સ્વરા ભાસ્કરના નિવેદનથી સોશિયલ મીડિયા પર ભડકો: એક્ટ્રેસે કહ્યું- નાસભાગમાં મોતને બદલે ‘છાવા’ના દૃશ્ય પર ભાવુક થઈ જતો સમાજ મન અને આત્માથી મરી ગયો છે

વિકી કૌશલ સ્ટારર ફિલ્મ ‘છાવા’ રિલીઝ થઈ ગઈ છે. ફિલ્મના એક દૃશ્યમાં, સંભાજી મહારાજને મુગલો દ્વારા ત્રાસ આપવામાં આવે છે, જેના કારણે લોકોમાં ભાવનાત્મક પ્રતિક્રિયા જોવા મળી છે. લોકોની પ્રતિક્રિયા જોઈને, સ્વરા ભાસ્કરે દેશમાં વધી રહેલા ભાગદોડના કેસોને બદલે ફિલ્મને મહત્ત્વ આપવા બદલ સમાજ પર કટાક્ષ કર્યો છે.

સ્વરા ભાસ્કરે તાજેતરમાં જ તેના સત્તાવાર X એકાઉન્ટ (અગાઉનું ટ્વિટર) પર લખ્યું હતું કે, જે સમાજ 500 વર્ષ પહેલાં એક કાલ્પનિક ફિલ્મમાં હિન્દુઓ પર થયેલા અત્યાચારો વિશે વધુ ગુસ્સે છે, તે નાસભાગ અને મિસ મેનેજમેન્ટ, ભયાનક મૃત્યુ પછી મૃતદેહોને બુલડોઝરથી ઊઠાવવાની ઘટના સામે અસંવેદનશીલ છે, આવો સમાજ મન અને આત્માથી મૃત છે.

સ્વરાનું ટ્વીટ બહાર આવતાની સાથે જ સોશિયલ મીડિયા પર તેની ભારે ટીકા થઈ રહી છે. એક યુઝરે તેની પોસ્ટના જવાબમાં લખ્યું,- એક ધર્માંતરિત મહિલા નારાજ છે કારણ કે એક ફિલ્મમાં તાજમહેલ અને ‘મુઘલ-એ-આઝમ’ જેવી કાલ્પનિક પ્રેમકથાઓને બદલે કટ્ટરપંથી મુઘલોનો વાસ્તવિક ઇતિહાસ દર્શાવવામાં આવ્યો છે. સાબિત કરો કે સલીમ અને અનારકલીની વાર્તા સાચી છે અને ઔરંગઝેબે સંભાજીને ત્રાસ આપ્યો ન હતો.’

એક યુઝરે ગુસ્સામાં લખ્યું, છત્રપતિ સંભાજી મહારાજની ગરિમાને કાલ્પનિક અને ઔરંગઝેબના અત્યાચારોને નકલી કહેવાની તેમની હિંમત છે. તેણે મરાઠાઓના ગૌરવનો ઇનકાર કર્યો છે અને તે મહારાષ્ટ્રમાં રહે છે.

બીજા યૂઝરે લખ્યું,- ખરેખર? આ મહિલાએ એવા ધર્મમાં લગ્ન કર્યા છે જેમાં દર વર્ષે લાખો લોકો ૧૪૦૦ વર્ષ પહેલાં એક ઇમામ પર થયેલા કાલ્પનિક અત્યાચાર સામે પોતાનો ગુસ્સો વ્યક્ત કરવા માટે તલવારો અને સાંકળો સાથે શોક મનાવવા અને લોહિયાળ રમત રમવા માટે રસ્તાઓ પર ઊતરે છે. આનાથી સમગ્ર ટ્રાફિક વ્યવસ્થા અને વ્યવસાય પર અસર પડે છે. અને તે હિન્દુઓના વર્તમાન દુઃખ પર વ્યાખ્યાન આપી રહી છે.’