Election Expenditure Scam: લોકસભાની ચૂંટણીમાં ભ્રષ્ટ અધિકારીઓ મલાઈ તારવા ખોટા બિલો રજૂ કર્યાં હતાં. પોરબંદર, બોટાદ અને જામનગર જિલ્લામાં ચૂંટણી ખર્ચમાં થયેલા ગોટાળાનો મુદ્દો વિધાનસભામાં ગાજ્યો હતો. આખરે રાજ્ય સરકારે આ પ્રકરણની તપાસ કરવા કમિટીની રચના કરી છે.
ચૂંટણીમાં થયેલાં ખર્ચમાં ગેરરીતી
લોકસભાની ચૂંટણીમાં થયેલાં ખર્ચને લઇને વ્યાપક પ્રમાણમાં ગેરરીતી થઇ છે. પોરબંદરમાં 20 લાખ રૂપિયાના મંડપનો કોન્ટ્રાક્ટ અપાયો હતો. પરંતુ કોન્ટ્રાક્ટરે 2.90 કરોડ રૂપિયાનું બિલ રજૂ કર્યુ હતું. હવે એવી વિગતો સામે આવી છે કે, આ જ જિલ્લામાં આર.એમ. એન્ટરપ્રાઇઝે ફ્લાવર બુકેનું 8500 રૂપિયાનું બિલ મૂક્યુ હતું. આ ઉપરાંત અક્ષય કિચન વેરે 300 રૂપિયાના કપરકાબીનું બિલ 7 હજાર રૂપિયા મૂક્યુ હતું. ચિકનતંદુરીનુ બિલ 4 લાખ રૂપિયા મૂક્યા હતાં.
આ પણ વાંચો: ગુજરાતમાંથી 10 વર્ષમાં 23000 લોકોએ ભારતની નાગરિકતા છોડવા પાસપોર્ટ સરન્ડર કર્યા
ગાંધીનગરથી પૃચ્છા થતાં આ બિલ પરત લેવાયા હતાં. એલઇડી અને ઈલેક્ટ્રોનિક્સ ચીજવસ્તુઓના બિલ પણ લાખઓમાં મૂકાયા હોવાનુ જાણવા મળ્યુ છે. ઈવીએમ મશીનોને ટ્રકમાંથી ચડાવવા ઉતારાવવા માટે શ્રમિકોને અપાયેલાં નાણાંના બિલોમાં ગરબડ થઈ છે. હવે જ્યારે આ મુદ્દો વિધાનસભામાં ઉઠ્યો છે, ત્યારે રાજ્ય સરકારે પોરબંદર જિલ્લામાં તપાસ માટે ચાર સભ્યોની કમિટી રચી છે. જ્યારે જામનગર અને બોટાદ જીલ્લામાં પણ તપાસ કમિટીની રચના કરી છે.
