‘સિટાડેલ: હની બન્ની’ના સેટ પર બેહોશ થઈ હતી સામંથા: વરુણ ધવને સંભળાવ્યો શૂટિંગનો કિસ્સો, કહ્યું- એક્ટ્રેસની તબિયતને લઈને ચિંતિત હતો

‘સિટાડેલ: હની બન્ની’ સિરીઝ 6 નવેમ્બરના રોજ એમેઝોન પ્રાઇમ પર રિલીઝ કરવામાં આવી છે. સિરીઝમાં વરુણ ધવન અને સામંથા રૂથાપ્રભુ લીડ રોલમાં છે. હાલમાં જ વરુણ ધવને જણાવ્યું હતું કે સિરીઝના શૂટિંગ દરમિયાન સામંથાની તબિયત બગડી હતી. એકવાર તે સેટ પર બેહોશ પણ થઈ ગઈ, જેના કારણે એક્ટર ખૂબ જ ચિંતિત હતો.

સિરીઝના શૂટિંગ દરમિયાન સામંથાને ખબર પડી કે તેને માયોસાઇટિસ નામની રેર બીમારી છે. આ પછી તે સિરીઝ છોડવા માંગતી હતી. તાજેતરમાં, ધ હોલીવુડ રિપોર્ટરને આપેલા એક ઇન્ટરવ્યુમાં, સામંથાએ કહ્યું હતું કે, જો સિરીઝના નિર્માતાઓએ તેને ટેકો આપ્યો ન હોત અને તેને પ્રોત્સાહિત ન કરી હોત, તો તેને ફરી કમબેક કરવામાં ઘણો સમય લાગત.

તેના પર વરુણ ધવને કહ્યું, હું વધુમાં કહેવા માંગુ છું, સેટ પર આવી બે ઘટનાઓ બની જેણે મારું દિલ તોડી નાખ્યું. હું ખૂબ જ ચિંતિત હતો. મને યાદ છે કે એક દિવસ અમે શૂટિંગ કરી રહ્યા હતા, સામંથાએ મને તેની સ્થિતિ વિશે વધુ કહ્યું ન હતું. તેણીએ માત્ર આંખો બંધ કરી હતી અને પછી 2 કલાક પછી ઓક્સિજન ટેન્ક સેટ પર આવ્યા. તે ખૂણામાં ઓક્સિજન લઈ રહી હતી. તે દિવસે સામંથા રજા લઈ શકતી હતી, પરંતુ તે હજી પણ સેટ પર ઓક્સિજન લઈ રહી હતી.

એક્ટરે આગળ કહ્યું, બીજી ઘટના એ છે કે અમે રેલવે સ્ટેશન પર શૂટિંગ કરી રહ્યા હતા. તે મારી પાછળ દોડતી આવી રહી હતી. અમારે કેમેરાને ક્રોસ કરવાનો હતો. હું કેમેરા પાસે પહોંચ્યો અને સામંથા ત્યાં જ પડી ગઈ.

વરુણ ધવને કહ્યું કે, જ્યારે સામંથા બેભાન થઈ ગઈ ત્યારે તે ચિંતિત થઈ ગયો અને ચીસો પાડવા લાગ્યો. દરમિયાન ટીમ યુનિટ આવી અને તેની સંભાળ લીધી.

સામંથા 2 વર્ષથી માયોસાઇટિસથી પીડિત છે વર્ષ 2022માં સામંથાએ એક પોસ્ટ શેર કરીને કહ્યું હતું કે તેને માયોસિટિસ નામની રેર બીમારી છે. માયોસિટિસનું નિદાન થયા પછી,સામંથાએ ફિલ્મોમાંથી બ્રેક લીધો. ડોક્ટરોએ પણ તેમને જાહેર સ્થળોથી દૂર રહેવાની સલાહ આપી હતી. આ એક પ્રકારનો ઓટો-ઇમ્યુન રોગ છે જેમાં શરીરની માંસપેશીઓ ધીમે-ધીમે નબળી પડતી જાય છે. આ સ્થિતિમાં, ચાલવામાં અને ઉભા થવામાં મુશ્કેલી વધે છે.