કિરણ રાવે પાંચ વર્ષ સુધી કસુવાવડ સહન કરી હતી: આમિરની ભૂતપૂર્વ પત્નીએ કહ્યું, ‘મને ઘણી સ્વાસ્થ્યને લગતી સમસ્યાઓ હતી, આઝાદના જન્મ પછી અમારા જીવનમાં ખુશીઓ આવી’

ફિલ્મ નિર્માતા કિરણ રાવે માતૃત્વ વિશે વાત કરી છે. કિરણ આમિર ખાનની પૂર્વ પત્ની છે. એક ઈન્ટરવ્યૂમાં કિરણે કહ્યું હતું કે તેના પુત્ર આઝાદના જન્મ પહેલા તેને અનેક કસુવાવડ થઈ હતી. આના કારણે તેને ઘણી સ્વાસ્થ્ય સમસ્યાઓ પણ થઈ હતી.

ઝૂમ એન્ટરટેઈનમેન્ટને આપેલા ઈન્ટરવ્યૂમાં કિરણે કહ્યું કે, આઝાદનો જન્મ એ જ વર્ષે થયો હતો જ્યારે ફિલ્મ ‘ધોબી ઘાટ’ બની હતી. મેં બાળક માટે ઘણી વાર પ્રયાસ કર્યો. પાંચ વર્ષ સુધી, મેં અનેક કસુવાવડ સહન કરી અને ઘણી અંગત અને સ્વાસ્થ્ય સમસ્યાઓ હતી. હું એક બાળક ઇચ્છતી હતી પરંતુ તે ખૂબ જ મુશ્કેલ હતું. આવી સ્થિતિમાં, જ્યારે આઝાદનો જન્મ થયો, ત્યારે મારું ધ્યાન માત્ર તેને સારો ઉછેર આપવા પર હતું.

આઝાદ, આમિર ખાન અને કિરણ રાવ.

સરોગસી દ્વારા પુત્રનો જન્મ થયો હતો
કિરણ અને આમિરના પુત્રનો જન્મ સરોગસી દ્વારા થયો હતો. કિરણને ગર્ભધારણ કરવામાં મુશ્કેલીના કારણે સરોગસીનો નિર્ણય લીધો હતો, ત્યારબાદ 2011માં આઝાદનો જન્મ થયો હતો. હવે આઝાદ 13 વર્ષનો છે. કિરણે પોતાના પુત્ર વિશે એક ઈન્ટરવ્યૂમાં કહ્યું, ‘આઝાદના જન્મ પછી અમારા જીવનમાં ખુશીઓ આવી. તે અમારા જીવનનાં શ્રેષ્ઠ વર્ષો હતાં. મને એ વાતનો જરા પણ અફસોસ નથી કે મેં દસ વર્ષ સુધી કોઈ ફિલ્મ નથી કરી કારણ કે મેં એ સમયગાળો ખૂબ જ માણ્યો હતો.

શું આઝાદ પણ અભિનેતા બનવા માંગે છે? આ સવાલના જવાબમાં કિરણે કહ્યું, ‘ના, અત્યારે બિલકુલ નહીં. તે અત્યારે ફિલ્મો સાથે જોડાવા માંગતો નથી. તેને ફિલ્મોમાં કોઈ રસ નથી. આઝાદને કલા, સંગીત અને એનિમેશનમાં રસ છે.

છૂટાછેડા પછી પણ આમિર-કિરણનું જોરદાર બોન્ડિંગ છે

કિરણ-આમિર 2021માં અલગ થયા હતા
કિરણ રાવે 28 ડિસેમ્બર, 2005ના રોજ આમિર સાથે લગ્ન કર્યા હતા. આ સંબંધ વિશે આમિરે એકવાર કહ્યું હતું કે કિરણ સાથે તેની પહેલી મુલાકાત ફિલ્મ ‘લગાન’ના સેટ પર થઈ હતી. એ ફિલ્મમાં કિરણ આસિસ્ટન્ટ ડિરેક્ટર હતી. તેમનું લગ્નજીવન 15 વર્ષ સુધી ચાલ્યું અને 2021 માં, બંનેએ પરસ્પર સંમતિથી છૂટાછેડા લીધા. છૂટાછેડા પછી કિરણ પાસે પુત્ર આઝાદની કસ્ટડી છે. તે અને આમિર આઝાદના સહ-પેરેન્ટ છે. છૂટાછેડા પછી પણ, બંને ખૂબ જ સારું બોન્ડિંગ શેર કરે છે.