59 મિનિટ પેહલા
- કૉપી લિંક
અજય દેવગન અને આર માધવન જેવા અનુભવી કલાકારો અભિનીત ફિલ્મ ‘શૈતાન’નું ટ્રેલર રિલીઝ થતાંની સાથે જ એવી અપેક્ષા રાખવામાં આવી હતી કે આ ફિલ્મ ચોક્કસપણે પાવરફુલ હશે. કાળા જાદુ, વશીકરણ અને અંધશ્રદ્ધાની એક અલગ જ ડરામણી દુનિયામાં લઈ જનાર ટ્રેલરે સોશિયલ મીડિયા પર ઘણી પ્રશંસા મેળવી હતી, પરંતુ ચાલો આ રિવ્યૂમાં જાણીએ કે ફિલ્મ દર્શકોની અપેક્ષાઓ પર ખરી ઉતરી કે નહીં.
ફિલ્મની લેન્થ 2 કલાક 12 મિનિટ છે. દિવ્ય ભાસ્કરે ફિલ્મને 5માંથી 3 સ્ટાર રેટિંગ આપ્યું છે.
શું છે ફિલ્મની વાર્તા?
‘શૈતાન’ ફિલ્મમાં બતાવવામાં આવ્યું છે કે કબીર (અજય દેવગન) તેની પત્ની જ્યોતિ (જ્યોતિકા), પુત્રી જાનવી (જાનકી બોડીવાલા) અને પુત્ર ધ્રુવ (અંગદ રાજ) સાથે તેના પરિવારમાં સુખી જીવન જીવી રહ્યો છે. પરંતુ અચાનક તેમના જીવનમાં ભૂકંપ આવી જાય છે. એક દિવસ તેઓ રજા માટે તેમના ફાર્મહાઉસ જવાનું પ્લાનિંગ કરે છે, રસ્તામાં તેઓ વનરાજ (આર માધવન) ને ઢાબા પર મળે છે. વનરાજ એક સરળ અને ભરોસાપાત્ર વ્યક્તિ દેખાય છે અને કબીરના પરિવારનો વિશ્વાસ જીતી લે છે.
અહીંથી કબીર અને તેના પરિવાર માટે મુસીબતો શરૂ થાય છે. વનરાજ જાનવીને ખાસ પ્રકારના લાડુ ખવડાવીને પોતાના નિયંત્રણમાં લે છે. એટલું જ નહીં, તે કબીરના ફાર્મહાઉસમાં બળજબરીથી ઘૂસી જાય છે. હવે વનરાજ કાળા જાદુની મદદથી જાનવી સાથે ખૂની કૃત્યો કરવા લાગે છે. કબીર તેની પુત્રીને વનરાજની માયાવી ચુંગાલમાંથી બચાવી શકે છે કે નહીં, ફિલ્મની વાર્તાનો ક્લાઈમેક્સ આ દિશામાં વળે છે.
સ્ટાર કાસ્ટની એક્ટિંગ કેવી છે?
આર માધવન આ ફિલ્મનું સૌથી મોટું આશ્ચર્યજનક તત્ત્વછે, તેમને આવા પાત્રમાં જોવો એક અલગ જ અનુભવ છે. માધવને આખી ફિલ્મ પોતાના ખભા પર ઉઠાવી છે. અજય દેવગનના ફેન્સ થોડા નિરાશ થશે કારણ કે તેને માધવન જેટલો મજબૂત રોલ મળ્યો નથી, તેમ છતાં તેણે તેની ભૂમિકા સાથે ન્યાય કર્યો છે.
લાંબા સમય પછી ફિલ્મમાં જોવા મળેલી જ્યોતિકા પણ સારી રીતે કામ કરી રહી છે. પરંતુ માધવન પછી, જેમણે સૌથી વધુ અસર કરી છે તે છે જાનકી બોડીવાલા જે અજયની પુત્રીની ભૂમિકા ભજવે છે. તેનું પ્રદર્શન દર્શકોને ચોંકાવી દેશે.
ડિરેક્શન કેવું છે?
વિકાસ બહલ દ્વારા નિર્દેશિત આ ફિલ્મ 2023 માં રિલીઝ થયેલી ગુજરાતી સાયકોલોજિકલ થ્રિલર ફિલ્મ ‘વશ’ની રિમેક છે, જેની ખૂબ પ્રશંસા કરવામાં આવી હતી. વિકાસ બહલનું ડિરેક્શન સારું છે, પરંતુ પટકથામાં ખામીઓ છે જેના કારણે ફિલ્મ તેની પાસેથી અપેક્ષા મુજબનું કામ કરી શકી નથી.
જોકે, ફિલ્મમાં કલાકારોનો શ્રેષ્ઠ રીતે ઉપયોગ કરવામાં દિગ્દર્શક સફળ રહ્યા છે. બેકગ્રાઉન્ડ મ્યુઝિક ધ્રુજારી સર્જે છે, જ્યારે સુધાકર રેડ્ડી અને એકાંતીની સિનેમેટોગ્રાફી ફિલ્મના રોમાંચને અકબંધ રાખે છે.
છેલ્લે જોવી કે નહીં?
ફિલ્મની શરૂઆત ખૂબ જ રોમાંચક છે અને માધવનનો અભિનય દર્શકોને ચોંકાવી દેશે. જોકે, સેકન્ડ હાફ નબળો છે, ખાસ કરીને ફિલ્મનો ક્લાઈમેક્સ હળવો લાગે છે અને કેટલાક દ્રશ્યો બાલિશ લાગે છે. આ ફિલ્મમાં બ્લેક મેજિક અને વશિકરણનો રસપ્રદ એંગલ છે અને જેઓ હોરર ફિલ્મોના શોખીન છે તેમના માટે આ ફિલ્મ ચોક્કસપણે એક વખત જોવા જેવી બની શકે છે.
