53 મિનિટ પેહલા
- કૉપી લિંક
90ના દાયકાના લોકપ્રિય અભિનેતા ગોવિંદાના પગમાં ગોળી વાગી હતી. અભિનેતાને 1 ઓક્ટોબરની વહેલી સવારે પોતાની જ રિવોલ્વરમાંથી મિસફાયર થયું અને ગોળી વાગી હતી, ત્યારબાદ તેને મુંબઈની કૃતિ કેર હોસ્પિટલમાં દાખલ કરવામાં આવ્યો હતો. જ્યારે આ અકસ્માત થયો ત્યારે તેની પત્ની સુનીતા આહુજા જયપુરમાં હતી. આ સમાચાર સાંભળીને તે મુંબઈ પરત આવી ગઈ છે. આજે તે હોસ્પિટલ પહોંચી, જ્યાંથી તેણે ગોવિંદાની તબિયત અંગે અપડેટ આપી છે.
હોસ્પિટલની બહાર મીડિયા સાથે વાતચીત દરમિયાન સુનીતા આહુજાએ કહ્યું કે, સરની તબિયત હવે સારી છે. આજે તેને સામાન્ય વોર્ડમાં શિફ્ટ કરવામાં આવશે. ગઈકાલ કરતાં ઘણું સારું છે. મને લાગે છે કે, તેને આવતીકાલે અથવા તેના પરમ દિવસે રજા આપવામાં આવશે. તમારા બધાના આશીર્વાદ અને ચાહકોના આશીર્વાદથી તે સંપૂર્ણ સ્વસ્થ છે.
થોડા મહિના પછી તે ફરીથી ડાન્સ પણ કરી શકશે – સુનીતા વધુમાં જણાવ્યું હતું કે, સાહેબ માટે સર્વત્ર પ્રાર્થનાઓ ચાલી રહી છે. દરેક જગ્યાએ તેની મોટી ફેન ફોલોઈંગ છે. મંદિરો અને દરગાહમાં પૂજા-અર્ચના ચાલી રહી છે. બધાના આશીર્વાદથી તેમની તબિયત એકદમ સારી છે. હું ચાહકોને કહેવા માંગુ છું કે, તમે લોકો ગભરાશો નહીં, તે બિલકુલ ઠીક છે. થોડા મહિના પછી સર ફરી ડાન્સ કરી શકશે.
જ્યારે અકસ્માત થયો ત્યારે સુનીતા આહુજા મુંબઈમાં ન હતી સુનિતા આહુજાના મેનેજર સૌરભ પ્રજાપતિએ દિવ્ય ભાસ્કર સાથેની વાતચીતમાં જણાવ્યું હતું કે, ગોવિંદાના પગમાં ગોળી વાગી ત્યારે સુનીતા મુંબઈમાં નહોતી. તે 29 સપ્ટેમ્બરે ખાટુશ્યામ બાબાના દર્શન કરવા ગઈ હતી. તેઓ 30 સપ્ટેમ્બરના રોજ મંદિરે ગયા હતા. તે 1લી ઓક્ટોબરે બપોરે મુંબઈ આવવાની હતી, પરંતુ તે પહેલા તેને ગોવિંદા સાથે અકસ્માતના સમાચાર મળી ગયા. આવી સ્થિતિમાં તે બપોરના બદલે સવારે 9.30 વાગ્યે જયપુરથી મુંબઈ જવા રવાના થઈ હતી.
ગોવિંદા કોલકાતા જવાની તૈયારી કરી રહ્યો હતો ત્યારે તેને પગમાં ગોળી વાગી હતી. સવારે તેણે પોતાની રિવોલ્વર સાફ કરી. જ્યારે તે તેને કબાટમાં રાખતો હતો ત્યારે રિવોલ્વર પડી ગઈ અને મિસફાયરિંગને કારણે ગોળી તેના પગમાં વાગી. ઘણું લોહી વહી ગયું હતું, ત્યારબાદ તેમની પુત્રી ટીના અને કૃતિ કેર હોસ્પિટલના ડૉ. અગ્રવાલ તેમને હોસ્પિટલ લઈ ગયા. હોસ્પિટલમાં સર્જરીની મદદથી ગોવિંદાના પગમાંથી ગોળી કાઢવામાં આવી હતી.
મુંબઈ પોલીસે પરિવારની પૂછપરછ કરી, રિવોલ્વર જપ્ત કરી ગોવિંદાના પગમાં ગોળી વાગતાં મુંબઈ પોલીસ મંગળવારે બપોરે તેના ઘરે પહોંચી હતી. આ પછી પોલીસે પરિવારજનોના નિવેદન નોંધ્યા. ગોવિંદાની બંદૂક તપાસ માટે જપ્ત કરવામાં આવી છે.
આકસ્મિક ગોળીબાર પર અનેક સવાલો
- કહેવામાં આવી રહ્યું છે કે, ગોવિંદાના હાથમાંથી રિવોલ્વર પડી જતાં ગોળી વાગી હતી. જો કે, આ શંકાસ્પદ છે કારણ કે જ્યારે બંદૂક ઉપયોગમાં ન હોય ત્યારે તેને સલામતી લોકમાં રાખવામાં આવે છે. આવી સ્થિતિમાં, સવાલ એ છે કે, શું ગોવિંદા સેફ્ટી લોક લગાવ્યા વગર બંદૂકને કબાટમાં રાખતો હતો.
- બીજો સવાલ એ છે કે, સેફ્ટી લોક ન હોવા છતાં રિવોલ્વર પડી જાય તો ફાયર કેવી રીતે થઈ શકે, કારણ કે આવી સ્થિતિમાં ટ્રિગર ગાર્ડ ફાયરિંગ થતું અટકાવી શકે છે.
- ત્રીજો સવાલ એ છે કે, જો ગોળી ભૂલથી પણ નીકળી ગઈ હોત તો પણ રિવોલ્વરની બેરલ ઘૂંટણ તરફ નહીં પણ ઉપરની તરફ હોવી જોઈએ.
- ચોથો સવાલ, જો ગોવિંદા શહેરની બહાર જઈ રહ્યો હતો તો તેને બંદૂક શા માટે લોડ કરી? કારણ કે રિવોલ્વર સામાન્ય રીતે લોડ રાખવામાં આવતી નથી.
- પાંચમો સવાલ, અહેવાલોમાં ઘણી વખત એ વાત સામે આવી છે કે ગોવિંદા પેરાનોઇયા માટે ડોકટરોની સલાહ લેતા હતા, આવી સ્થિતિમાં શું તેઓ લોડેડ બંદૂક રાખવાની સ્થિતિમાં હતા.
- રિપોર્ટ્સમાં કહેવામાં આવી રહ્યું છે કે, ગોવિંદાની રિવોલ્વર 0.32 બોરની હતી. જ્યારે તેના પગમાંથી નીકળેલી ગોળી 9 mmની છે. સવાલ એ પણ છે કે 0.32 બોરની રિવોલ્વરમાં 9 mmની બુલેટ કેવી રીતે ફિટ થઈ શકે?
એવું માનવામાં આવે છે કે આ એ જ ગોળી છે જે ગોવિંદાના પગમાંથી નીકળી હતી.
