જાવેદ અખ્તર-શબાનાને સંતાન ન થયાં: અભિનેત્રીએ કહ્યું, ‘માનવું મુશ્કેલ હતું કે હું માતા નહીં બની શકું,નિ:સંતાન મહિલાને સમાજ અધૂરી માને છે’

અભિનેત્રી શબાના આઝમીએ લેખક-ગીતકાર જાવેદ અખ્તર સાથે લગ્ન કર્યા. બંનેથી કોઈ સંતાન નથી. શબાનાએ તાજેતરના એક ઇન્ટરવ્યૂમાં આ વિશે વાત કરી છે. તેમણે કહ્યું કે સમાજમાં પરિણીત મહિલા માટે બાળક વિના જીવવું મુશ્કેલ છે.

‘શબાનાએ ઈન્ડિયન એક્સપ્રેસને આપેલા ઈન્ટરવ્યૂમાં કહ્યું હતું કે, મારા માટે એ માનવું મુશ્કેલ હતું કે હું માતા નહીં બની શકું. જ્યારે સ્ત્રી માતા બની શકતી નથી ત્યારે સમાજ તેને અધૂરી ગણે છે. આવી સ્થિતિમાં, વ્યક્તિએ તેમાંથી બહાર આવવા માટે સખત મહેનત કરવી પડશે.’

‘મને લાગે છે કે સ્ત્રીઓ પોતાનું મૂલ્ય પોતાનાં સંબંધોના આધારે આંકે છે. જ્યારે પુરુષો આવું નથી કરતાં. પુરુષોને તેમની કરિયર અને કામ સંતોષ આપે છે. મને લાગે છે કે સ્ત્રી-પુરુષ બંનેએ આ સ્વીકારવું જોઈએ અને સ્ત્રીઓએ પણ તેમના કામમાંથી ખુશી મેળવવી જોઈએ. મહિલાઓએ કંઈક એવું કરવું જોઈએ જેનાથી તેમને તેમના પાર્ટનર તરફથી સન્માન મળે.

શબાના-જાવેદ અખ્તરના લગ્ન 1984માં થયા હતા શબાના જાવેદ અખ્તરની બીજી પત્ની છે. બંનેએ 1984માં લગ્ન કર્યા હતા. જાવેદ અખ્તરે 1972માં હની ઈરાની સાથે લગ્ન કર્યા હતા, જેનાથી તેમને બે બાળકો હતા, ફરહાન અખ્તર અને ઝોયા અખ્તર. શબાના બંને સાથે ખૂબ જ સારી બોન્ડિંગ શેર કરે છે.

લગ્ન પહેલા અનેકવાર બ્રેકઅપનો પ્રયાસ કર્યો હતો 2004માં એક ઈન્ટરવ્યૂ દરમિયાન શબાનાએ કહ્યું હતું કે, ‘જાવેદ ઘણીવાર કવિતા લઈને અબ્બા પાસે આવતા અને સલાહ લેતા. જ્યારે મે તેમને જાણ્યા તો તે થોડા રમૂજી, જાણકાર અને ઘણી બધી રીતે મારા અબ્બા જેવા લાગ્યા. આ જ કારણ હતું કે હું તેની તરફ આકર્ષાઈ હતી. જાવેદ પહેલેથી જ પરિણીત હતા, તેથી અમે ઘણી વખત બ્રેકઅપ કરવાનો પ્રયાસ કર્યો. બાદમાં તેમણે તેમની પ્રથમ પત્નીને છૂટાછેડા આપી દીધા અને અમે 9 ડિસેમ્બર, 1984ના રોજ લગ્ન કર્યા.