ફેનના મર્ડર પહેલા દર્શને પાર્ટી કરી હતી: રેણુકાસ્વામી હત્યા કેસમાં નવું અપડેટ, આરોપીઓએ લોહીથી ખરડાયેલાં કપડાં બદલ્યાં હતાં

લોકપ્રિય કન્નડ સ્ટાર દર્શન 33 વર્ષીય ચાહક રેણુકાસ્વામીની હત્યાના આરોપમાં જેલમાં છે. દરમિયાન, આ કેસ સાથે જોડાયેલા નવા અપડેટ્સ સામે આવી રહ્યા છે. હવે રિપોર્ટ્સ સામે આવ્યા છે કે રેણુકાસ્વામીની હત્યા પહેલા દર્શન બેંગલુરુના એક પબમાં પાર્ટી કરી રહ્યો હતો. આ પાર્ટીમાં તેમની સાથે ફેમસ કન્નડ કોમેડિયન ચિકન્ના પણ હાજર હતા, જેને પોલીસે પૂછપરછ માટે બોલાવ્યા છે. ઈન્ડિયા ટુડેના અહેવાલ મુજબ, પાર્ટી કર્યા પછી દર્શન તેની મહિલા મિત્ર પવિત્રા ગૌડા સાથે પટ્ટંગેરે ગામમાં એક ગોડાઉનમાં ગયો હતો જ્યાં રેણુકાસ્વામીની હત્યા કરવામાં આવી હતી.

પોલીસ કસ્ટડીમાં દર્શન.

આરોપીએ લોહીના ડાઘવાળા કપડાં બદલી નાખ્યાં હતાં
રિપોર્ટ અનુસાર, રેણુકાસ્વામીનું અપહરણ કરીને તેને ગોડાઉનમાં રાખવામાં આવ્યો હતો જ્યાં દર્શન અને તેના સહયોગીઓએ તેને ખૂબ માર માર્યો હતો જેના કારણે તેનું મોત થયું હતું. હત્યા બાદ દર્શનના મિત્રો જેમના કપડાં લોહીથી ખરડાયેલા હતા તે નજીકના રિલાયન્સ સ્ટોરમાં ગયા અને ત્યાં નવા કપડાં ખરીદ્યા અને બદલાવ્યા.

સોમવારે સવારે, બેંગલુરુ પોલીસ રિલાયન્સ સ્ટોર પર ગઈ અને ક્રાઇમ સીન રિક્રિએટ કર્યો. પોલીસ ક્રાઈમ સીનને રિક્રિએટ કરવા માટે દર્શનને મૈસૂર પણ લઈ જઈ શકે છે. સૂત્રોના જણાવ્યા અનુસાર, આ કેસના આરોપી રાઘવેન્દ્રના ચિત્રદુર્ગા ઘરમાંથી રેણુકાસ્વામીની સોનાની ચેન અને પાકીટ પણ મળી આવ્યું છે. પોલીસે આ કેસમાં અત્યાર સુધીમાં દર્શન અને પવિત્રા સહિત 19 લોકોની ધરપકડ કરી છે.

મૃતક રેણુકાસ્વામી

પોસ્ટ મોર્ટમ રિપોર્ટમાં ચોંકાવનારા ખુલાસા થયા છે.
તાજેતરમાં, રેણુકાસ્વામીના પોસ્ટમોર્ટમ રિપોર્ટમાં ખુલાસો થયો હતો કે હત્યા પહેલા, તેને ત્રાસ આપવા માટે ઇલેક્ટ્રિક શોક આપવામાં આવ્યા હતા. તેના શરીર પર અનેક જગ્યાએ ઈજાનાં નિશાન જોવાં મળ્યાં હતાં. તેની પીઠ, છાતી અને હાથ અને પગ પર ઘણા ઘા હતા જેમાંથી લોહી વહી રહ્યું હતું. મૃતદેહના ઘણા ભાગોને કૂતરાઓએ કરડી ખાધા હતા.

રેણુકાસ્વામીનો મૃતદેહ 9 જૂને મળ્યો હતો
પોલીસના જણાવ્યા અનુસાર, રેણુકાસ્વામીનો મૃતદેહ 9 જૂનના રોજ બેંગલુરુના કામક્ષીપાલ્ય વિસ્તારમાં એક એપાર્ટમેન્ટ નજીકથી મળી આવ્યો હતો. પોલીસે જ્યારે ક્રાઈમ સીનની આસપાસના વિસ્તારની તપાસ કરી ત્યારે તેઓએ સીસીટીવી ફૂટેજમાં દર્શન અને પવિત્રાને ક્રાઈમ સીન છોડીને જતા જોયા. રાત્રે 11 વાગ્યાથી સવારના 3 વાગ્યા સુધી બંનેના મોબાઈલ નંબર એક જ વિસ્તારમાં એક્ટિવ હતા. આ પછી 11 જૂને દર્શન અને પવિત્રાની ધરપકડ કરવામાં આવી હતી.

રેણુકાસ્વામીની હત્યા શા માટે કરવામાં આવી?
મૃતક રેણુકાસ્વામી અભિનેતા દર્શનના ચાહક હતા. જાન્યુઆરી 2024માં, કન્નડ અભિનેત્રી પવિત્રા ગૌડાએ દર્શન સાથે તેની 10મી વર્ષગાંઠની ઉજવણી કરી. આ કારણે તેમના સંબંધો વિવાદમાં આવ્યા કારણ કે દર્શન પહેલાથી જ પરિણીત હતા. રેણુકાસ્વામી આ સમાચારથી ખૂબ ગુસ્સે થયા. તે પવિત્રાને દર્શનથી દૂર રહેવા માટે સતત મેસેજ કરી રહ્યો હતો. શરૂઆતમાં પવિત્રાએ તેના મેસેજિસની અવગણના કરી, પરંતુ પાછળથી રેણુકાસ્વામીએ વાંધાજનક સંદેશાઓ મોકલવા અને તેને ધમકી આપવાનું શરૂ કર્યું. પોલીસ સૂત્રોના જણાવ્યા અનુસાર પવિત્રાએ દર્શનને રેણુકાની હત્યા કરવા માટે ઉશ્કેર્યો હતો. તેને સજા કરવા કહ્યું. બેંગલુરુ પોલીસે એ પણ ખુલાસો કર્યો હતો કે હત્યાની જવાબદારી લેવા માટે દર્શને તેના ત્રણ સહયોગીઓને 15 લાખ રૂપિયાની ઓફર કરી હતી.

દર્શન અને પવિત્રા ગૌડા