​એનિમલ’ ફિલ્મના ‘અર્જન વેલી’ પર ​​​​​​​ગુંડાગીરીનો આરોપ: કરનૈલ સિંહે કહ્યું, ‘આવી ફિલ્મો યુવા પેઢી માટે ઘણી ખતરનાક છે’

રણબીર કપૂર સ્ટારર ફિલ્મ ‘એનિમલ’ વિવાદોમાં ફસાયેલી જોવા મળી રહી છે. શીખ સંગઠને ફિલ્મના કેટલાંક દૃશ્યો સામે વાંધો વ્યક્ત કર્યો છે. તેમનું કહેવું છે કે ફિલ્મમાં શીખ ધર્મનું અપમાન કરવામાં આવ્યું છે. ઓલ ઈન્ડિયા શીખ સ્ટુડન્ટ ફેડરેશનના પ્રમુખ કરનૈલ સિંહ પીર મોહમ્મદે સેન્સર બોર્ડને પત્ર લખીને ફિલ્મમાં શીખોને લઈને દર્શાવવામાં આવેલાં વિવાદાસ્પદ દૃશ્યોને હટાવવાની માગ કરી છે.

ફિલ્મના કેટલાક દ્રશ્યો વિવાદોમાં ફસાયા હતા
AISSFના પ્રમુખ કરનૈલ સિંહ પીર મોહમ્મદનું કહેવું છે કે ફિલ્મના એક દૃશ્યમાં રણબીર કપૂર એક ગુરસિખના મોં પર સિગારેટનો ધુમાડો છોડતો જોવા મળે છે. કરનૈલ સિંહે કહ્યું- શીખો ધૂમ્રપાન કરતા નથી. આવી સ્થિતિમાં, એક શીખ ક્યારેય ઈચ્છશે નહીં કે તેના મોં પર સિગારેટનો ધુમાડો નીકળે. મને લાગે છે કે આવાં દૃશ્યો જાણી જોઈને રાખવામાં આવ્યા છે. તેથી અમને વાંધો છે અને અમે ઈચ્છીએ છીએ કે ફિલ્મમાંથી આવાં દૃશ્યો હટાવવામાં આવે.

અન્ય એક દૃશ્યમાં, જ્યારે રણબીર કપૂર અને બોબી દેઓલ લડી રહ્યા છે, ત્યારે તેની દાઢી પર કસાઈની છરી બતાવવામાં આવી છે. તેના પર કરનૈલ સિંહનું કહેવું છે કે આવાં દૃશ્યો શીખોનું અપમાન કરે છે.

‘એનિમલ’ના લોકપ્રિય ગીત ‘અર્જન વેલી’ સામે વિરોધ
શીખ સમુદાયે ફિલ્મ એનિમલના લોકપ્રિય ગીત ‘અર્જન વેલી’નો પણ વિરોધ કર્યો છે. તેમનું કહેવું છે કે આ ગીતમાં શ્રી ગુરુ ગોવિંદ સિંઘજી દ્વારા ગવાયેલા પરંપરાગત ઐતિહાસિક ગીતનો ફિલ્મમાં ગુંડાગીરી અને ગેંગ વોર માટે ઉપયોગ કરવામાં આવ્યો છે. એક રીતે આ શીખ ધર્મનું અપમાન હતું. કરનૈલ સિંહે કહ્યું, ‘પંજાબની ધરતી પર ઘણા બહાદુર યોદ્ધાઓનો જન્મ થયો છે. યોદ્ધાઓએ દેશ માટે બલિદાન આપ્યું છે. એક પંજાબી હંમેશાં સમાજના કલ્યાણની વાત કરે છે અને ‘અર્જન વેલી’માં બતાવવામાં આવેલી ગુંડાગીરીની નહીં. ફિલ્મમાં હિંસક દૃશ્યો બતાવવામાં આવ્યા છે અને તેનો જોરદાર પ્રચાર પણ કરવામાં આવ્યો છે.

‘આવી ફિલ્મો યુવા પેઢી માટે ખૂબ જ જોખમી છે’
‘આવાં દૃશ્યોને કારણે આપણી યુવા પેઢીના બાળકોને ખોટો સંદેશો જાય છે. કિશોરો ફિલ્મ સ્ટાર્સથી પ્રભાવિત થાય છે અને તેમનાથી પ્રેરણા મેળવે છે. ફિલ્મ કલાકારો જે રીતે પોશાક પહેરે છે, શેવ કરે છે, હેરસ્ટાઇલ જાળવે છે – આપણી યુવા પેઢી પણ તેને અપનાવે છે. તેથી અમારી માગ છે કે આવાં દૃશ્યો ફિલ્મોમાંથી હટાવવાં જોઈએ. આટલું જ નહીં, ફિલ્મમાં દર્શાવવામાં આવેલા સંત કબીરની રચનાઓને પણ વિકૃત કરવામાં આવી છે. અમે સેન્સર બોર્ડના વડા પ્રસૂન જોશીજીને મેલ કરીને તેમને સંપૂર્ણ માહિતી આપી છે.’

‘સ્ટાર્સની ફેસ વેલ્યુ પણ કલંકિત થઈ શકે છે’
કરનૈલ સિંહે એમ પણ કહ્યું કે, ‘આ ફિલ્મ ભલે સારી કમાણી કરી રહી છે, પરંતુ તે આપણી યુવા પેઢીને ખોટો રસ્તો બતાવી રહી છે. આવી ફિલ્મો આપણા યુવાનો માટે ખૂબ જ જોખમી છે. જો ફિલ્મમાંથી સીન હટાવવામાં નહીં આવે તો સ્ટાર્સની ફેસ વેલ્યુ પણ કલંકિત થઈ શકે છે. એટલું જ નહીં પંજાબમાં ફિલ્મોના શૂટિંગમાં પણ સ્ટાર્સને મુશ્કેલીનો સામનો કરવો પડી શકે છે. નિર્માતાઓએ શીખ સમુદાયની માફી માગવી જોઈએ. અજય દેવગનની ‘સન ઓફ સરદાર’માંથી પણ કેટલાંક વાંધાજનક દૃશ્યો હટાવી દેવામાં આવ્યાં હતાં. જો સીનમાં ફેરફાર કરવામાં નહીં આવે તો કરનૈલ સિંહ ફિલ્મનો ઉગ્ર વિરોધ ચાલુ રાખશે.’

‘અર્જન વેલી’નો જાદુ અમેરિકા પર છવાયો
એક તરફ શીખ સમુદાય એનિમલ ફિલ્મના ગીત ‘અર્જન વેલી’ને લઈને વાંધો ઉઠાવી રહ્યો છે અને ગુંડાગીરીનો આરોપ લગાવી રહ્યો છે. આ ગીત અમેરિકાના ન્યૂયોર્ક અને લોસ એન્જલસના બિલબોર્ડ અને ડિજિટલ હોર્ડિંગ્સ પર દર્શાવવામાં આવ્યું છે. તમને જણાવી દઈએ કે, આ પહેલું ગીત છે જે આ સ્થળોનાં લોકપ્રિય સ્થળો પર બતાવવામાં આવી રહ્યું છે અને વગાડવામાં આવી રહ્યું છે.

‘એનિમલ’ જબરદસ્ત કમાણી કરી રહ્યું છે
એનિમલના બોક્સ ઓફિસ કલેક્શનની વાત કરીએ તો, વિવાદોમાં હોવા છતાં, ફિલ્મ રેકોર્ડ તોડી રહી છે અને કમાણી કરી રહી છે. આ ફિલ્મે દસમા દિવસે ભારતીય બોક્સ ઓફિસ પર અંદાજે 10 કરોડ રૂપિયાની કમાણી કરી લીધી છે. વર્લ્ડવાઈડ બોક્સ ઓફિસ પર ફિલ્મની કમાણી 700 કરોડને પાર કરી ગઈ છે.