સલમાન ખાનની ‘સિકંદર’ પર સેન્સર બોર્ડની કાતર ફરી: કહ્યુ- માત્ર ‘મંત્રી’ શબ્દ જ વાપરો, પક્ષના હોર્ડિંગને બ્લર કરો; બે દૃશ્યમાં સુધારા કરવાની શરતે આપ્યું સર્ટિફિકેટ

સલમાન ખાનની મોસ્ટ અવેટેડ ફિલ્મ ‘સિકંદર’ 30 માર્ચે રિલીઝ થવા જઈ રહી છે. ફિલ્મનું ટ્રેલર 23 માર્ચે રિલીઝ થયું હતું, જ્યારે ફિલ્મનું એડવાન્સ બુકિંગ પણ 25 માર્ચથી ભારતમાં શરૂ થશે. અગાઉ સેન્સર બોર્ડે ફિલ્મના કેટલાક દૃશ્યોમાં ફેરફારની માગ કરી છે. ફેરફારોની શરતે ફિલ્મને સેન્સર બોર્ડ દ્વારા પાસ કરવામાં આવી છે.

ફિલ્મ ‘સિકંદર’ને સેન્સર બોર્ડ તરફથી U/A 13+ પ્રમાણપત્ર મળ્યું છે. 13 વર્ષથી વધુ ઉંમરના બાળકો પણ તેમના માતાપિતાની હાજરીમાં આ ફિલ્મ જોઈ શકે છે. જોકે, પ્રમાણપત્રની સાથે, સેન્સર બોર્ડે ફિલ્મનાં બે દૃશ્યોમાં ફેરફારની માગ કરી છે. પહેલો ફેરફાર ફિલ્મના તે ભાગમાં થશે જ્યાં ગૃહમંત્રીનો ઉલ્લેખ છે. સૂચન મુજબ, હવે ફિલ્મમાં ગૃહમંત્રીને બદલે ફક્ત ‘મંત્રી’ શબ્દનો ઉપયોગ કરવામાં આવશે.

બીજો ફેરફાર ફિલ્મમાં બતાવેલ રાજકીય પક્ષના હોર્ડિંગમાં કરવામાં આવ્યો છે. તે દૃશ્યમાં હોર્ડિંગને બ્લર કરવું પડશે. બોર્ડ માને છે કે આ હોર્ડિંગ હાલના રાજકીય પક્ષ જેવું જ છે.

ફિલ્મનો રન ટાઈમ 2 કલાક 20 મિનિટનો છે. ફિલ્મનો પહેલો ભાગ 1 કલાક 15 મિનિટનો અને બીજો ભાગ 1 કલાક 5 મિનિટનો હશે.

ફિલ્મનું એડવાન્સ બુકિંગ 25 માર્ચથી શરૂ થશે

ફિલ્મ ‘સિકંદર’નું ટ્રેલર 24 માર્ચે રિલીઝ થયું છે. આ ફિલ્મનું એડવાન્સ બુકિંગ ભારતમાં 25 માર્ચથી શરૂ થવા જઈ રહ્યું છે. આ પહેલા યુએઈ અને યુએસએમાં એડવાન્સ બુકિંગ શરૂ થઈ ગયું છે, જ્યાં ફિલ્મ સારી કમાણી કરી રહી છે. કોઈમોઈના અહેવાલ મુજબ, અત્યાર સુધીમાં યુએઈમાં ફિલ્મની 799 ટિકિટ બુક થઈ છે, જેનાથી 45.76 હજાર દિરહામ એટલે કે 10 લાખ રૂપિયાથી વધુની કમાણી થઈ છે.

એ.આર. મુરુગદોસ દ્વારા દિગ્દર્શિત ફિલ્મ ‘સિકંદર’માં સલમાન ખાન અને રશ્મિકા મંદાના મુખ્ય ભૂમિકામાં છે. ફિલ્મમાં કાજલ અગ્રવાલ, પ્રતીક બબ્બર, શરમન જોશી પણ મહત્ત્વની ભૂમિકા ભજવી રહ્યા છે. આ એક એક્શન થ્રિલર ફિલ્મ છે, જોકે સેન્સર બોર્ડના સૂચનો જોતાં અનુમાન લગાવી શકાય છે કે ફિલ્મમાં રાજકીય એંગલ પણ જોઈ શકાય છે. આ ફિલ્મ 200 કરોડ રૂપિયાના જંગી બજેટમાં બનાવવામાં આવી છે.