‘અનુપમા’ના સેટ પર લાઈટમેનનું મોત ઇલેક્ટ્રિક શોક લાગવાથી થયું: રાજન શાહીએ સત્તાવાર નિવેદન આપી કહ્યું- ખોટી અફવા ન ફેલાવો

14 નવેમ્બર 2024ના રોજ ફેમસ ટીવી શો ‘અનુપમા’ના સેટ પર કેમેરા આસિસ્ટન્ટ અજીત કુમારનું અકસ્માતમાં મૃત્યુ થયું હતું. આ દુ:ખદ ઘટના બાદ શોના મેકર્સ રાજન શાહીએ એક સત્તાવાર નિવેદન જાહેર કર્યું છે.

પ્રોડક્શન હાઉસનો ખુલાસો​​​​​ અમે, ડિરેક્ટર્સ કુટ પ્રોડક્શન્સ અને શાહી પ્રોડક્શન્સ પ્રાઇવેટ લિમિટેડ, છેલ્લા 18 વર્ષથી ટીવી ઉદ્યોગમાં કામ કરી રહ્યા છીએ. અમારી ટીમે ‘યે રિશ્તા ક્યા કહેલાતા હૈ’, ‘બિદાઈ’ અને ‘અનુપમા’ જેવા શો બનાવ્યા છે. આ બધું 300 થી વધુ લોકોની મહેનત અને સમર્પણનું પરિણામ છે.

14 નવેમ્બરના રોજ, એપ્રેન્ટિસ કેમેરા સહાયક અજીત કુમારને ફિલ્મ સિટીમાં ‘અનુપમા’ના સેટ પર અકસ્માતે ઇલેક્ટ્રિક શોક લાગ્યો હતો. તેણે ભૂલથી લાઈટનો સળિયો અને કેમેરો એકસાથે ઉપાડી લીધા હતા અને તેણે સલામતી માટે ચપ્પલ પણ પહેર્યા ન હતા. સેટ પર હાજર DOP (ડાયરેક્ટર ઓફ ફોટોગ્રાફી)એ તેને ‘માનવ ભૂલ’ ગણાવી. ઘટના બાદ અજિતને તાત્કાલિક હોસ્પિટલમાં લઈ જવામાં આવ્યો હતો અને તેને તાત્કાલિક સારવાર આપવામાં આવી હતી, પરંતુ અફસોસ કે અમે તેને બચાવી શક્યા નહીં.

અમે તરત જ અજિત કુમારના પરિવારને પટનાથી મુંબઈ લાવવા માટે ફ્લાઈટ ટિકિટની વ્યવસ્થા કરી. અમે તેની હોસ્પિટલ અને મેડિકલ ખર્ચની સંપૂર્ણ જવાબદારી લીધી. આ સિવાય અમે પરિવારને પટના પરત ફરવામાં મદદ કરી અને વળતર પણ આપ્યું. વીમાની રકમ તેમના નોમિનીને આપવામાં આવશે.

અમારી ટીમના તમામ સભ્યોની સલામતી અને સુખાકારી હંમેશા અમારી પ્રાથમિકતા રહી છે. આ અકસ્માત અમારા માટે મોટો આઘાત છે. અમે ભગવાનને પ્રાર્થના કરીએ છીએ કે અજીત કુમારની આત્માને શાંતિ મળે.

તેમજ કેટલાક લોકો આ ઘટનાને લઈને અફવા ફેલાવી રહ્યા છે. અમે સ્પષ્ટ ચેતવણી આપીએ છીએ કે જો આને રોકવામાં નહીં આવે તો અમે આવા લોકો સામે કડક કાયદાકીય કાર્યવાહી કરીશું. અમે પ્રોડ્યુસર્સ ગિલ્ડ ઑફ ઈન્ડિયા, ઈન્ડિયન ફિલ્મ એન્ડ ટેલિવિઝન પ્રોડ્યુસર્સ કાઉન્સિલ (IFTPC), ઈન્ડિયન મોશન પિક્ચર્સ પ્રોડ્યુસર્સ એસોસિએશન (IMPPA), અને ફેડરેશન ઑફ વેસ્ટર્ન ઈન્ડિયા સિને એમ્પ્લોઈઝ (FWICE) ને પણ આ ઘટના વિશે જાણ કરી છે.