- Gujarati News
- Entertainment
- Shot For A Pint Of Alcohol, 33 Witnesses Turned Back; Sister Sabrina, Who Fought The Case, Died 3 Years Ago
નવી દિલ્હી22 મિનિટ પેહલા
- કૉપી લિંક
આ સ્ટોરી છે દિલ્હીની પ્રખ્યાત મોડલ જેસિકા લાલની. એ જ જેસિકા લાલ, જેની હત્યા માત્ર એટલા માટે કરવામાં આવી હતી કારણ કે તેણે એક ઉમરાવને એક પેગ દારૂ પીરસવાની ના પાડી હતી. એ જ જેસિકા જેના મર્ડર કેસ પર 2011માં સુપરહિટ ફિલ્મ ‘નો વન કિલ્ડ જેસિકા’ બની હતી. આ ફિલ્મનું શીર્ષક જ જેસિકાની વાર્તા કહે છે.
હાઈપ્રોફાઈલ ક્લબમાં સેંકડો લોકોની હાજરીમાં જેસિકાને ગોળી મારી દેવામાં આવી હતી, લોકોએ બંદૂકની ગોળીનો અવાજ સાંભળ્યો હતો અને હત્યારાને ભાગતો જોયો હતો, પરંતુ જ્યારે કેસ કોર્ટમાં પહોંચ્યો ત્યારે તમામ 33 સાક્ષીઓ ફરી ગયા હતા. તેમણે કહ્યું હતું કે, જેસિકાની હત્યા કરવામાં આવી હતી, પરંતુ તેની હત્યા કોણે કરી તે જાણી શકાયું નથી. બીજે દિવસે અખબારમાં સમાચાર છપાયા ‘નો વન કિલ્ડ જેસિકા’.
આ લડાઈ લાંબા સમય સુધી ચાલતી રહી. કોર્ટે બધાને નિર્દોષ જાહેર કર્યા, પરંતુ જેસિકાની બહેન સબરીના અને દેશની જનતાએ હાર ન માની. આખરે 10 વર્ષ પછી જેસિકાને ન્યાય મળ્યો.
એવું કહેવાય છે કે જો જેસિકા જીવતી હોત તો તે બોલિવૂડ ફિલ્મોનો ભાગ બની હોત, પરંતુ કમનસીબે એવું ન થઈ શક્યું.
આજે, વણકહી વાર્તાના 3 પ્રકરણોમાં હાઇ પ્રોફાઇલ જેસિકા લાલ હત્યા કેસની ક્રમિક વાર્તા વાંચો –
જેસિકા લાલનો જન્મ 5 જાન્યુઆરી, 1965ના રોજ નવી દિલ્હીમાં થયો હતો, જેને તેનો પરિવાર લાડમાં ‘શોના’ કહી બોલાવતો હતો. જેસિકા ઘરની મોટી દીકરી હતી. સબરીના તેના કરતા નાની હતી. બાળપણથી જ હિરોઈન બનવાનું સપનું જોનાર જેસિકાએ નાનપણથી જ મોડલિંગની દુનિયામાં પ્રવેશ કર્યો હતો. જેસિકાએ દિલ્હીમાં મોડલિંગ દરમિયાન સારી પ્રસિદ્ધિ મેળવી હતી. જોકે જ્યારે પણ તેને પૈસાની જરૂર પડતી ત્યારે તે કોઈ નાનું-મોટું કામ કરીને પૈસા કમાઈ લેતી હતી.
મોડલિંગ દરમિયાન જેસિકા માલિની રામાણીને મળી હતી. માલિની એક મોડલ પણ હતી, જેમની માતા બીના રામાણીની કુતુબ કોલોની હવેલી, મહેરૌલી, દિલ્હીમાં ટેમરિન્ડ કોર્ટ નામની રેસ્ટોરન્ટ હતી. માલિનીના પિતા જ્યોર્જ મેઈલહોટ મોટા બિઝનેસમેન હતા.
પતિ જ્યોર્જ મેઈલહોટ સાથે સોશિયલાઈટ બીના રામાણી
બીના રામાણી હાઈપ્રોફાઈલ સોસાયટીનો એક ભાગ હતી, જેણે એક સમયે શોમેન રાજ કપૂરને રાખડી બાંધી હતી અને ઝીનત અમાન જેવી ઘણી મોટી હસ્તીઓ તેના મિત્ર વર્તુળનો ભાગ હતી.
માલિનીના પિતા જ્યોર્જ મે 1999માં કેનેડા શિફ્ટ થવાના હતા, જેના કારણે તેની માતાએ 29 એપ્રિલના રોજ હાઇ-પ્રોફાઇલ ફેરવેલ પાર્ટીનું આયોજન કર્યું હતું. માલિનીને ખબર હતી કે જેસિકાને કામની જરૂર છે. આવી સ્થિતિમાં જ્યારે તેની માતા બીનાને એક ખાસ પાર્ટી માટે સુંદર દેખાતી બાર ટેન્ડરની જરૂર હતી, ત્યારે માલિનીએ જેસિકાને જોબ ઓફર કરી. વધારાની આવક માટે જેસિકા ખુશીથી આ કામ માટે સંમત થઈ.
જેસિકા સવારે તેની બહેન સબરીના સાથે ઘરેથી નીકળી હતી. સબરીના તેમને ડ્રોપ કરે છે. આ સમયે જેસિકાએ તેને સાંજે ટેમરિંડ પાસે આવવા કહ્યું હતું. તે દિવસે જેસિકાના મિત્ર અને મોડલ શયાન મુન્શી પણ તેની સાથે બાર ટેન્ડરિંગના કામ માટે આવ્યા હતા.
29 એપ્રિલે ટેમરિન્ડ કોર્ટ રેસ્ટોરન્ટમાં યોજાયેલી પાર્ટીમાં જેસિકાની નોકરી હાઈ-પ્રોફાઈલ મહેમાનોને દારૂ પીરસવાનું હતું, નવાઈની વાત એ હતી કે, રેસ્ટોરન્ટ પાસે દારૂનું લાઇસન્સ પણ ન હતું.
જો કે તે દિવસે ટેમરિન્ડ કોર્ટ રેસ્ટોરન્ટમાં એક ખાનગી હાઈપ્રોફાઈલ પાર્ટીનું આયોજન કરવામાં આવ્યું હતું, પરંતુ કેટલાક મહેમાનો એવા હતા જેઓ આમંત્રણ વિના ત્યાં પહોંચી ગયા હતા. શરત માત્ર એટલી હતી કે તે હાઈપ્રોફાઈલ હોવો જોઈએ.
હત્યારો સિદ્ધાર્થ તે રેસ્ટોરન્ટમાં અચાનક પહોંચ્યો હતો
સિદ્ધાર્થ શર્મા હરિયાણાના પ્રખ્યાત નેતા વિનોદ શર્માનો પુત્ર છે. વિનોદ શર્મા સાંસદ અને કેન્દ્રીય મંત્રી રહી ચૂક્યા છે. તેમનો પુત્ર સિદ્ધાર્થ ઉર્ફે મનુ તેના પિતાના પૈસા અને સત્તાથી વાકેફ હતો. 29 મેના રોજ સિદ્ધાર્થ તેની માતા સાથે ચંદીગઢ જવાનો હતો, પરંતુ તેણે ચંદીગઢ જવાને બદલે દિલ્હીમાં જ રહેવાનું નક્કી કર્યું. તે તેના મિત્રો સાથે દિલ્હીની ન્યુ ફ્રેન્ડ્સ કોલોનીમાં એક મકાનમાં રહેતો હતો. બધાએ બહું પીધું. અચાનક મોડી રાત્રે તેને યાદ આવ્યું કે બુધવારે ટેમરિન્ડ કોર્ટ રેસ્ટોરન્ટમાં ખાસ પાર્ટી છે. તેણે કાર ઉપાડી અને તેના ત્રણ મિત્રો વિકાસ યાદવ, અમરદીપ ગિલ અને આલોક ખન્ના સાથે લગભગ 2 વાગે પાર્ટીમાં પહોંચ્યો.
સિદ્ધાર્થ શર્મા ઉર્ફે મનુ નેતા વિનોદ શર્માનો પુત્ર
જો કે તે એક ખાનગી પાર્ટી હતી, તેમ છતાં સિદ્ધાર્થ તેમાં પ્રવેશ્યો હતો. તેણે બાર ટેન્ડર જેસિકા લાલ પાસેથી દારૂ મંગાવ્યો હતો પરંતુ પાર્ટી લગભગ પૂરી થઈ ગઈ હતી આથી જેસિકાએ તેને દારૂ પીરસવાની ના પાડી. આ જોઈને તેણે પોતાના ખિસ્સામાંથી 1000 રૂપિયા કાઢીને જેસિકાને આપ્યા અને પછી દારૂ મંગાવ્યો. જેસિકાએ ફરીથી ના પાડી.
મિત્રોની સામે પોતાનું અપમાન થતું જોઈને સિદ્ધાર્થે ખિસ્સામાંથી 22 કેલિબરની પિસ્તોલ કાઢી અને હવામાં ત્રણ ગોળી ચલાવી. પાર્ટીમાં ઘોંઘાટ એટલો બધો હતો કે ત્યાં હાજર મહેમાનો એલર્ટ ન થયા.
ત્યારબાદ સિદ્ધાર્થે જેસિકાને ધમકાવીને દારૂ માગ્યો હતો.હવામાં ગોળીબાર પછી પણ મનથી દૃઢ જેસિકાએ દારૂ પીરસવાની ના પાડી. ત્રીજી વાર ના પાડતાં જ સિદ્ધાર્થે જેસિકાના માથામાં ગોળી મારી દીધી. ગોળી વાગતાં જ જેસિકા નીચે પડી ગઈ, જેને જોઈને તેની સાથે રહેલો તેનો મિત્ર શયાન મુનશી જોર જોરથી બૂમો પાડવા લાગ્યો. પાર્ટીમાં એકદમ સન્નાટો છવાઈ ગયો હતો. જેસિકા લોહીથી લથપથ ફ્લોર પર બેભાન અવસ્થામાં પડી હતી.
આ જોઈને રેસ્ટોરન્ટની માલિક બીના રામાણી આવી પહોંચી અને સિદ્ધાર્થને બૂમો પાડીને પૂછ્યું કે, તું કોણ છે? તું પાર્ટીમાં બંદૂક કેવી રીતે લાવ્યો?
જવાબમાં તેણે કહ્યું, મેં ગોળીબાર નથી કર્યો.
તેમ કહી તે તેના ત્રણ મિત્રો સાથે ભાગી ગયો હતો. જેસિકાને તાત્કાલિક નજીકની અશ્લોક હોસ્પિટલમાં લઈ જવામાં આવી, પરંતુ ત્યાંથી તેને એપોલો હોસ્પિટલમાં રિફર કરવામાં આવી.
દરમિયાન, જેસિકાની બહેન સબરીનાને ફોન કરીને જાણ કરવામાં આવી કે તેની બહેનને હોસ્પિટલમાં લઈ જવામાં આવી છે. થોડા સમય પછી કોલ પર કહેવામાં આવ્યું કે જેસિકાને ગોળી વાગી છે. એપોલો હોસ્પિટલમાં ડોક્ટરોએ તેમને મૃત જાહેર કરી છે. જ્યારે તેની બહેન સબરીનાને આ વાતની જાણ થઈ તો તે કંઈ સમજી શકી નહીં.
બહેન જેસિકા સાથે સબરીના લાલની તસવીર.
બીજી તરફ, સિદ્ધાર્થ શર્માએ હથિયારને મહેરૌલીમાં જ જમીનમાં દાટી દીધા અને પછી બધા ગાઝિયાબાદમાં વિકાસ યાદવના ઘરે પહોંચ્યા.
ઘટનાની જાણકારી મળતાં જ દિલ્હી પોલીસે તપાસ શરૂ કરી હતી. પાર્ટીમાં હાજર લગભગ દરેક વ્યક્તિના નિવેદન લેવામાં આવ્યા હતા. ઘણા લોકોએ પોલીસ પૂછપરછ દરમિયાન કહ્યું કે તેઓએ સિદ્ધાર્થ શર્માને ગોળીબાર કરતા અને ભાગતા જોયો હતો. આ કેસમાં મહત્ત્વની જુબાની જેસિકાના મિત્ર શયાન મુન્શીની હતી, જે ઘટના સમયે જેસિકાની પાસે ઊભો હતો.
તેના પોલીસ નિવેદનમાં તેણે કહ્યું કે સિદ્ધાર્થે ગોળીબાર કર્યો હતો. પોલીસે નિવેદન નોંધ્યું, જેના પર શયાનની સહી પણ હતી.
જેસિકાના મિત્ર શયાન મુનશી
જેસિકાના મિત્રએ પોલીસને જણાવ્યું કે તેણે ગોળીબાર જોયો હતો
જેસિકાના નજીકના મિત્ર અને પાર્ટીમાં તેની સાથે હાજર રહેલા શયાન મુનશીએ રિપોર્ટ ફાઇલિંગ દરમિયાન તેનું નિવેદન નોંધાવ્યું હતું, તે આ કેસમાં એક મહત્ત્વનો સાક્ષી હતો. પોલીસ નિવેદનમાં તેણે કહ્યું કે સિદ્ધાર્થે જ જેસિકાને ગોળી મારી હતી. પોલીસે તેનું નિવેદન લખી લીધું અને તેની સહી પણ લીધી.
તપાસમાં મુખ્ય આરોપી સિદ્ધાર્થ શર્મા અને તેનો પરિવાર ફરાર થઈ ગયો હતો, જ્યારે તેના બે સાથીદારો આલોક ખન્ના અને અમરદીપ ગિલની 4 મેના રોજ ધરપકડ કરવામાં આવી હતી. તે જ દિવસે રેસ્ટોરન્ટની માલિક બીના રામાણી, પતિ જ્યોર્જ મેઈલહોટ અને તેની પુત્રી માલિની રામાણીની ધરપકડ કરવામાં આવી હતી. તેના પર લાયસન્સ વિના રેસ્ટોરન્ટમાં દારૂ રાખવાનો અને જેસિકાની હત્યા બાદ ફ્લોર પરથી લોહીના ડાઘ સાફ કરવાનો આરોપ હતો.
આ આરોપો પર બીના રામાણીએ ટીવી શો ‘આપ કી અદાલત’માં કહ્યું – ‘જ્યારે ગોળીઓ ચલાવવામાં આવી ત્યારે મેં અવાજ સાંભળ્યો અને બહાર ભાગી ગઈ. જેસિકા જમીન પર પડી હતી અને ત્યાં હાજર લોકો એક વ્યક્તિ તરફ ઈશારો કરીને કહી રહ્યા હતા કે તેણે ગોળી ચલાવી છે. સફેદ ટી-શર્ટ અને જીન્સ પહેરેલો છોકરો દોડતો હતો. મેં બધાને પોલીસને જાણ કરવા કહ્યું અને તેને ભાગતો અટકાવ્યો. છોકરો મને ધક્કો મારીને ભાગી ગયો, તેથી મેં મારા પતિ જ્યોર્જને તેનો પીછો કરવા કહ્યું.’
‘ત્યારબાદ અમે અશ્લોક હોસ્પિટલને ફોન કરીને આ અંગે જાણ કરી હતી. હું ઘટના સ્થળે પહોંચી ત્યારે સ્ટાફે જેસિકાને ટેબલ ક્લોથથી લપેટી હતી. સ્ટાફની મદદથી અમે તેને હોસ્પિટલ લઈ ગયા. આવી સ્થિતિમાં હું ફર્શ પરથી લોહી કેમ સાફ કરાવીશ? જેસિકાને હોસ્પિટલ લઈ જનાર છોકરાના શર્ટ પર પણ લોહીના ડાઘા હતા. અમે તે શર્ટ પણ પોલીસને સોંપી દીધો હતો.’
‘દિલ્હી કોર્ટે નિવેદનોના આધારે અને બીના બ્રિટિશ નાગરિક હોવાના આધાર પર જામીન મંજૂર કર્યા, તેમના પતિ કેનેડિયન નાગરિક હતા અને પુત્રી માલિની રામાણી અમેરિકન હતી, જોકે તેમના પાસપોર્ટ જપ્ત કરવામાં આવ્યા હતા.’
3 ઓગસ્ટ, 1999ના રોજ પોલીસે આ કેસમાં ચાર્જશીટ દાખલ કરી હતી. જ્યારે મામલો કોર્ટમાં પહોંચ્યો ત્યારે લગભગ 100 લોકોએ કોર્ટમાં જુબાની આપી, પરંતુ કોર્ટમાં કોઈએ સિદ્ધાર્થ વિરુદ્ધ કોઈ નિવેદન આપ્યું નહીં. આ કેસના મહત્ત્વના સાક્ષી અને જેસિકાના મિત્ર શયાન મુનશીએ પણ પોતાનું નિવેદન પાછું ખેંચ્યું હતું.
જ્યારે તેને કહેવામાં આવ્યું કે પૂછપરછ દરમિયાન તેણે સિદ્ધાર્થ વિરુદ્ધ નિવેદન આપ્યું છે તો તેણે જવાબ આપ્યો કે તેને હિન્દી આવડતી નથી. પોલીસે નિવેદન હિન્દીમાં લખીને સહી કરી હતી, નિવેદનમાં શું લખ્યું છે તેની તેમને ખબર નહોતી. તેણે એમ પણ કહ્યું કે સિદ્ધાર્થે હવામાં ગોળી ચલાવી, અન્ય કોઈએ જેસિકાને ગોળી મારી. ફોરેન્સિક રિપોર્ટમાં એ પણ ખુલાસો થયો છે કે બે અલગ-અલગ રિવોલ્વરમાંથી ગોળીઓ ચલાવવામાં આવી હતી.
6 વર્ષ સુધી કેસ ચાલ્યો, કોર્ટે તમામ આરોપીઓને મુક્ત કર્યા
21 ફેબ્રુઆરી, 2006
ચુકાદો આપતાં દિલ્હી ટ્રાયલ કોર્ટે કહ્યું- દિલ્હી પોલીસ જેસિકા લાલની હત્યામાં વપરાયેલ હથિયાર શોધવામાં નિષ્ફળ રહી. તે સિદ્ધાર્થ સામેના આરોપો સાબિત કરી શકી નથી. સાક્ષીઓ અને પુરાવાના અભાવે કોર્ટે તમામ આરોપીઓને નિર્દોષ જાહેર કર્યા છે. કોર્ટમાંથી પરિણામ આવ્યા પછી બીજા દિવસે અખબારોમાં સમાચાર આવ્યા – નો વન કિલ્ડ જેસિકા.
જાહેરમાં આક્રોશ હતો કે કેવી રીતે તે એક ઓપન એન્ડ શટ કેસ હોવા છતાં, દરેકને નિર્દોષ જાહેર કરવામાં આવ્યા. ચુકાદાના વિરોધમાં દેશભરમાં વિરોધ થયો, લોકો રસ્તા પર ઊતરી આવ્યા અને ન્યાય ન મળવાને લઈને ઘણી જગ્યાએ ધરણાં યોજાયા.
આ કેસમાં ભારતીય મીડિયાએ પણ મહત્ત્વની ભૂમિકા ભજવી હતી. NDTV, હિન્દુસ્તાન ટાઈમ્સ જેવી ઘણી ચેનલોએ જાહેર મતદાન કર્યું અને કેસને ફરીથી ખોલવા માટે જાહેર અભિપ્રાય અને મતદાનને પ્રોત્સાહન આપ્યું. મોટાભાગના મતદાનમાં, જનતાએ કાયદો અને વ્યવસ્થા પર પ્રશ્નો ઉઠાવ્યા અને કેસને ફરીથી ખોલવાની માગ કરી. ચેનલો પાસે આવા 2 લાખથી વધુ સંદેશાઓ હતા. ચેનલોએ આ સંદેશા રાષ્ટ્રપતિને પહોંચાડ્યા.
જાહેર આક્રોશને પગલે, 18 એપ્રિલ 2006ના રોજ ન્યાયમૂર્તિ મનમોહન સરીન અને ન્યાયમૂર્તિ જે.એમ. મલિકની ખંડપીઠે મનુ શર્માને 1 લાખ રૂપિયાના જામીન પર મુક્ત કર્યા હતા. તેમણે દિલ્હી પોલીસ પર પણ સવાલો ઉઠાવ્યા હતા અને વિનંતી કરી હતી કે આ કેસ ફરીથી ખોલવો જોઈએ અને શક્ય તેટલા ઓછા સમયમાં ચુકાદો સંભળાવવામાં આવે.
સ્ટિંગ ઓપરેશનનો ખુલાસો, સાક્ષીઓએ પૈસા લીધા અને તેમના નિવેદનો બદલ્યા
9 સપ્ટેમ્બર, 2006ના રોજ, ન્યૂઝ મેગેઝિન તહેલકાએ એક સ્ટિંગ ઓપરેશન હાથ ધર્યું હતું, જે સ્ટાર ન્યૂઝમાં બતાવવામાં આવ્યું હતું. આમાં ઘણા સાક્ષીઓ એવું કહેતા સાંભળવામાં આવ્યા હતા કે તેમને પૈસા ચૂકવીને અને દબાણ હેઠળ નિવેદન બદલવા માટે કહેવામાં આવ્યું હતું. સાક્ષીઓએ લાખો રૂપિયા લીધા હતા. તે પ્રકાશમાં આવ્યું છે કે નેતા વિનોદ શર્માએ તેના પુત્રને બચાવવા માટે દરેકને પૈસા આપ્યા હતા. આ સ્ટિંગ સામે આવતાં જ વિનોદ શર્માએ હરિયાણા કેબિનેટમાંથી રાજીનામું આપી દીધું હતું.
તહેલકા મેગેઝિને મહત્ત્વપૂર્ણ સાક્ષી શયાન મુનશી પર પણ સ્ટિંગ કર્યું હતું. આ સમય દરમિયાન, સ્ટિંગ જર્નલિસ્ટે ફિલ્મ ઈન્ડસ્ટ્રીના કાસ્ટિંગ મેનેજર તરીકે તેમનો સંપર્ક કર્યો. જ્યારે પત્રકારે કહ્યું કે આ એક હિન્દી ફિલ્મ હશે, પરંતુ તમને હિન્દી આવડતી નથી, તો શયાને તરત જ ઘણા હિન્દી સંવાદો સંભળાવ્યા, જ્યારે કોર્ટમાં તેણે કહ્યું હતું કે તે હિન્દી નથી જાણતો.
શયાન મુનશીનું સ્ટિંગ ઓપરેશન.
જનતા અને મીડિયાના દબાણ હેઠળ આ કેસ ફરીથી ખોલવામાં આવ્યો. છેવટે, 15 ડિસેમ્બર, 2006ના રોજ, જસ્ટિસ આર.એસ.સોઢી અને જસ્ટિસ પી.કે.ભસીનની હાઈકોર્ટની બેન્ચે 61 પાનાનો ચુકાદો આપ્યો, જેમાં સિદ્ધાર્થ શર્મા ઉર્ફે મનુને દોષિત ઠેરવવામાં આવ્યો.
20 ડિસેમ્બર, 2006ના રોજ સિદ્ધાર્થને જેસિકાની હત્યા કરવા બદલ આજીવન કેદની સજા ફટકારવામાં આવી હતી. તેની સાથે હાજર મિત્રોને 4-4 વર્ષની સજા કરવામાં આવી હતી. શયાન મુનશી, જેણે પોતાનું નિવેદન પાછું ખેંચ્યું હતું, તેમની સામે ખોટી જુબાની માટે કાર્યવાહી કરવામાં આવી હતી. 19 એપ્રિલ 2010ના રોજ સુપ્રીમ કોર્ટે પણ દોષિત સિદ્ધાર્થની આજીવન કેદ પર મહોર મારી દીધી હતી.
જેસિકાની હત્યા સાથે સંકળાયેલા લોકો હવે ક્યાં છે?
સિદ્ધાર્થ શર્મા- વર્ષ 2020માં સિદ્ધાર્થ શર્માને સારા વર્તનને કારણે છોડી દેવાયો છે. તે પોતાનો ફેમિલી બિઝનેસ ચલાવે છે.
સબરીના- જેસિકાની બહેન સબરીનાનું 2021માં લીવરની બીમારીને કારણે અવસાન થયું હતું. ટ્રાયલ દરમિયાન તેના માતા-પિતાનું પણ અવસાન થયું હતું.
બહેન જેસિકાના ફોટો સાથે સબરીના લાલ
શયાન મુનશી- જેસિકાનો મિત્ર અને કેસનો મુખ્ય સાક્ષી શયાન મુનશી એક અભિનેતા છે. તેણે આર્યન બેન્ડના મ્યુઝિક આલ્બમ ‘યે હવા કહતી હૈ ક્યા’થી પોતાની અભિનય કારકિર્દીની શરૂઆત કરી હતી. આ પછી, તે ‘ઝંકાર બીટ્સ’, ‘મૌસમ’, ‘માય બ્રધર નિખિલ’, ‘આહિસ્તા આહિસ્તા’, ‘શેફ’ જેવી મોટી ફિલ્મોનો પણ ભાગ હતો.
બીના રામાણી- આ કેસ પછી તેની રેસ્ટોરન્ટ બંધ થઈ ગઈ હતી. તે હવે ફેશન ડિઝાઇનર, લેખક અને સામાજિક કાર્યકર્તા તરીકે સક્રિય છે.
માલિની રામાણી- જેસિકાની મિત્ર અને બીના રામાણીની પુત્રી માલિની ફેશન-ઇન્ટિરિયર ડિઝાઇનર અને યોગ પ્રશિક્ષક તરીકે કામ કરે છે.
વિકાસ યાદવ- હત્યા સમયે સિદ્ધાર્થ શર્મા સાથે હાજર રહેલો તેનો મિત્ર વિકાસ યાદવ બહેનના પ્રેમી નીતિશ કટારાની હત્યાના આરોપમાં હજુ પણ જેલમાં છે.
