અભિજીત ભટ્ટાચાર્યના નિવેદન પર નેહા અને મિલિંદની પ્રતિક્રિયા: મિલિંદે કહ્યું, ‘હવે તેમનો ટોન બદલાઈ ગયો છે’, નેહાએ કહ્યું, ‘કોઈ કામ નાનું કે મોટું નથી હોતું’

સિંગર અભિજીત ભટ્ટાચાર્ય અવારનવાર પોતાના નિવેદનોને કારણે ચર્ચામાં રહે છે. ફરી એકવાર તેનો એક વીડિયો સોશિયલ મીડિયા પર વાઇરલ થઈ રહ્યો છે. જેમાં તે લગ્નોમાં ગાનારા ગાયકોને ઠપકો આપતા જોવા મળે છે. અભિજીતના આ વાઇરલ વીડિયો પર સિંગર્સ મિલિંદ ગાબા અને નેહા કક્કરે પોતાની પ્રતિક્રિયા આપી છે. અભિજીતનો જૂનો વીડિયો શેર કરતા મિલિંદ ગાબાએ કહ્યું- હવે તેમનો ટોન બદલાઈ ગયો છે. નેહાએ કહ્યું- કોઈ કામ નાનું કે મોટું નથી હોતું.

ખરેખર, અભિજીત ભટ્ટાચાર્યના રિયાલિટી શો ‘સુપરસ્ટાર સિંગર 3’નો એક વીડિયો વાઇરલ થઈ રહ્યો છે. જેમાં તે કહેતા જોવા મળે છે કે લગ્નોમાં ગાનારા ગાયકોનો દરજ્જો ઓછો થઈ જાય છે. નેહા કક્કર તેની સાથે સહમત નથી. બંને વચ્ચે શબ્દોનું યુદ્ધ ચાલી રહ્યું છે.

સિંગર મિલિંદ ગાબાએ જૂનો વીડિયો શેર કરીને અભિજીત ભટ્ટાચાર્ય પર નિશાન સાધ્યું છે. તે વિડિયોમાં અભિજીત એક સ્કૂલ ફંક્શન અને લગ્ન સમારોહમાં પરફોર્મ કરતો જોવા મળે છે. મિલિંદ ગાબાએ કહ્યું- હવે તેમનો ટોન બદલાઈ ગયો છે.

વાઇરલ વીડિયોમાં અભિજીત સિંગર સલમાન અલીને શીખવી રહ્યો છે કે જે ગાયકો લગ્નમાં ગીતો ગાય છે, તેમનું સ્ટેટસ ઓછું થઈ જાય છે. અભિજીત ભટ્ટાચાર્યએ કહ્યું- મારી પાસે એ કહેવાનો અધિકાર છે કે હું ગીત નહીં ગાઉં.

નેહા કક્કરે કહ્યું- લગ્નમાં ગાવું ખરાબ વાત નથી, ફેન્સ તમને પસંદ કરે છે, એટલા માટે તેઓ તમને આમંત્રણ આપે છે. હું કહેવા માંગુ છું કે કોઈ પણ કામ નાનું કે મોટું નથી હોતું. ભટ્ટાચાર્યએ કહ્યું- એક કરોડ રૂપિયામાં ગાવામાં અને એક કરોડ રૂપિયાને નકારી કાઢવામાં ઘણો તફાવત છે. આટલું જ હું શીખવી રહ્યો છું.